Mang 6/4, rlau 1 rơbô 500 nă cau ala mat mờ gĭt nđờ jơ̆t rơbô nă làng bol càr Dăk Lăk neh sền bal tơn broă lơh đơs crih tam cribơyai cíñ trị “Jơnau đơs crih jòng ring lơngai”, tơngkah kir sơnrai 50 nam Tơngklàs tiah đah Jum Dà lơgar, tơrgùm dùl Dà lơgar. Mờ gơtha rùp pơrya bơh tam lơh pha lin Buôn Ma Thuột, jai pha bơh sơnrờp, lơh gơlik bơta tam gơl ai Tam lơh pha lin dờng kàl prang nam 1975, mờr 250 nă cau đơs crih tam ya, cau ling, cau đơs crih tam ya là làng bol neh lơh tơngŏ bal ală gùng đơs crih dờng màng bơh nùs nhơm Gờm chờ Tây Nguyên tơngklàs mờ sơr băc mhar lòt tus Sài Gòn. Bi Nguyễn Thị Thúy Diễm, ơm tàm sơnah ƀòn Tân An, ƀòn dờng Buôn Ma Thuột đơs: “Broă lơh do dờng ngan mờ uă bơta dờng màng ngan. Jơh hìu bơnhă añ hưh hơh lòt sền broă lơh do, gŏ niam ngan mờ gal ngan cau, chờ hờp ngan mờ dờng ngan”.

Bơdìh mờ jat sền cơn đoà jơng lòt bơh mpồl ling tơngklàs bơh ală jơnau cih sền gŏ ngan ngồn prăp lời wơl, ală cau ala mat mờ cau tus sền geh iăt ală jơnau tàm pà bal ngan ngồn ngan bơh tàm mpràp bơh Trung tướng, Cau ling khin cha jak chài mpồl ling phàu crong Làng bol ồng Đoàn Sinh Hưởng, lài do Lam bồ Mpồl ling dờng 9, Ling mpồl dimơ Rơndeh sơgiăp 273, cau neh măi tơn rơndeh sơtang 980 mut tam lơh tàm sư bộ 23 Việt Nam kộng hòa tàm Buôn Ma Thuột dê, tàm ngai 10/3/1975. Rơndeh sơtang 980, tŭ do neh gơ gơs rùp pơrya bơta pràn ờs mờng, tàm mpồl rùp mòn Tam lơh Pha lin Buôn Ma Thuột. Trung tướng ồng Đoàn Sinh Hưởng pà gĭt, ồng pơn yờ să ngan tài bơh kah yau 21 nam tam lơh mờ cau sò tơm tơrgùm dùl Dà lơgar mơkung pơn yờ să tài ală cồng nha neh lơh geh tàm 50 nam do: "Pơn yờ să ngan là he neh geh tus bal ală dơ̆ tam lơh kwơ màng bè hơ̆ bal mờ cau ling bal mờ neh lơh sir kơnòl broă. Tơnơ̆ 50 nam rê wơl tàm do den Dà lơgar he dê tam gơl rao mờ is ồn là Buôn Ma Thuột tŭ do neh krơi rao, hơ̆ là dùl bơta pơn yờ să ngan”.

