Lài mờ hơ̆, tàm broă jì ñhơ̆t tàm suơn, ồng Ksor Tân, deh nam 1980, kis tàm ƀòn Sơr gŏ ờ uă nsàng bơcah bal mờ ntìng geh pin là ƀồc ntìng cau ling chơ̆t màng. Ồng Tân neh yal mờ Mpồl Đơng lam Ling klàng sàh Ia Boòng mờ Mpồl K52 nàng tus sền, đal git. Tơnơ̆ mờ tŭ rề ơnàng tiah jòi, mpồl lơh broă geh gơnoar neh rồ geh tai 2 ƀồc ntìng cau ling chơ̆t màng bal mờ ờ uă phan lời wơl.

Bè hơ̆, kờp tus ngai 13 nhai 8, mìng tàm dùl tơngai ờ jŏ, Mpồl K52 neh jòi geh 8 ƀồc ntìng cau ling chơ̆t màng tàm ƀòn Sơr, sàh Ia Boòng. Tŭ do ală ƀồc ntìng cau ling chơ̆t màng bal mờ phan lời wơl gơrềng bal gam geh Mpồl K52 prăp gàr, kơ̆p nàng đal git, drơng tàm broă đal git măt mờ bơyai lơh ies tơ̆p di jăt mờ jơnau geh ai.

Kung tàm ngai òr (13/08), mpồl lòt jòi bơh Mpồl sồr lơh lơh jat “Broă lơh dờng 500 ngai mang lơh pràn lơh broă lòt jòi, rờ tơrgùm mờ đal gĭt mat ƀồc ntìng cau ling chơ̆t màng” tàm ù tiah sơnah ƀòn Nam Nha Trang, càr Khánh Hòa, gĭt gŏ bàr pe bơnah ntìng pin là ƀồc ntìng cau ling chơ̆t màng dê tàm anih lơh sơnơm (anih lơh sơnơm tàm rơgồng lŭ), gơwèt Tiah tam lơh ù tiah kăc màng Đồng Bò.

Lài hơ̆, ngai 04 nhai 8, ồng Nguyễn Văn Hưng, 65 sơnam, ơm tàm Jơrnum làng bol tiah drà Phước Tân, sơnah ƀòn Nam Nha Trang, yal tus mờ anih lơh broă geh gơnoar bè broă neh gŏ bàr pe nơm ntìng tàm tiah Anih lơh sơnơm tŭ lòt tàm brê pơgăp mờ do rlau 20 nam. Bơh jơnau yal do, mpồl kwang bàng, cau ling sơnah ƀòn Nam Nha Trang bơyai lam lơh uă ngai lòt jòi jat jơnau pơlam bơh ồng Hưng dê. Tus drim ngai 13/8, mpồl gŏ bàr pe nơm ntìng dờng, pin là ƀồc ntìng cau ling chơ̆t màng. Tiah gĭt gŏ neh geh cang tiah, sền gàr mờ yal mờ kấp hơđang in nàng bơyai lơh sền gĭt, bơsong jat jơnau sồr.