Mờ nùs nhơm lơh broă mhar ngan bơh mpồl cau lơh hìu dê, hìu ơm pa bơh bi Ksor Si (39 sơnam, ơm tàm ƀòn Mái, sàh Ia Hrung, kơnhoàl Ia Grai) rơ hời gŏ loh làng rùp hìu dê. Hìu ơnàng mờr 50 thơk vuông mờ 2 ơdŭ bĭc, dùl ơdŭ wă rò năc. Bi Ksor Si pà gĭt, hìu bơnhă kơ̆p gơn ngan ngai hìu geh mut ơm, nàng hìu bơnhă in geh tiah ơm kơ̆ kơl jăp, rơng nđàih, oh kòn geh tiah bơsram sră: "Hìu yau den lơnggơh, ñhăt dà mìu, sơlo lề jơh rao. Tŭ do geh hìu ơm pa kơ̆ kơl jăp, oh kòn geh tiah bơsram sră. Añ ưn ngài Đảng, Dà lơgar neh dong kờl dong hìu bơnhă añ geh tiah ơm kơ̆ kơl jăp. Tơnơ̆ do geh ală bơta, añ rơ̆p lơh tai hìu bềp mờ hìu um”.

Tàm kơnhoàl Ia Grai, 542 hìu bơnhă rƀah, hìu bơnhă geh sră dong kờl Dà lơgar, cau geh màng mờ Dà lơgar gam geh dong kờl lơh tơn jơh hìu lơh ing. Kờp tus nhai 2 nam 2025, jơh gùt càr Gia Lai neh sơnđờm mut lơh pa mờ lơh niam wơl 1 rơbô 423 nơm hìu, tàm hơ̆ geh 132 nơm hìu neh lơh sir. Ală hìu ơm do lời ai hìu bơnhă geh sră dong kờl Dà lơgar, cau geh màng mờ Dà lơgar, hìu bơnhă rƀah mờ hìu bơnhă pa lik klàs rƀah, pơgồp bơnah bơtàu tơnguh ală bơta tàm rài kis ai uă làng bol kal ke in. Nàng gàr niam tŭ tơngai mut lơh, bơdìh mờ priă jền geh tam pà, ală tiah pơn jat tai hòi jà tă pơgồp bal ngai lơh broă bơh mpồl bơtiàn, mpồl ling phàu crong, hòi jà tă pơgồp bal bơh ală bơta pràn mpồl bơtiàn lơh bal nàng lơh pa mờ lơh niam wơl hìu ơm, is ồn là ală hìu bơnhă gơwèt 2 broă lơh jơnau kờñ Dà lơgar dê.

Càr neh dờp geh bơta dong kờl dờng bơh ală mpồl cau, mpồl lơh sa kă bro mờ anih lơh broă Dà lơgar. Ƀộ Kwang àng neh jàu 231 tơmàn đong dong kờl broă lơh in, tàm hơ̆ 201 tơmàn 301 tơlak đong neh pơyoa tàm mat Kes priă “Tài cau rƀah” bơh càr dê. Bơdìh hơ̆, bàr pe mpồl lơh sa kă bro geh rơndăp broă lơh bơcri priă lơh tàm càr kung dong kờl srơh mờ khà priă mờr 20 tơmàn đong. Ồng Lê Ngọc Quý - Củ tịc Anih duh broă Làng bol kơnhoàl Ia Grai pà gĭt: “Mờ nùs nhơm lơh ngan cíñ trị, bơdìh mờ bơnah priă dong kờl 60 tơlak đong nàng lơh pa mờ 30 tơlak đong nàng lơh niam wơl, bol añ hòi jà tă pơgồp bal, hòi jà làng bol, cau tờm hìu bơnhă, jơi nòi, tă pơgồp, ngui jơh ngai lơh broă bơh ală mpồl ling; mờ ală srơh, phan bơna bơt bơtàu nàng tơnguh uă bă ù ngui, lơh tai broă lơh bơt bơtàu ndai drơng broă lơh sa, ròng phan, bơtàu tơnguh uă rài kis ai hìu bơnhă làng bol in”.

