Jăt Sở Nội vụ càr Dăk Nông dê yal, nam bơsram 2023- 2024, jơh gùt càr Dăk Nông ờ tơl 1 rbô 21 nă pơgru, tàm hơ̆ kâp mầm non ờ tơl 235 nă, kâp dùl ờ tơl 324 nă, kâp bàr ờ tơl 260 nă mờ kâp pe ờ tơl 202 nă. Bơta ờ tơl cau pơgru neh lơh gơrềng uă ngan tus broă bơto mờ bơsram, ngan là tàm tiah sar lơgar ngài, tiah jơi bơtiàn dùl êt nă cau. Nàng bơsong ing bơta do, Ủy ƀan Ñân zân càr Dăk Nông pa pơyua Hội đồng Ñân zân càr in sền swì ring bal 622 sră hơ lơh broă ai pơgru in, tơngai kĭ hơ là 12 nhai.

Mò Nguyễn Thị Thu Hường, Kwang ătbồ Sở Nội vụ càr Dăk Nông pà gĭt, bulah ờ tơl rlau 1 rbô nă pơgru mơya mìng dan kĭ 622 sră hơ lơh broă là lơh jăt Kơrnoăt sồ 111 nam 2022 bơh Cíñ phủ dê. Bè jŏ jòng, càr rơ̆p pơn jăt tai dan mờ Dà lơgar nàng bơtơl cau pơgru ai gah bơto bơtê càr dê in, gàr tơl khà jăt jơnau ai bơh adat boh lam dê.