Tàm gùng lòt tus mờ ală Pôs đồng ling sền gàr tiah nhàr lơgar tàm gơl gùng tiah nhàr lơgar rềp nhàr bal mờ lơgar Lào mờ Campuchia ală ngai do ƀuơn ngan  geh bơnĕ bơnài bal tàm nùs nhơm hô hơng mờ bơta chờ hờp wă rò Sa tềp. Tàm 13 xã tiah nhàr lơgar gơwèt 4 kơnhoàl: Đăk Glei, Ngọc Hồi, Sa Thầy mờ Ia H’Drai càr Kon Tum dê nùs nhơm Sa tềp neh tus rềp ngan.

Di dơ̆ Sa tềp bơhiàn Dà lơgar nam Ất Tỵ nam do Gah đơng lam Mpồl ling sền gàr tiah nhàr lơgar càr Kon Tum in wă sàh Ia Đal, kơnhoàl Ia H’Drai bơyai lơh tiah kấp càr Broă lơh “Nam pa Sền gàr tiah nhàr lơgar- ram nùs làng bol ƀòn lơgar” pơgồp bal mờ “Ngai chờ klơm ƀañ mbar lơm pòng tơlir”. Bơh broă lơh do rlau 6 rơbô nă làng bol 11 thôn tàm sàh geh chờ hờp Sa tềp bơhiàn Dà lơgar, hưh hơh tàm pơrlòng klơm mbar, gơm mbar lơm pòng; tìp mat lơh kwèng đơs crih tam ya, tàp pràn să jan; geh pà rlau 250 bơnah phan pà, 400 yô ƀañ mbar lơm pòng. Đại tá ồng Lê Minh Chính, Chíñ uỷ Mpồl ling sền gàr tiah nhàr lơgar càr Kon Tum, pà gĭt, di dơ̆ do, tàm jat kềng gah gùng tiah nhàr lơgar dồ ròt bơyai lơh broă lơh do nàng sền gròi Sa tềp ai làng bol in:“Nam do bol añ rơ wah sàh Ia Đal, kơnhoàl Ia H’ Drai là sàh lơh lài nàng ai bơta mờng chài bal. Ală sàh gam wơl ală Pôs đồng ling sền gàr tiah nhàr lơgar pơgồp bal mờ làng bol mờ gơnoar atbồ tiah do nàng bơyai lơh ai làng bol in mờ ală priă jền bơh kwang bàng, cau ling tă pơgồp mờ hòi jà tă pơgồp bal ală mpồl lơh sa kă bro, cau geh nùs nhơm niam, bơh ală kấp, ală gah broă nàng làng bol in wă rò dùl dơ̆ Sa tềp ram mhŭ”.

Tàm jơnau ntas cing mồng mpoong tus, dà pơrhê bồng bi bơnĕ bơnào bal mờ bơta dơ ñiŏ bơh làng bol ală jơi bơtiàn ơm kis jat kềng gah gùng tiah nhàr lơgar càr Kon Tum dê gam lơh geh rùp hin nam pa niam ngan mờ ram mhŭ.

