Jat jơnau yal, 6 nhai bồ nam, càr Dăk Lăk neh bơsram lơh jat mờ lam lơh niam ală gùng dà broă lơh bơh Đảng, adat boh lam bơh Dà lơgar dê bè ling klàng, sền gàr dà lơgar, broă lơh sền gàr nhàr lơgar; di tŭ lơh ngan ngồn ală broă lơh, broă rơndăp lơh di pal mờ bơta geh ngan tiah do dê.

Jat Đại tá  ồng Lê Văn Hùng, Phó đơng lam, Tă pơgồp jơnau đơs, Gah đơng lam Ling klàng càr Dăk Lăk, càr neh pơgồp bal kơ̆ broă bơtàu tơnguh lơh sa- mpồl bơtiàn mờ lơh kơ̆ kơl jăp sền gàr dà lơgar, lơngăp lơngai. Ală mpồl geh gơrềng neh pơgồp bal tàm sền sơwì ală rơndăp ù tiah, rơndăp broă lơh nàng lơh geh jơnau sồr bơtàu tơnguh, mơkung gàr niam sền gàr dà lơgar. Càr kung lơh jat geh cồng nha ală broă lơh rcang lài kơryan kŭp phan tàm dà lềng tìs mờ adat boh lam (IUU), atbồ kơ̆ mpồl cau, ơhò plung crăp rcang hòi jà tus bal sền gàr gơnoar tờm dà lềng, bồt bơlào; sơlơ tơnguh tai atbồ, sền gàr gơnoar tờm nhàr lơgar, pơgồp bơnah lơh jat geh cồng nha broă lơh tàm cah tiah nhàr lơgar, tồc jrong nhàr mờ lơgar bơyô Campuchia.

Mpồl ling griăp ƀòn mờ mpồl cau rcang lài lòt ling pơn jat tai geh lơh kơ̆. Broă lơh sac rơwah ling geh lơh jat niam, yal loh làng, lơh sir 100% broă jàu mờ mờr 5 rơbô 500 nă làng bol lòt ling. Ală mpồl ling klàng, kwang àng mờ ling sền gàr nhàr lơgar gàr niam pơgồp bal niam tàm broă gàr niam lơngăp lơngai chính trị, rơndăp tăp sèng lơngăp lơngai mpồl bơtiàn, sền gàr ală broă lơh chính trị kwơ màng, mơkung lơh jat niam gơnoar broă tờm tàm broă rcang lài kơryan pleh mờ trồ tiah lơh aniai, jòi cau gơ tìp rềs àr. Đại tá ồng Lê Văn Hùng pà gĭt, ală anih lơh broă, mpồl lơh broă phàu crong càr Dăk Lăk neh lơh tơl làm broă rơndăp lơh, ală gùng dà broă lơh tam lơh, rcang lài tam lơh:

“Ală anih lơh broă, mpồl ling càr bơt bơtàu tơl làm ală broă rơndăp lơh, gùng dà broă lơh tam lơh, crăp rcang tam lơh; di tŭ tam gơl niam, bơtơl di pal mờ ală bơta, kơnòl broă mờ rơndăp cau lơh broă tŭ lơh jat gơnoar atbồ ƀòn lơgar 2 kấp; sùm bơyai lơh pơlam tàp, dùl nùs bal lơh chài ngan ală broă lơh, crăp rcang bơsong di tŭ, geh cồng nha ală bơta gơlik geh. Lam lơh jat broă rơndăp lơh tam lơh “phan kơldìng cang gàr lài tềng hơđang kơlwàng trồ kơ̆ kơnhăp” nàng bơt bơtàu nùs nhơm rcang gàr lài tềng hơđang kơlwàng trồ uă tiah, uă cờn, kơ̆ kơnhăp; hời rơ hời lơh sir broă lơh tam lơh rcang gàr lài mờ rơndeh par ờ geh cau măi”.

Ồng Đào Mỹ, Phó Chủ tịch Anih duh broă Làng bol càr Dăk Lăk pà gĭt, 6 nhai lồi nam 2026, kơnòl broă ling klàng, sền gàr dà lơgar càr mờ broă lơh sền gàr nhàr lơgar gam uă tơngume tờm. Ồng Đào Mỹ sồr ală mpồl ling, mpồl ling phàu crong pơn jat tai bơsram lơh jat, lam lơh geh cồng nha gùng dà broă lơh bơh Đảng, adat boh lam bơh Dà lơgar dê; sơlơ tơnguh tai atbồ, sền gàr nhàr lơgar bơh dà lơgar dê; atbồ kơ̆ mpồl cau, ơhò plung, rơndeh rơndồ drơng broă làng bol, crăp rcang tơrgùm hòi jà sền gàr gơnoar tờm dà lềng, bồt bơlào; lam lơh kràñ cê jơh nùs ală broă lơh rcang lài kơryan kŭp phan tàm dà lềng tìs mờ adat boh lam (IUU); mơkung gàr niam ngan broă dong kờl crăp rcang tam lơh, tơnguh cồng nha pơlam tàp, pơlam tàp lài, lơh geh jơnau kờñ kơnòl broă tàm tơngai pa.

“Sền gròi bơt bơtàu mpồl ling phàu crong mờ anih lơh broă ling klàng càr kơ̆ pràn tơl làm, lơh geh jơnau sồr kơnòl broă tàm tơngai pa. Gàr niam kơ̆ broă lơh ơm gak crăp rcang tam lơh, gàr niam tơnguh cồng nha pơlam tàp, pơlam tàp lài, bơta pơgồp bal đah 3 mpồl jat jơnau pal jat, jat Jơnau lơh nền bơh Chính phủ dê sồ 03 nam 2019”.

Di dơ̆ do, dờp gơnoar bơh Bộ Ling klàng, Ling tiah 5, ồng Đào Mỹ- Phó Chủ tịch Anih duh broă Làng bol càr Dăk Lăk neh jàu Bằng khen ai Bộ trưởng Bộ Ling klàng pà 1 nă cau dồ nă să in; jàu Bằng khen bơh Ling tiah 5 dê pà 2 mpồl cau in, 7 nă cau dồ nă să is neh geh ală cồng nha jak ngan tàm lam lơh jat ală kơnòl broă ling klàng, sền gàr dà lơgar 6 nhai bồ nam 2026.