Ngai 21/5, Củ tịc Quôk hội ồng Trần Thanh Mẫn lơh broă mờ Duh broă sùm Mpồl duh broă Jơi bơtiàn. Củ tịc Quôk hội đơs sùm, tềng đap jơnau sồr broă lơh dê ngai sơlơ uă, Mpồl duh broă Jơi bơtiàn kờñ pal tam gơl gơ gơs broă lơh pa jat jơnau pơlam jal mhar, jak chài, ngan ngồn; tơl kơnòl broă pal geh tŭ tơngai pơrgon, phan lơh gơs mùl màl mờ cau kong kơnòl loh làng. Củ tịc Quôk hội sồr Mpồl duh broă Jơi bơtiàn rơcang lài git nền bơta geh ngan, di tŭ tă pơgồp jơnau đơs mờ Đảng, Dà lơgar bè ală broă gơ rềng tus tiah làng bol jơi bơtiàn dồ êt nă cau mờ tiah kơh bơnơm. Mờ kung kờñ pal pơgồp bal jơh nùs mờ ală anih lơh broă geh gơnoar jat sền bơta lơh sa - mpồl bơtiàn, ling klàng, sền gàr lơngap lơngai tàm tiah nhàr lơgar, ù tiah kuơmàng; sơlơ tàm tơrbŏ tai ƀòn lơgar, rơcang lài yal broă lơh gàr kơ̆ mpồl tam klac jơi bơtiàn, gàr kơ̆ cíñ trị - mpồl bơtiàn.