Xã Ea Tiêu, kơnhoàl Cư Kuiñ, càr Dăk Lăk tŭ do geh mờr 5 rbô 400 hìu bơnhă gơ wèt 18 jơi bơtiàn ơm kis tàm 21 thôn, ƀòn. Tàm hơ̆, làng bol jơi bơtiàn dùl êt nă cau geh mờr 40%. Tàm ală nam do, cau rƀah tàm ù tiah xã dê neh geh dong kờl 175 nơm hìu jat Kơrnuat 167 bơh Cíñ phủ dê mờ kờp jơh khà priă 6 tơmàn 900 tơlak đông; 72 nơm kơnrồ sơntìl, lơh 4 nơm hìu tam klac dờng.

Đòm jat nùs nhơm tam klac bal, làng bol tàm xã jơh nùs lơh sa, bơtàu tơnguh lơh sa, pơgồp bal bơta pràn bơt bơtàu ƀòn lơgar pa. Kơnờm bơh hơ̆, tus tŭ do, muh mat ƀòn lơgar neh geh uă tam gơl niam, rlau 98,6% khà hìu bơnhă tàm xã geh hìu ơm kơ̆ kơljap, 98% khà hìu bơnhă geh rơndeh măi, rlau 90% khà hìu bơnhă geh ngui dà sàng goh, 100% khà hìu bơnhă ndrờm geh ngui ồs đèng sùm, lơngăp lơngai. Xã geh rlau 4 rbô hìu bơnhă geh dờp tơl khà hìu bơnhă niam chài, 18 thôn, ƀòn geh dờp là thôn, ƀòn niam chài. Ală bơhiàn niam chài bơh yau tàm tơl ƀòn geh prap gàr bè: niam chài cing mồng, broă lơh tàñ ồi kòn cau.

Tàm ngai chờ, tàm sap ntas dròng cing jañ mồng chờ hờp mờ broă lơh đơs crih tamya cèng li la bơta niam chài, ală kwang bàng neh bal mờ gơp kah wơl bơhiàn bơh Mặt trận dà lơgar Việt Nam dê, ñô tơrnờm mờ tus bal ală broă lơh bơh ngai chờ dê, bè: tàm pơrlòng ƀŏ phe, lềt mat dròng cing, sơn đòh ƀàu mờ dŏ che. Geh mat bơh àng drim gờñ tàm tiah tơrgùm bal nàng tus bal ngai chờ, mò H’Bel Knul ơm tàm ƀòn Kram, xã Ea Tiêu đơs: ngai chờ là tŭ nàng làng bol tàm ală thôn, ƀòn tàm xã geh tìp mat, lơh kwèng mờ tàm pơrlòng ală môn tàp pràn să jan bơh yau, lơh gơlik nùs nhơm chờ hờp: “Nùs nhơm ngai chờ dê tơrgùm wil tơl làng bol tus bal tă pơgồp bal bơta chờ hờp, duh hồl ngan. Ală broă lơh ờs mờng bơh yau làng bol kòn cau he dê bè đơs crih tamya, cing mồng, dŏ che, sơn đoh ƀàu, ƀŏ phe den añ kung tus bal jơh lơm tơn”.

Jat ồng Chu Thanh Tấn, Củ tịc Ủy ƀan Mặt trận dà lơgar Việt Nam kơnhoàl Cư Kuiñ pà git, Ngai chờ tam klac dờng jơh gùt jơi bơtiàn neh gơ gơs là broă lơh sùm geh bơyai lơh tàm nhai 11 pah nam tàm kơnhoàl. Bơh hơ̆ neh pơgồp bơnah gàr kơ̆ rlau tai bơta gơ rềng niam bơnĕ đah ală ù tiah làng bol ơm kis. Tàm ngai chờ, ală thôn, ƀòn ndrờm bơyai lơh ală broă lơh mpồl bơtiàn mờ hòi jà bơta tă pơgồp bơh mpồl bơtiàn dê nàng dong kờl ai ală cau geh rài kis kal ke, cau ờ sô ờ soàn in: “Pơndrờm mờ pah nam den nùs nhơm bơyai lơh ngai chờ sơlơ duh hồl rlau, uă thôn bơyai lơh rlau, broă bơyai lơh dờng rlau, niam rlau. Làng bol tus bal gal ngan, geh bơta tàm tơrbŏ bal tŭ ală jơi bơtiàn ơm kis mờ lơh broă tàm kơnhoàl geh bơta tus bal wil tơl, khà tus bal ndrờm bal mờ ală broă lơh gàr lơngăp lơngai rài kis mpồl bơtiàn kung geh ală kâp sền gròi uă rlau”.

