Trung tướng ồng Nguyễn Anh Tuấn, Cíñ uỷ Mpồl ling sền gàr tiah nhàr lơgar pà gĭt, wă rò sơnam pa nam do, Đảng ủy, Gah đơng lam Mpồl ling sền gàr tiah nhàr lơgar neh sồr ală mpồl ling lơh broă rơndăp lơh, lơh niam broă lơh rcang lài, ai gĭt nđờ rơbô mpồl lơh broă lòt tàm ală tiah pơgồp bal mờ kấp ủy, gơnoar atbồ ală tiah bơyai lơh ai mpồl ling mờ làng bol in wă rò sa tềp, chờ hờp nam pa mờ sền gàr lơngăp lơngai, rơndăp tăp sèng tàm ală ƀòn lơgar tiah nhàr lơgar dê.

Pa do, tàm sàh Pa Tần, kơnhoàl Sìn Hồ, càr Lai Châu, neh geh bơyai lơh broă lơh “Nam pa Sền gàr tiah nhàr lơgar ram nùs làng bol ƀòn lơgar”, mờ uă broă lơh geh ngan. Tus bal mờ đơs tàm broă lơh, Củ tịc lơgar ồng Lương Cường tơngŏ bơta niam ngan mờ ngoh rơngăc tài kwang bàng, cau ling Mpồl ling Sền gàr tiah nhàr lơgar neh mờ gam pơgồp bal niam mờ kấp ủy, gơnoar atbồ tiah do, ală kấp, ală gah broă sền gròi Sa tềp ai làng bol tàm tiah nhàr lơgar in. Củ tịc lơgar đơs là, do là broă lơh tơngŏ nùs nhơm geh kơnòl, bơhiàn tàm dong tàm kờl bal bơh jơi bơtiàn dê mờ nùs nhơm niam bơnĕ bơh Mpồl Ling klàng Làng bol Việt Nam khin cha jak chài, pơgồp bơnah lơh niam rlau tai rùp hin “Cau ling Wa Hồ” tàm tơngai pa. Củ tịc lơgar ồng Lương Cường đơs: “Broă lơh do geh bơyai lơh mờ uă broă lơh geh ngan, geh kwơ ngan, rềp mềr mờ làng bol ală jơi bơtiàn; den tàng neh hòi jà geh bơta mut lơh bal, sơm bat tê bal, pơgồp dà kơl hề lơh is bơh uă anih lơh broă, mpồl cau, cau dồ nă să bơh Dà lơgar tus ală tiah mờ ală mpồl lơh sa kă bro dê. Mờ ală kơnrồ me, kơl dung phan pà, phe, mbar lơm pòng, pà priă bơsram ai ală kơnòm bơsram rƀah sơr lèt gan kal ke,“Dong kờl oh lòt bơsram” mờ dong kờl 400 nơm hìu ơm... mờ broă lơh dê jàu, hơ̆ ờ mìng là ală phan pà bè phan bơna lơm, mờ gam là bơta pơn jờng bè nùs nhơm dờng màng, geh kwơ uă ngan, rơ̆p dong tơl hìu bơnhă rƀah  tàm tiah nhàr lơgar bal mờ ling klàng – làng bol jơh gùt lơgar wă rò Sa tềp bơhiàn Dà lơgar bơh jơi bơtiàn dê ram mhŭ, hờn chờ mờ kis chờ hờp”.

Di dơ̆ do, Củ tịc lơgar ồng Lương Cường jàu pà 200 nơm hìu Ram mhŭ tiah nhàr lơgar kờp priă 10 tơmàn đong ai làng bol tiah nhàr lơgar càr Lai Châu in mờ pà 11 bơnah phan pà ai ală hìu bơnhă geh sră dong kờl Dà lơgar dê. Jat jơnau yal bơh Mpồl bơyai lơh dê, kờp jơh priă jền phan pà mờ ling klàng mờ làng bol jơh gùt lơgar pơyoa tus ală tiah nhàr lơgar in bơh broă lơh “Nam pa Sền gàr tiah nhàr lơgar- ram nùs làng bol ƀòn lơgar” nam 2025 là mờr 25 tơmàn đong.

Kung tàm tơngai do, tàm tiah nhàr lơgar ală càr tàm tiah Tây Nguyên neh geh bơyai lơh broă lơh “Nam pa Sền gàr tiah nhàr lơgar ram nùs làng bol ƀòn lơgar”. Tàm sàh tiah nhàr lơgar Ia Lốp, kơnhoàl Ea Súp, càr Dăk Lăk, broă lơh “Nam pa Sền gàr tiah nhàr lơgar ram nùs làng bol ƀòn lơgar” neh jàu 5 nơm hìu pà ală hìu bơnhă geh rài kis kal ke ngan, jàu mờr 400 bơnah phan pà hìu bơnhă geh sră dong kờl Dà lơgar, hìu bơnhă rƀah, ală hìu bơnhă pơn rơ ngan, bơyai lơh kham kòp, pà sơnơm ờ sa priă ai rlau 300 nă làng bol in. Tàm sàh tiah nhàr lơgar Ia Pnôn, kơnhoàl Đức Cơ, càr Gia Lai, broă lơh “Nam pa Sền gàr tiah nhàr lơgar ram nùs làng bol ƀòn lơgar” neh jàu 100 bơnah phan pà ai ală hìu bơnhă geh sră dong kờl Dà lơgar; 20 bơnah phan pà ai ală kơnòm bơsram geh rài kis kal ke ; kham kòp, pà sơnơm ờ sa priă ai rlau 200 hìu bơnhă. Tàm sàh Thuận Hạnh, kơnhoàl Dăk Song, càr Dăk Nông, broă lơh neh jàu 250 bơnah phan pà ai hìu bơnhă rƀah, hìu bơnhă geh rài kis kal ke mờ hìu bơnhă geh sră dong kờl dà lơgar, ală kơnòm bơsram geh rài kis kal ke mờ kờp jơh khà priă 150 tơlak đong; jàu 3 nơm hìu tam klăc dờng pà ală hìu bơnhă geh rài kis kal ke uă in".

Gơtùi đơs nền Broă lơh “Nam pa Sền gàr tiah nhàr lơgar ram nùs làng bol ƀòn lơgar” geh bơyai lơh tàm jơh gùt kơnhoàl ù tiah nhàr lơgar dê, bồt bơlào dà lềng, gơ gơs dùl tàm ală broă lơh gàr tơl niam rài kis mpồl bơtiàn geh cồng nha ngan rlau jơh, ngan ngồn ngan rlau jơh bơh Mpồl Ling klàng dê, pơgồp bơnah sền gròi Sa tềp ai cau rƀah in, cèng wơl bơta chờ hờp, nùs nhơm brơn brài ai làng bol tiah nhàr lơgar in. Bơh hơ̆ tơnguh tai bơta pràn tam klăc dờng jơh gùt jơi bơtiàn, đơs nền ală bơta kwơ niam chài bơhiàn niam bơnĕ bơh jơi bơtiàn he dê là kờñ gơboh kòn bơnus, nùs nhơm dong kờl bal; là nùs nhơm niam bơnĕ ngan “Cau ling Wa Hồ dê”.