Dùl àng drim kàl rlô bơkang tàm sàh tiah nhàr lơgar Ia Dom, càr Gia Lai, ùr bơklau bi Kpuih Đin, ơm tàm ƀòn Bi chờ hờp wă rò pơgru atbồ ơdŭ kòn klau dê bal mờ kwang bàng sàh lòt còp hìu bơnhă. Jơnau yal chờ hờp mờ khi geh kơno là oh Ksor Đam geh rơ wah mut bơsram ơm sa bic tơn tàm hìu bơsram ơm sa bic tơn kâp dùl mờ kâp bàr Ia Dom tàm nam bơsram 2026 - 2027 tus do. Hơ̆ là bơta chờ hờp dờng ngan gơ wèt mờ hìu bơnhă rƀah bè bi Đin. Bơh nam bơsram pa, tŭ mut ơdŭ 8, oh Ksor Đam rơp geh bơsram, ơm sa bic tơn tàm hìu bơsram, dong hìu bơnhă bi Đin iang nùs rlau: “Añ gŏ gơ lơh chờ hờp ngan tŭ hìu bơsram dong kờl ai oh kòn in bơsram ơm sa bic tơn. Pơ ùr añ dê den ròng kòn dềt, ai añ den lòt lơh ơpah cau in. Ai kòn bơsram tàm hìu bơsram ơm sa bic tơn nàng geh sền gròi rlau, nàng khi tryăng tryồng bơsram gơ in jak, wă wờng nàng tơnơ̆ do rài kis ờ huan bòl glar”.

Bơta chờ hờp hơ̆ kung mpờl gŏ tàm uă hìu bơnhă tàm ƀòn Bi, sàh Ia Dom. Bi Triệu Thị Say, kòn cau Dao pà git, uă nam do, pah ngai kòn lòt bơsram rê gan gơl gùng jòng tàm Gùng dà lơgar 19 ndrờm là dùl ngai bi kơlôi rơcang kơp gơn. Tŭ git kòn mờr geh bơsram mờ ơm sa bic tơn tàm hìu bơsram pa, jơh hìu bơnhă bi dê ndrờm chờ hờp lơm: “Añ sùm lòt lơh broă gan tềng hơ̆, añ kung ơm rơndeh nàng trăng sền, gŏ chờ hờp ngan. Hìu bơsram geh lơh dờng niam ngan, oh kòn lòt bơsram kung iang nùs rlau. Mut tàm hìu bơsram ơm sa bic tơn là añ ờ gam rơngòt tai, geh pơgru tàm hơ̆, geh cau sền gàr, geh anih sàu sa, ơm nic, hơ̆ sồng sàu sa kung wil tơl rlau”.

Sàh tiah nhàr lơgar Ia Dom geh rlau 9 rbô nă làng bol ơm kis tàm 7 thôn, ƀòn, tàm hơ̆ làng bol jơi bơtiàn dồ êt nă cau geh rlau 34%. Ù tiah dờng ơnàng, uă ƀòn làng bol ơm kis ngài tiah tờm, geh tiah kơnòm bơsram pal lòt mờr 20 kơi sồ hơ̆ sồng tus hìu bơsram. Neh geh uă oh pah ngai lòt tàm gùng dờng 19 mờ khà rơndeh rơndồ uă, pơhìn roh lơngap lơngai lòt rê tàm gùng.Bè hơ̆ den tàng, broă bơt bơtàu hìu bơsram ơm sa bic tơn geh sền là gùng dà bơsong bơta kal ke jŏ jòng tàm tiah nhàr lơgar, bơh bơta ngài ù tiah, bơta lơh sa tus jơnau pơhìn kơnòm bơsram sang tĕ nggùl gùng.

