Do là dùl tàm ală broă lơh, lơh jăt jơnau ring bal cau klao mờ cau ùr mờ bơsong ală bơta geh kwơ gơwèt mờ cau ùr mờ kơnòm dềt.

Xã Trường Sơn, kơnhoàl Quảng Ninh, càr Quảng Bình là dùl tàm 8 xã geh Mpồl cau ùr Việt Nam rơwah lơh tơrlòng tàm gùt lơgar lơh jăt Rơndăp broă sồ 08. Tàm do broă lơh Mpồl mblàng yal mpồl bơtiàn neh geh lơh mờ 10 nă cau. Mpồl geh kơnòl mblàng yal, lam sồr làng bol tam gơl bồ tơngoh kơlôi sơnơng, broă lơh tàm lơh sa, bơtàu tơnguh lơh sa, tơn jơh ală jơnau ờ niam mờ broă ai cau klao mờ cau ùr pal lơh bè lơi tàm hìu nhă mờ mpồl bơtiàn, ală bơhiàn ờ niam, ờ geh kwơ.

Lŏ Hồ Thị Thư, kis tàm ƀòn Đá Chát, xã Trường Sơn, kơnhoàl Quảng Ninh, càr Quảng Bình pà git, lài do, nàng dan mờ bơklao ai lŏ in tus bal ală broă lơh mpồl bơtiàn là bơta gơtìp kal ke ngan. Mơya, bơh tŭ geh ală broă lơh bơh mpồl mblàng yal mpồl bơtiàn, bơklao lŏ neh geh tam gơl uă loh làng ngan tàm nùs nhơm bal mờ broă. Klao lŏ neh git tam pà bal broă mờ hìu nhă nàng lŏ geh tai tơngai lơh ală broă mpồl bơtiàn tàm ƀòn: “Tơnơ̆ do añ geh bơyai lơh pơrjum oh mi ƀòn lơgar nàng mblàng yal bè ring bal cau klao mờ cau ùr. Bè gơwèt mờ cau klao den pal lơh mờ tam pà bal ală broă lơh lơi mờ pơ-ùr, mờ kòn nàng ndrờm bal mờ ƀuơn tàm hìu nhă. Di lah bơklao ờ wă rồn bơklơn pơ-ùr, lơh gơtìp kal ke tus mờ pơ-ùr, mơya di lah he geh bơto bơh broă lơh ring bal cau klao mờ cau ùr den geh kwơ tus mờ să tờm bal mờ mpồl bơtiàn. Să tờm he geh đơs nàng oh mi ƀòn lơgar in wă ngan là ală sơnam ơruh pơnu”.

Ờ mìng lŏ Thư mờ geh uă cau ùr ndai kis tàm xã Trường Sơn kung geh tam pà bal, tơnơ̆ mờ tŭ tus bal ală dơ̆ mblàng yal bơh mpồl mblàng yal mpồl bơtiàn tàm ƀòn, geh uă cau bơklao neh tam gơl bồ tơngoh, git tam pà bal broă lơh lài do gơlơh bè mìng geh cau ùr lơh. Uă bơta mờng ờ niam rơhời geh sơbì, cèng wơl bơta ring lơngai ai hìu nhă mờ ƀòn lơgar in. Kung tàm xã tiah nhàr dà lơgar do sơl, Mpồl cau ùr càr neh tơlik măt ală broă lơh geh anih pin dờn, bơto bơtê bè ring bal cau klao mờ cau ùr tàm bàr thôn mờ broă lơh Mpồl Cau tờm bơh broă tam gơl tàm Hìu bơsram zân tộk ƀán trú Kấp 2 Trường Sơn; mờ tàm kấp xã kung geh lơh tai 6 mpồl mblàng yal mpồl bơtiàn tàm 6 ƀòn. Mò Dương Thị Hồng Chuyên, Củ tịc Mpồl cau ùr kơnhoàl Quảng Ninh, càr Quảng Bình pà git, bơh ală “Mpồl mblàng yal mpồl bơtiàn” neh mblàng yal tus làng bol kòn cau Bru-Vân Kiều bè ală jơnau git wă bè: Adăt ring bal cau klao mờ cau ùr; broă cau klao mờ cau ùr pal geh lơh tàm hìu; broă rơcang sơndră mờ bao gờñ mờ bao rềp jơi nòi bal; ală jơnau yal bal mờ jơnau git wă geh kwơ nàng dong kờl di tŭ ală cau gơtìp tam lơh pù pờng tàm hìu nhă in: “Tàm tơngai tus, Mpồl cau ùr geh pơn jăt tai bal mờ mpồl cau ùr xã nàng đơng lam, bơyai lơh broă tơrlòng mblàng yal mpồl bơtiàn geh cồng nha niam. Tàm hơ̆ uă ngan là mpồl geh sền kwơ broă bơsram tàp, tơnguh uă jơnau git wă bè ring bal cau klao mờ cau ùr, bơ̆t bơtàu hìu nhă gơboh gơbài”.