Tus bal ngai chờ, ồng Bùi Văn Cường, Kwang gơnoar cih, Kwang atbồ Cơldŭ lơh broă Quôk hội jờng rơ ală cồng nha mờ gơnoar atbồ bal mờ làng bol xã Ea Tiêu neh lơh geh tàm tơngai lài. Ai tơnggŏ bơta pin dờn mờ kơp kờn làng bol pơn jat tai tam klac bal, pin dờn tàm bơta đơng lam bồ bơh Đảng mờ Dà lơgar dê, tơnguh nùs nhơm rơcang ngac, rơcang sơndră mờ kơryan ală kal tam cah ờ rờm mpồl tam klac dờng jơh gùt jơi bơtiàn. Do là bơta đơs nền mờ lơh gơ rề uă nùs nhơm bơh ngai chờ tam klac dờng jơh gùt jơi bơtiàn dê tàm mpồl bơtiàn làng bol ơm kis: “Mờ nùs nhơm chờ hờp chờ hờn ngan bơh gal ngan làng bol ală jơi bơtiàn dùl êt nă cau bơh lơgar Việt Nam bol he dê, mờ nùs nhơm đềt mềr tam klac bal, ngan là tàm tŭ tơngai mờ kơnhoàl Cư Kuiñ là dùl kơnhoàl mờ pa do geh broă ờ niam gơlik geh tàm ngai 11/6. Den tàng nùs nhơm, broă bơyai lơh mờ bơta chờ hờp chờ hờn bơh làng bol kòn cau dê den sơlơ là dùl bơta geh kuơ ngan, bơh hơ̆ sơlơ tơrbŏ kơ̆ rlau tai nùs nhơm tam klac bal đah ală jơi bơtiàn”.

Di dơ̆ do, ồng Bùi Văn Cường mờ ồng Y Thanh Hà Niê Kdăm neh jàu pà priă lơh hìu pơrjum ai thôn 10 xã Ea Tiêu mờ xã Cư Êwi in, tơl nơm hìu kờp priă 300 tơlak đông; jàu pà phan ai ală thôn, ƀòn, hìu bơnhă geh sră dong kờl bơh dà lơgar, cau geh bơngă pin dờn tàm kơnhoàl Cư Kuiñ in. Ủy ƀan Mặt trận dà lơgar Việt Nam kơnhoàl Cư Kuiñ kung jàu priă lơh 9 nơm hìu Tam klac dờng ai ală hìu bơnhă rƀah tàm ală xã in.

Broă bơyai lơh Ngai chờ tam klac dờng jơh gùt jơi bơtiàn tàm ală ƀòn làng bol ơm kis neh gơ gơs là bơta niam ờs mờng, ai broă lơh Mặt trận rê mờ ƀòn làng bol ơm kis, wèt tus tơl hìu bơnhă mờ tơl nă làng bol. Jơnau kờñ bơh ngai chờ dê là nàng bơt bơtàu, lơh kơ̆ kơljap mờ bơtàu tơnguh gơnoar lơh tờm bơh làng bol dê; sơlơ tơnguh bơta pràn bơh mpồl tam klac dờng gùt jơi bơtiàn mờ tơnguh gơnoar broă bơh Mặt trận dà lơgar Việt Nam dê tàm tŭ tơngai pa.