Tàm Hìu bơsram Ling klàng Ling tiah 7 (quận 12, ƀòn dờng Hồ Chí Minh) kung pa bơyai lơh broă  lơh đơs crih tam ya gờm chờ tơngkah kir sơnrai 50 nam Ngai tơngklàs tiah đah Jum, tơrgùm dùl Dà lơgar mờ tơngume “50 nam- Sơnam pa Dà lơgar”. Broă lơh neh tơngŏ geh gơtha, bơngă, bơta kwơ kah yau bơh Ngai Tơngklàs tiah đah Jum, tơrgùm dùl Dà lơgar dê. Bơh hơ̆, đơs nền bơta đơng lam jak chài ngan bơh Đảng mờ Củ tịc Hồ Chí Minh dê; bơta pràn mờ nùs nhơm lơh ngan tam lơh, lơh ngan lơh geh pha lin bơh Mpồl ling klàng mờ Làng bol Việt Nam dê, mpồl tam klăc dờng jơh gùt jơi bơtiàn. Mơkung kah ưn ngài dà kơl hề bơh ală mpồl ling neh tam lơh, phi să, lơh geh tam lơh pha lin dờng màng; lơh kah wơl nùs nhơm kờñ gơboh Dà lơgar, pơn yờ să bơh kwang bàng, cau ling, làng bol dê tàm broă lơh bơt bơtàu mờ sền gàr Dà lơgar, bơt bơtàu Dà lơgar, mut tàm rài brồ să jơi bơtiàn. Ồng Tô Văn Luận, dong broă bơto pơlam bơh Cơldŭ tă pơgồp jơnau đơs sră nggal gơnoar ătbồ Hìu bơsram Ling klàng Ling tiah 7 dê đơs: “Ngai 30/4 mờr tus cèng gơtha kah yau dờng màng bơh jơh gùt Đảng, jơh gùt ling klàng mờ jơh gùt làng bol dê. Kwang bàng, cau ling tàm mpồl ling klàng gam hô hơng lơh jat ală broă lơh nàng tơngkah kir sơnrai ngai Pha lin. Hìu bơsram Ling klàng Ling tiah 7 kung bơyai lơh uă broă lơh, tàm hơ̆ geh broă gàr niam mpồl tus bal lòt pơdar tàm gùng, lòt pơdar tàm dơ̆ tơngkah kir sơnrai. Să tờm añ kung bè ală kwang bàng, cau ling mờ rơnàng kơnòm să sơl den bơh ală lơma lời wơl kung bè geh bơto bơtê, jơh tơl nă cau ndrờm pơn yờ să mờ gĭt ưn ngài rơnàng bèp bi lòt lài neh tuh mhàm, ntìng tài bơh lơngap lơngai is jơi bơtiàn dê”.

Thượng úy Phạm Duy Hưng, Lam bồ Mpồl ling dờng dimơ Ling lơh gùng Anih lơh broă đơng lam ling klàng ƀòn dờng Hồ Chí Minh pà gĭt:“Ngoh rơngăc tŭ mờr tus ngai lơh chờ dờng bơh làng bol jơh gùt lơgar đơs bal mờ ƀòn dờng Hồ Chí Minh đơs is, tơngkah kir sơnrai 50 nam tơngklàs tiah đah Jum, tơrgùm dùl Dà lơgar. Là “Cau ling Wa Hồ” den he gŏ ală ngai lơh chờ dờng do jơh gùt lơgar ndrờm wèt rê mờ ƀòn dờng, kơnòl broă bơh să tơm dê geh yờ tơnguh uă rlau, lòt sền lơngăp lơngai ai ală dơ̆ lơh chờ dờng in mơkung gàr niam broă lơh geh bơyai lơh ƀuơn ngan, ờ gŏ di lời tơlik geh bơta roh lơngap lơngai, hơ̆ là kơnòl broă bơh oh mi cau ling kông ƀiñ ƀòn dờng dê”.

Bơh jơnau yal bơh Trung tướng Đoàn Sinh Hưởng, cau neh măi rơndeh sơtang 980 mut tam lơh tàm pôs đồng  bol sò tơm tàm Buôn Ma Thuột, tus bơta ngoh rơngăc bềng bơta pơn yờ să bơh làng bol mờ cau ling kơnòm să tŭ do dê, ală broă lơh đơs crih tam ya neh gơ gơs bơta tơn rềp kwơ màng đah rài lài do mờ tŭ do dê. Nùs nhơm Cau ling Wa Hồ ờ mìng kis sùm tàm cồng nha tam lơh rài kah yau dê lơm mờ gam lơh gơrề uă tàm tơl nùs nhơm kờñ gơboh Dà lơgar, tơl broă lơh geh ngan tài bơta bơtàu tơnguh bơh Dà lơgar tŭ do dê.