Nam bơsram 2026-2027, Hìu bơsram Jơi bơtiàn Ơm sa bic tơn bàr kấp Kấp 2 mờ Kấp pe Pinăng Tắc, sàh Bác Ái Đông, càr Khánh Hoà geh lơh pa mờ ai ngui, ala mờ hìu bơsram neh gơtìp sèt. Tàm bă ù ơnàng 3 lồ 8 sào, hìu bơsram geh 18 jơdŭ bơsram, 60 jơdŭ ơm mờ hìu tàp pràn să jan uă bơta, di pal mờ jơnau kờñ bơsram sră, ơm sa ai mờr 500 nă kơnòm bơsram jơi bơtiàn ờ gal cau tàm tiah đah Jum măt tơngai mŭt càr in. Kờp jơh priă bơcri lơh rơlao 83 tơmàn 600 tơlăk đong. Oh Kiều Năng Bảo Trâm, bơsram tàm hìu bơsram do pà git: “Hìu bơsram geh lơh gơs, oh geh bơsram tàm hìu bơsram dờng niam mờ geh uă phan bơsram tơl. Nàng bol oh geh tiah bơsram sră niam ngan”.

Ồng Bùi Quang Quyền, Lam bồ Hìu bơsram Jơi bơtiàn Ơm sa bic tơn kấp bàr mờ kấp pe Pi Năng Tắc đơs là, broă bơcri priă, ai tơl bơta niam nàng kơnờm bơsram jơi bơtiàn ờ gal cau geh sào sa, bơsram sră tơrgùm bal, ơm tơn pơgồp bal tàm broă tơrmù bơta ờ ndrờm bal đah ală tiah: “Do là broă lơh jăt gùng dà broă lơh bơh Đảng, Dà lơgar dê nàng lơh bơta niam broă bơto bơtê rềp bal rơlao. Ờ geh broă tam cah is đah ală tiah kơh bơnơm mờ tiah ring. Wèt tus nàng lơh ndrờm bal tàm broă bơto bơtê mờ bơtàu tơnguh rơlao”.

Nàng tơnguh uă bơta niam broă bơto bơtê tiah kơh bơnơm, tiah ngài, tiah kal ke, bal mờ broă lơh ngan wơl phan bơna, càr Khánh Hoà gam tơnguh bơta bơsram sră, rài kis bơh kơnòm bơsram dê mờ broă dong kờl priă bơsram, dà toh hìu bơsram, dong kờl sră măi, sră cih mờ phan bơsram. Broă kơnòm bơsram sơrbì bơsram nàng ơm tàm hìu dong kờl hìu nhă lơh broă kung neh geh bơsong bơh gờñ.

Càr Khánh Hoà tŭ do geh rơlao 2 tơlăk 240 nă làng bol, tàm hơ̆ làng bol jơi bơtiàn ờ gal cau geh rơlao 266 rơbô nă. Nam bơsram 2026-2027, gùt càr geh rơlao 462 rơbô nă kơnòm bơsram bơsram tàm 318 hìu bơsram. Tàm kàl rơlô bơkang, càr bơcri priă rơlao 1 rơbô 143 tơmàn đong nàng lơh pa, lơh niam wơl hìu bơsram, ơdŭ bơsram, bơtơl phan bơto bơsram mờ bơto bơtơl mpồl cau pơgru in. Ồng Vũ Ngọc Đương, Kwang Lam bồ Sờh Bơto bơtê mờ Bơsram càr Khánh Hoà pà git: “Ală phan bơna tàm ală hìu bơsram tàm càr neh geh bơcri priă lơh di pal ngan. Bơh mpồl jơdŭ bơsram, phan bơsram, hìu tàp pràn să jan. Cau mè bèp kơnòm bơsram ring nùs bal ngan, kờñ bal tŭ bol añ lơh jăt Jơnau lơh nền tàm pơrjum sồ 71, tơnguh uă bơta niam, rơhời tơrmù bơta niam broă bơto tàm ală tiah, ai geh bơta ndrờm bal tàm bơta niam broă bơto tàm gùt lơgar”.

Bơh broă pơlam kơnòm bơsram tus tơl hìu nhă, dong kờl bơsram sră tus mờ broă bơcri priă lơh hìu bơsram, ơdŭ bơsram, càr Khánh Hoà gam ai geh tai dơ̆ niam bơsram sră ai kơnòm bơsram tàm tiah kơh bơnơm, tiah làng bol jơi bơtiàn ờ gal cau in.