Kờp tus ngai 12/8, tàm Hìu bơsram ơm sa bic tơn tàm hìu bơsram bàr kâp Buôn Đôn, sàh Buôn Đôn, anih lơh broă geh gơnoar gam sền swì ală bơnah broă jat jơnau sồr. Kờp dŭ, broă lơh rơp geh jàu wơl ai Anih duh broă Làng bol sàh Buôn Đôn in tàm ngai 20/8 do. Gơ wèt mờ Hìu bơsram ơm sa bic tơn tàm hìu bơsram bàr kâp Ia R’vê, khà broă bơt bơtàu neh lơh geh mờr 99%. Tŭ do, bàr pe bơnah broă dềt gam geh jal mhar lơh gơs, kờp dŭ rơp geh sền swì tàm poh tus. Hìu bơsram ơm sa bic tơn tàm hìu bơsram bàr kâp sàh Ia Lốp geh tơngai hơ pơrgon lam lơh lơyài rlau mơya kung neh lơh geh rlau 96% khà broă. Kờp dŭ, hìu bơsram rơp lơh gơs lài mờ ngai 20/8, lam lơh sền swì mờ jàu tơnơ̆ hơ̆ 5 ngai.

Ală Hìu bơsram ơm sa bic tơn tàm hìu bơsram bàr kâp tàm tiah nhàr lơgar càr Dăk Lăk geh sơn đờm lam lơh jat jơnau sồr lơh bơh Bộ Chính trị dê. Do rơp là anih bơsram sră, ơm sa bic bơh mờr 3 rbô 100 nă kơnòm bơsram tàm tiah nhàr lơgar càr Dăk Lăk dê.