Pơn jăt tai dơ̆ lòt lơh broă tàm càr Gia Lai, drim òr (28/04), Đại tướng Nguyễn Trọng Nghĩa, Kwang geh jơng tàm Ƀộ Cíñ trị, Ƀí thư Đảng Dà lơgar, Củ ñiệm Tổng kụk Cíñ trị Ling klàng Làng bol Việt Nam bal mờ mpồl lơh broă bơh Dà lơgar neh tus còp, pà phan ală hìu nhă geh sră dong kờl, cau geh màng mờ dà lơgar tàm càr do di tơnkah 51 nam Ngai Tơnklàs đah Jum, tơrgùm dùl Dà lơgar.

Tàm dơ̆ tìp măt, mpồl neh jào pà 300 pò phan tus ală hìu nhă geh sră dong kờl, hìu rơƀah, cau lơh broă bal mờ cau lơh broă geh rài kis gơtìp kal ke in. Đại tướng đơs nền, drơng gàr cau geh màng mờ dà lơgar là kơnòl broă cíñ trị geh lơh sùm bơh Đảng mờ Dà lơgar dê, ai tơngŏ nùs nhơm “Hùc dà kah tô dà”, “Sa plai kah cau tam tờm chi” bơh jơi bơtiàn he dê. Mờ sồr kấp ủy, gơnoar atbồ càr pơn jăt tai lơh niam broă kis git jơnau git adăt, sền gròi rơlao tai tus rài kis phan bơna, nùs nhơm bơh ală hìu nhă geh sră dong kờl, pơgồp bal tàm broă tơnguh nùs nhơm pin dờn bơh Làng bol dê, tơnguh mpồl tam klăc gùt jơi bơtiàn.

Kung tàm drim òr (28/04), mpồl lơh broă Dà lơgar bơh ồng Nguyễn Thanh Nghị, Kwang bàng Ƀộ Cíñ trị, Ƀí thư Đảng Dà lơgar, Lam bồ Mpồl Broă lơh dong kờl, broă lơh kwơ màng Dà lơgar lơh kwang lam bồ mpồl neh tus lùp còp, pà phan ai ală hìu bơnhă cíñ sác, hìu bơnhă rơƀah mờ cau lơh broă geh rài kis kal ke tàm sàh Quảng Phú, càr Dăk Lăk. Mpồl neh jàu 80 bơnah phan pà nàng kờñ dong kờl, pơndờm pơnđiang ală cau ờ pràn tàm ù tiah do dê.

Tàm dơ̆ tìp mat, ồng Nguyễn Thanh Nghị jơh nùs lùp còp pràn kơl dang să jan, rài kis làng bol, mơkung pơyoa jơnau pơndờm pơnđiang, tam pà bal bơh đơng lam bồ Đảng mờ Dà lơgar dê tus mờ hìu bơnhă gam uă kal ke. Ồng kơ̆p kờñ ală hìu bơnhă pơn jat tai lơh jat niam nùs nhơm tam klăc bal, lơh ngan lơh broă sa nàng hời rơ hời bè ờs rài kis. Đơs sùm pơlam gùng dà tàm tơngai tus, ồng đơs nền ală kấp, ală gah broă rơ̆p pơn jat tai lam lơh geh cồng nha broă lơh gàr tơl niam rài kis mpồl bơtiàn, gàr tơl niam tơl nă làng bol in drờm geh dờp lèng cồng nha bơtàu tơnguh, ờ gŏ di lời dùl nă cau lơi gơtìp lời wơl bơh ngkời.