Ngai 21/01, Anih Lơh broă sùm tiah Tây Nguyên, Anih Jơnau đơs Việt Nam pơgồp bal mờ Gah đơng lam Ling klàng càr Dăk Lăk mờ Kông ty Xăng zờu tiah đah Jum Tây Nguyên bơyai lơh jàu pà hìu ơm ai cau ling bal in pà cau ling geh griăt bi Xa Văn Thắng, lơh broă tàm anih lơh broă ling klàng kơnhoàl Krông Bông, càr Dăk Lăk. Bi Xa Văn Thắng geh rài kis kal ke, ơm hìu ơpah, sền gròi mè kra ờ pràn mờ 2 nă kòn dềt gam tàm sơnam lòt bơsam. Hìu ơm pa lơh geh bơta ơnàng mờr 100 thơk vuông, kờp jơh priă tă lơh 260 tơlak đông.

Tàm hơ̆, VOV Tây Nguyên mờ Kông ty Xăng zờu tiah đah Jum Tây Nguyên dong kờl 80 tơlak đong, bơnah gam wơl bi Thắng neh leng càn mờ mpồl ling bal mờ Anih priă jền Cíñ sác Xã hội. Hìu pa geh jàu pà tàm dơ̆ Sa tềp bơhiàn Dà lơgar là phan pà geh kwơ ngan, cèng wơl bơta chờ hờp mờ bơta gơn kơnờm ai hìu bơnhă in, bi Thắng geh tiah ơm lơngăp lơngai, iang nùs lơh broă lơh sir niam ngan kơnòl broă. Geh gĭt, do là hìu ơm dơ̆ 5 mờ VOV Tây Nguyên bal mờ mpồl lơh broă dong kờl neh lơh dong làng bol càr Dăk Lăk tàm nam pa do.

Tàm nùs nhơm chờ wă rò satềp nam pa Ất Tỵ 2025, hìu nhă lŏ Ka Nhing, kòn cau K’ Ho, kis tàm mpồl ƀòn Di Linh Thượng 2, ƀòn drà dềt Di Linh, càr Lâm Đồng ngoh rơngăc ngan tŭ geh jào pà “Hìu ram nùs nhơm”. Hìu pa geh lơh mờ kờp jơh khà priă 160 tơlăk đong. Tàm hơ̆, Mpồl tam klăc cau ùr kơnhoàl Di Linh dong kờl 50 tơlăk đong bơh Kes priă tài cau ùr rơƀah, bơnah priă gam tai geh cau tàm hìu càn.

Mò Ka Hương, Phó Củ tịc Mpồl tam klăc cau ùr kơnhoàl Di Linh pà git, bal mờ broă jào “Hìu ram nùs nhơm”, di tàm dơ̆ do gam geh uă broă lơh drơng gàr Satềp ai oh mi cau ùr geh rài kis gơtìp kal ke in: “Mpồl Tam klăc cau ùr kơnhoàl Di Linh hòi jà jơh ală cau geh nùs nhơm niam, bal mờ ală cau tàm mpồl cau ùr tus bal dong kờl… Bơdìh hơ̆ tai, bol añ kung pơgồp bal mờ ờ uă mpồl lơh broă tàm kơnhoàl bè Kông ty Ồs đèng nàng bơyai lơh còp să, pà phan ală oh mi rơƀah in, cau ờ geh cau ròng siam in nàng ală cau do geh phan chờ hờp wă rò Satềp. Tàm nam, tŭ bơyai lơh “Cau mè ròng siam”, bol añ neh hòi jà geh ală cau niam nùs, ală mpồl lơh broă, ală cau lơh broă nàng tus còp să mờ pà phan ai 45 nă kơnòm dềt kòn đời, ờ geh cau ròng siam in. Pah nhai, geh sùm mpồl cau tus còp, drơng gàr bơta pràn kơl dang să jan. Lồi nam den tus còp să, pà phan nàng ală kơnòm dềt in geh tai phan wă rò Satềp chờ hờp”.