Bơdìh mờ broă mblàng yal ală mpồl lơh broă mblàng yal gam lam sồr, bơto bơtê làng bol tus bal Rơndăp broă lơh kwơ màng là cau klao geh tam pà bal, dờp broă lơh tàm hìu, ai tơl bơta niam nàng cau ùr tơnguh bơta pràn tàm gơnoar ring bal, tơmù bơta tam lơh pù pờng tàm hìu nhă, pơgồp bal tàm broă lơh gơs ală kơnòl broă mờ Broă lơh jơnau kờñ dà lơgar bơtàu tơnguh lơh sa mpồl bơtiàn tiah làng bol ală jơi bơtiàn mờ tiah kơh bơnơm neh geh ai. Mò Nguyễn Thị Kim Dung, Kwang atbồ Ƀan Tuyên giáo, Mpồl cau ùr Việt Nam pà git, broă lơh “Mpồl mblàng yal mpồl bơtiàn” gơwèt Rơndăp broă lơh ring bal cau klao mờ cau ùr mờ bơsong ală bơta jal mhar gơwèt mờ cau ùr mờ kơnòm dềt geh Mpồl cau ùr Việt Nam đơng lam lơh neh dong kờl 120 nă cau tàm mpồl cau ùr tàm xã Trường Sơn, kơnhoàl Quảng Ninh geh tus bơsram jơnau git wă bè ring bal cau klao mờ cau ùr, tơn jơh ală bơhiàn ờ niam mờ rơhời tơnguh uă bơngă bơh cau ùr dê tàm hìu nhă mờ mpồl bơtiàn. “Bơta ờ ndrờm bal cau klao mờ cau ùr bal mờ ală jơnau ờ ring bal bè cau klao mờ cau ùr gam geh tàm mpồl bơtiàn mờ tàm hơ̆ uă ngan là làng bol ală jơi bơtiàn ờ gal cau. Tài di lah pơn drờm bal bè jơnau git wă kung bè rài kis lơh broă sa mpồl bơtiàn bơh làng bol jơi bơtiàn ờ gal cau gam geh ală bơta ờ ndrờm bal uă ngan. Bol añ kung kơ̆p kờñ là tơnguh uă jơnau git wă nàng ală cau do tam gơl bồ tơngoh, sơbì ală jơnau ờ niam hơ̆, sơbì ală bơta kal ke hơ̆ nàng ală cau do geh tơl pràn, geh bơta niam pràn mờ tơnguh gơnoar, bơta niam bơh să tờm dê”.

Kờp tus nhai 5 nam do, càr Quảng Bình neh lơh geh 32 Mpồl mblàng yal mpồl bơtiàn, 6 Mpồl Lam bồ bơh broă tam gơl mờ 19 anih geh pin dờn. Bơh cồng nha lơh jăt lài ngan gơtùi gŏ, ală broă lơh bơh Rơndăp broă sồ 08 neh geh lơh mờ lơh jăt jơnau kờñ bơh gùng dà rơndăp broă lơh dê, geh nùs nhơm tơl ală bơta, mờ lơh mùl màl, di pal mờ bơta tàm mùl màl, cèng geh gơnoar kwơ ai cau ùr mờ kơnòm dềt tàm ală tiah in geh lơh, pơgồp bal tàm broă tơnguh jơnau git wă, tam gơl bồ tơngoh kơlôi sơnơng, broă lơh.