Tàm broă lơh tơn jơh hìu lơh ing tàm càr Gia Lai, mpồl kwang àng mờ mpồl ling klàng geh gơnoar broă tờm. Ờ mìng tă pơgồp bơta pràn jun pơndiang phan bơna, cò bồr bơnàng hìu, lơh dra lơh hìu, mpồl do gam tus bal tơn bơt bơtàu, tìm rơkàng hìu, lơh mhar tŭ tơngai lơh sir ală hìu ơm dê. Bàr pe nă kwang bàng, kwang àng gam tă pơgồp bal priă nhai bơh he dê nàng dong hìu bơnhă rƀah lơh hìu pa. Tàm ală cau do, thiếu tá Lê Đình Hải – Lam bồ Kwang àng sàh Ia Mrơn, kơnhoàl Ia Pa neh tă pơgồp 60 tơlak đong. Lơh jat krơh niam bơh bi dê, kwang bàng, cau ling Kwang àng sàh kung tàm sơm bat tê bal tă pơgồp tai 60 tơlak đong mờ lời tŭ tơngai bơdìh tŭ lơh broă nàng dong làng bol lơh hìu. Thiếu tá Lê Đình Hải pà gĭt:“Bơh kờp sền, mò ơm bal mờ 1 nă sau, mờ 2 nă săt, añ gŏ ală bơta, rài kis bơh mò dê kal ke, den añ neh tă pơgồp jơnau đơs mờ Đảng ủy, Anih duh broă Làng bol sàh nàng dong kờl priă lơh hìu. Mơya mờ gơwèt cau geh lơh là cau ồng (hơ̆ là bơklau mò dê) mơya neh chơ̆t, den kal ke mờ geh dờp dong kờl. Den tàng, añ neh rê mờ cribơyai bal mờ ring bal mờ pơ ùr mờ oh kòn dong kờl lơh ai mò in hìu ơm pa dờng rơng đàih, kơ̆ kơl jăp rlau nàng bè ờs wơl rài kis”.

Jat broă rơndăp lơh, càr Gia Lai kờp dŭ tơn jơh 8 rơbô 485 nơm hìu tàm nam 2025 tàm broă lơh “Tàm sơm bat tê bal tơn jơh hìu lơh ing, hìu ồm sèt ñhăt dà mìu”. Kơnờm bơta lơh jat bơh jơh ală anih lơh broă cíñ trị dê, mìng tàm 2 nhai pa do, uă nơm hìu “5 dùl lơm” – mhar ngan rlau jơh, niam ngan rlau jơh, kơ̆ kơl jăp ngan rlau jơh, kơnhăp ngan rlau jơh mờ ờ uă priă ngan rlau jơh- neh geh lơh sir, cèng wơl bơta chờ hờp ai gĭt nđờ rơhiang hìu bơnhă làng bol in. Ồng Rah Lan Chung – Phó Ƀí thư Tỉñ ủy càr, Củ tịc Anih duh broă Làng bol càr Gia Lai sồr: "Broă lơh tơn jơh hìu lơh ing, hìu sèt ñhăt dà mìu pal lam lơh gàr niam broă yal loh làng, làng bol lơh tờm, ring bal, song dơ pă, kơnhăp mờ geh cồng nha; tơrgùm hòi jà tă pơgồp bal bơh tơl bơta pràn bơh ală anih lơh broă, mpồl lơh broă, mpồl lơh sa kă bro, mpồl cau, cau dồ nă să, mpồl bơtiàn làng bol ơm kis tàm càr mờ bơdìh càr. Mơkung hòi jà làng bol tă pơgồp bal nàng kờñ tơnguh uă bơta niam hìu ơm ai hìu bơnhă làng bol in. Bơdìh hơ̆, pal sùm sồr lơh ngan, lòt sền jat sền, sền sơ wì, ai jơnau bơsram mờng chài, pà khà jờng mờ jờng rơ ală mpồl cau, cau dồ nă să geh cồng nha jak ngan tàm broă lam lơh jat srơh dê”.

Mờ bơta tàm sơm bat tê bal bơh jơh ală anih lơh broă cíñ trị mờ mpồl ling phàu crong, broă lơh tơn jơh hìu lơh ing tàm càr Gia Lai geh lơh mhar tŭ tơngai. Ală hìu ơm ram mhŭ kơ̆ kơl jăp ờ mìng dong bè ờs wơl rài kis lơm mờ gam lơh geh bơnàng jă kơ̆ kơl jăp nàng ală hìu bơnhă rƀah in brồ guh, bơtàu tơnguh lơh sa, pơgồp bơnah bơt bơtàu tiah do ngai sơlơ pas niam.