Mho ngai 4/8, Duh broă sùm Mpồl duh broă Làng bol càr Dăk Lăk ai jơnau đơs bè ală kơrnoăt, gùng dà broă lơh dong kờl ală hìu bơsram kơnhoàl ù tiah nhàr lơgar lơh broă gơtùi, kơ̆ kơl jăp, jŏ jòng. Tŭ do ală hìu bơsram ơm sa bĭc tơn tàm hìu bơsram ală kâp tàm ală sàh nhàr lơgar càr dê sền bal lơh jăt di tơngai bơ̆t bơtàu, digơlan ai mŭt ngui tàm nam bơsram 2026- 2027. Bulah bè hơ̆, bàr pe broă bơ̆t bơtàu dong kờl, phan ngui măy mŏk, broă rơndăp pơgru, cau lơh broă drơng ơm sa bĭc tơn tàm hìu bơsram, bal mờ kơrnoăt rwah cau bơsram, gùng dà broă lơh dong kờl kung gam kờñ pal pơn jăt tai lơh sir.

Mò Cao Thị Hoà An, Chủ tịch Mpồl duh broă Làng bol càr đơs sùm, bơcri priă lơh hìu bơsram ơm sa bĭc tơn tàm hìu bơsram tiah nhàr lơgar ờ mìng là bơ̆t bơtàu phan bơna lơm mờ pal gàr kơnòm bơsram tiah kal ke geh lòt bơsram, ngui geh cồng nha broă bơ̆t bơtàu; Sồr Anih duh broă Làng bol càr sồr ală mpồl lơh broă gơrềng bal lơh mhar tơngai pơrgon lơh ală hìu bơsram ơm sa bĭc tơn tàm hìu bơsram tiah nhàr lơgar, gờñ lơh sir jơnau rơcăng cih Jơnau lơh nền tàm pơrjum bè gùng dà broă lơh dong kờl kơnòm bơsram mờ ală hìu bơsram ơm sa bĭc tơn tàm hìu bơsram.

Ngai 04/8, Anih duh broă Làng bol càr Gia Lai ai lơh jat broă rơndap lơh rơndap tap sèng, rơndap wơl ală hìu bơsram mầm non mờ pe kâp dà lơgar nàng kờñ tơnguh cồng nha atbồ, ngui mpồl cau pơgru, phan bơna, lơh jat jơnau sồr bơtàu tơnguh bơto bơsram tàm bơta pa. Jat broă rơndap lơh, khà hìu bơsram mầm non mờ pe kâp dà lơgar càr dê rơp gơmù bơh 1 rbô 267 hìu bơsram gam 699 hìu bơsram (hơ̆ là gơmù 568 hìu bơsram). Broă rơndap tap sèng geh lam lơh jat broă rơndap lơh lài, di mờ bơta geh ngan tơl ƀòn lơgar dê; tàm hơ̆, tàm 61 sàh, sơnah ƀòn tiah ƀuơn ƀuài, khà tơrmù hìu bơsram geh rlau 51%, gam 74 sàh, sơnah ƀòn gam wơl tơrmù rlau 37%. Gah Bơto bơsram càr Gia Lai pà git, broă rơndap tap sèng rơp pơgồp bal mờ gơnoar bơsram kơnòm bơsram dê, ngan là kơnòm bơsram tiah kal ke, tiah làng bol jơi bơtiàn dùl êt nă cau.