Ồng Nguyễn Văn Tiến, Phó Chủ tịch Anih duh broă Làng bol sàh Ia Dom, càr Gia Lai pà git, sàh geh 272 nă oh bơh ơdŭ 4 tus ơdŭ 9 geh sac rơ wah mut tàm hìu bơsram ơm sa bic tơn. Do uă ngan là kơnòm bơsram gơ wèt hìu bơnhă dờp bơta dong kờl bơh mpồl bơtiàn, kơnòm bơsram jơi bơtiàn dồ êt nă cau gơ wèt hìu bơnhă rƀah, ndrờm bè cau rƀah, kơnòm bơsram kòn đời halà geh hìu ơm ngài hìu bơsram. Bơdìh hơ̆ tai, 876 nă kơnòm bơsram ndai rơp geh ai ơm sa ngai. Sàh kung gam pồ tơl mpồl cau atbồ mờ pơgru, nàng gơtùi wă rò kơnòm bơsram mut bơsram bơh ală ngai bồ nam bơsram pa tơn: “Gơ wèt mờ bơta cau pơgru, lài ngan là ai lài hìu bơsram ơm sa bic tơn in nàng gàr niam broă ai ngui. Dơ̆ 2 là pal gơ wèt tàm ƀằng kâp, khà mờng chài lơh broă bơh pơgru tơl môn bơsram dê. Hòi jà ai lài gơ wèt mờ ală hìu bơsram ơm sa bic tơn là ù tiah mờ hìu bơnhă ơm rềp, gam kơnòm să nàng dong kờl tàm broă atbồ kơnòm bơsram bơdìh tŭ jơ bơsram tàm ơdŭ, klo ngai mờ trồ mang”.

Ồng Phạm Văn Nam, Lam bồ Sờh Bơto bơtê mờ Bơsram càr Gia Lai pà git, tŭ do, Sờh pơgồp bal mờ Anih duh broă Làng bol 7 sàh tiah nhàr lơgar lơh sir ală jơnau lơh nền bơt bơtàu hìu bơsram yal kâp geh gơnoar in sền swì ring bal. Bal mờ hơ̆, gah bơto bơsram sền nền wơl khà kơnòm bơsram, kờp dŭ lài khà pơgru, cau lơh broă, pơgồp bal mờ Sờh broă dơlam is tă pơgồp jơnau đơs rơndap ai tơl mpồl kwang bàng atbồ, pơgru jat jơnau sồr: “Mờ khà pơgru tŭ do, bol hi rơp kờp dŭ pơgồp bal mờ Sờh Broă dơlam is nàng dan mờ Anih duh broă Làng bol càr bơ tơl khà pơgru nàng gàr tơl jat khà neh geh ai, gơtùi drơng broă bơto bơtê. Bè cau lơh broă ròng siam, bol hi kung neh pơgồp bal mờ Hìu bơsram Cao đẳng Gia Lai, tŭ do gam pờ ơdŭ bơto trŭ gơm phan sa nàng geh mpồl cau lơh broă ròng siam drơng ai broă ròng, sền gàr ală sau tàm tơngai tus in”.

Ală ngai rlô bơkang, bal mờ broă lơh 90 ngai mang lơh mhar tơngai hơ pơrgon lam lơh 7 hìu bơsram kòn cau ơm sa bic tơn tàm ală sàh tiah nhàr lơgar đah mat tơngai mut càr Gia Lai, broă lơh rơ wah kơnòm bơsram, rơndap cau lơh broă mờ rơcang ală bơta nàng lơh broă kung gam geh jal mhar lơh gơs. Ală hìu bơsram ơm sa bic tơn tiah nhàr lơgar cèng bal bơta kơp kơnờm bè broă gàr kơnòm bơsram lòt bơsram, tơrmù lơyah bơta yah ngài bơto bơsram đah tiah ƀuơn mờ tiah kal ke. Bơh tŭ do, uă oh dềt jơi bơtiàn dồ êt nă cau rơp geh tai tŭ niam geh bơsram sră tàm bơta niam rlau, lòt jat ală bơta kơp kờñ mờ lơh gơlik gùng tam gơl pa tơnơ̆ do mờ bồ tơngoh bơsram sră.