Mpồl duh broă Làng bol càr Dăk Lăk neh ai lơh jat Jơnau lơh nền sồ 19 sồr broă lơh dong kờl bơtơl gơwèt mờ kơnòm bơsram mờ hìu bơsram ơm sa bĭc tơn tàm ală sàh tiah nhàr lơgar mờ rềp nhàr lơgar. Jat Jơnau lơh nền tàm pơrjum, kơnòm bơsram ơm sa klo ngai geh dong kờl 110 rơbô đông tơl nă oh dùl nhai priă sa klo ngai, kơnòm bơsram ơm sa bĭc tơn geh dong kờl 300 rơbô đông tơl nă oh dùl nhai.

Kơnòm bơsram lòt bơsram ngài hìu gam geh dong kờl priă lòt rê. Mờ kơnòm bơsram kấp dùl, khà dong kờl là 120 rơbô đông pah nhai dilah bơta ngài bơh hìu ơm tus hìu bơsram bơh 4 kơi sồ tus hờ đơm 15 kơi sồ, khà dong kờl là 240 rơbô đông dilah bơh 15 kơi sồ rlau hơđang. Kơnòm bơsram kấp 2 geh ngui khà dong kờl ndrờm bè hơ̆ sơl mờ bơta ngài bơh 7 kơi sồ tus hơđơm 15 kơi sồ mờ bơh 15 kơi sồ rlau hơđang. Tơngai dong kờl ờ uă ir 9 nhai tàm nam bơsram.

Nam bơsram do, kơnòm bơsram, cau bơsram dờng tàm ù tiah càr Dăk Lăk geh kes priă dà lơgar dong kờl 55% khà blơi sră kham kòp ờ sa priă, ndrờm mờ 751 rơbô 410 đồng pah nhai dùl nă cau dùl nam. Dăk Lăk kung kờp dŭ ai pơgăp 41 tơmàn đong blơi sră măi nàng ală hìu bơsram in bơyai lơh ai kơnòm bơsram in yòm.

Bal mờ dong kờl tơn, càr Dăk Lăk tơrgùm bơcri priă lơh phan bơna, ngan là tàm ală ù tiah gam kal ke. Nam bơsram 2026-2027, Dăk Lăk geh tai 3 hìu bơsram ơm sa bĭc tơn 2 kấp tàm sàh tiah nhàr lơgar mờ 1 hìu bơsram ơm sa bĭc tơn 2 kấp tàm sàh rềp nhàr lơgar Ea Rốk geh ai ngui. Ală broă lơh geh bơcri priă lơh ring bal, nàng kờñ lơh geh tiah bơsram, tiah ơm kis ƀuơn ngan ai rlau 3 rơbô 100 nă kơnòm bơsram tiah nhàr lơgar mờ rềp nhàr tiah nhàr lơgar dê.

Mò Lê Thị Thanh Xuân, Kwang Lam bồ Sờh Bơto bơtê mờ Bơsram càr Dăk Lăk, pà gĭt, gah pơn jat tai tơrgùm hòi jà ală bơta pràn bơh priă dimơ tơngai mờ priă bơh ală Broă lơh jơnau kờñ Dà lơgar ai bơto bơtê dê nàng bơcri priă lơh, lơh sir phan bơna hìu bơsram.

“Tềng đăp mat, jơnau sồr ală tiah ai tơl priă tă ngui sùm ai bơto bơtê in. Jat tàm ală bơta ală priă jền do, gah kung sồr ală hìu bơsram ngui geh cồng nha bơta pràn nàng bơcri priă, lơh niam wơl phan bơna mờ măi mok. Bơh hơ̆, gàr niam ală bơta bơto mờ bơsram ai nam bơsram pa in, hời rơ hời tơnguh uă cồng nha bơto bơtê mờ lơh geh jơnau sồr kơnòl broă tàm tơngai tŭ do dê”.