Nam 2024, rài kis bơh làng bol tàm tiah nhàr lơgar càr Kon Tum dê tam gơl niam ngan kơnòm giă kơphê, kao su, bùm blàng... giă tăc tàm khà jơnhoa. Ală broă lơh bơh mpồl ling sền gàr tiah nhàr lơgar càr Kon Tum dê lam lơh mờ tus bal, bè: tàm jàu kơnòl broă ai Đảng viên Pôs đồng ling sền gàr tiah nhàr lơgar in drơng hìu bơnhă làng bol; Dong kờl kơnrồ dra ai cau rƀah tàm xã tiah nhàr lơgar in; Ròng sur sơn nràng; Lòt bal mờ cau ùr tiah nhàr lơgar... lơh jat geh cồng nha dong gĭt nđờ rơhiang hìu bơnhă làng bol jơi bơtiàn dồ ết nă cau geh priă lơh geh, tơnguh tai bơta chờ hờp Sa tềp. Ồng Bloong Hâm, Phó Củ tịc Anih duh broă Làng bol xã Đăk Dục, kơnhoàl Ngọc Hồi, pà gĭt:“Geh Đảng, Dà lơgar, ală anih lơh broă, mpồl lơh broă, Mpồl ling sền gàr tiah nhàr lơgar càr sền gròi dong kờl ală broă jàu bơh hơđang dê jàu lơh sa- mpồl bơtiàn tàm ù tiah xã là bol añ lơh geh mờr bàr pe broă jàu là sơr lèt pơndrờm mờ broă rơndăp lơh geh ai. Làng bol chờ hờp, brơn brài rcang wă rò Sa tềp bơhiàn Dà lơgar Jơi bơtiàn dê”.

Tơngai gam lơyài tus tơngai tàm jàu nam yau wă rò nam pa. Tàm gơl gùng tiah nhàr lơgar càr Kon Tum geh 76 mpồl cau, rlau 550 hìu bơnhă mờ cau dồ nă să tàm 13 sàh tiah nhàr lơgar cih mat dan tus bal atbồ gùng tiah nhàr lơgar, jrong tam cah tiah nhàr lơgar; geh 93 mpồl mờ mờr 600 hìu bơnhă cih mat dan tus bal atbồ lơngăp lơngai rơndăp tăp sèng ƀòn lơgar. Tàm nùs nhơm wă rò Sa tềp, chờ hờp Nam pa, ling klàng làng bol tiah do kung gam ờ hŭi kơnòl broă yờ tơnguh uă nùs nhơm rcang ngăc. Kwang bàng, cau ling mờ làng bol tàm jơh kềng gah gơl gùng tiah nhàr lơgar kung gàr niam broă lơh lòt sền gàr niam kơ̆ kơl jăp gơnoar tờm lơngăp lơngai tiah nhàr lơgar Dà lơgar dê. Đại tá ồng Trần Ngọc Tùng, Phó Kwang đơng lam bồ, Kwang atbồ lam bồ pơlam broă ling klàng Gah đơng lam mpồl ling sền gàr tiah nhàr lơgar càr Kon Tum, pà gĭt: “Lơh jat gơnoar broă kơnòl broă ling klàng làng bol jơh nùs pơgồp bal mờ mpồl ling sền gàr tiah nhàr lơgar tàm atbồ sền gàr kơnhoàl ù tiah, gơnoar tờm lơngap lơngai tiah nhàr lơgar Dà lơgar, Gah đơng lam Mpồl ling sền gàr tiah nhàr lơgar càr lơh pràn mblàng yal yờ tơnguh uă bơta gĭt wă bơh làng bol dê tàm broă bơt bơtàu nùs nhơm rcang lài jơh gùt làng bol sền gàr tiah nhàr lơgar pơgồp bal mờ nùs nhơm rcang lài sền gàr lơngăp lơngai làng bol dê. Đòm jat niam gơnoar broă, kơnòl broă bơh mpồl cau, cau dồ nă să tàm broă atbồ tiah nhàr lơgar Dà lơgar, sền gàr lơngăp lơngai cíñ trị rơndăp tăp sèng lơngăp lơngai mpồl bơtiàn”.

Mờ ală tam gơl jơh nùs tàm rài kis lơh sa- mpồl bơtiàn, bơta chờ hờp wă rò Sa tềp bơh ling klàng mờ làng bol dê tàm tiah nhàr lơgar Kon Tum ngai sơlơ hô hơng rlau tai. Sa tềp tiah nhàr lơgar ờ mìng là dơ̆ bơtòm tơrgùm lơm mờ gam là tŭ nàng tam pà bal, tam klăc bal nùs nhơm ling klàng làng bol, lơh gơ rề uă bơta chờ hờp tiah lam lài Dà lơgar dê.