Ală ngai bồ nhai 7 do, tàm ală broă lơh hìu ơm dong kờl hìu nhă cau geh sră dong kờl bơh mpồl bơtiàn tàm càr Quảng ngãi dê, săp ntas măi bơrlŭ bê tông, săp mŭt tơs, săp rơnđờt òt chi mpong săp sùm. Kwang bàng, cau ling ală mpồl Ling klàng, Kwang àng bal mờ đoàn viên ơruh pơnu bal mờ làng bol tàm ƀòn ndrờm tus bal dong kờl, lơh mhar broă lơh ală hìu nùs nhơm nàng lơh gơs lài mờ ngai 20 nhai 7.

Tơnơ̆ mờr 15 nam bao mờ kis tàm hìu hăt hal, sèt lơm, lŏ Lê Thị Kiều, tàm thôn Xuân Trung, sàh Trà Bồng kung geh dùl nơm hìu kơl jăp. Lŏ Kiều là kòn tờm bơh cau ling kòp tê jê să tài gơrềng bơh sơnơm khih tàm rài tam lơh, să tờm lŏ kung là cau gơtìp gơrềng bơh sơnơm khih tàm rài tam lơh sơl, uă nam do rài kis hìu nhă lŏ kal ke ngan. Khà priă dong kờl pah nhai bơh lŏ dê mìng tơl nàng ngui tàm rài kis, gam broă lơh hìu den lŏ ờ khin kơlôi tus.

Pa do, hìu nhă lŏ Lê Thị Kiều geh dà lơgar dong kờl 60 tơlăk đong bơh broă lơh tơn jơh hìu sèt, hìu ồm ñhăt dà mìu ai hìu nhă cau geh sră dong kờl bơh mpồl bơtiàn in. Bal mờ khà priă prăp gàr uă nam do, ùr bơklao lŏ Kiều neh geh lơh geh hìu pa. “Hìu pa bơh hìu nhă añ dê neh lơh gơs, mơya ờ hềt crăp mpồng, hìu bềp kung ờ hềt lơh gơs. Hìu nhă añ gam lơh ngan jòi priă nàng lơh tai hìu bềp mờ hìu đah đơm. Hìu do mìng geh bàr nă mè mờ kòn añ ơm, lơh ngan nàng gờñ lơh hìu bềp nàng geh hìu trŭ sa nàng kòn ùr in iang nùs bơsram sră. Tŭ do geh hìu pa do là chờ hờp ngan”.

Hìu bơh ồng Hồ Văn Ngoạt tàm thôn Trà Hiệp, sàh Thanh Bồng dê kung gam geh jal mhar lơh gơs sơl. Ồng Ngoạt là kòn tờm bơh cau lơh broă tàm rài tam lơh gơtìp sơnơm khih lơh aniai. Uă nam do hìu nhă ồng kis tàm hìu neh sèt, ờ kơl jăp tai, tŭ lơi kung ngòt pah tŭ trồ mìu càl dờng. Geh Dà lơgar dong kờl 60 tơlăk đong, ồng Hồ Văn Ngoạt càn tai 200 tơlăk đong nàng lơh hìu kơl jăp: “Lài do hìu añ gơtìp ñhăt dà mìu, hìu neh sèt ngan. Tŭ do geh Dà lơgar dong kờl 60 tơlăk đong, hìu nhă tă tai priă tàm broă lơh nàng lơh gơs hìu do, geh hìu ơm niam. Tŭ do kung ưn ngài Dà lơgar neh dong kờl. Geh hìu niam ơm bloh, hìu nhă añ chờ hờp ngan”.

Tàm sàh Thanh Bồng geh 4 hìu nhă geh sră dong kờl bơh mpồl bơtiàn geh tơn jơh hìu sèt, hìu ồm ñhăt dà mìu. Sơn đờm mŭt lơh bơh nhai 5 nam 2026, tus tŭ do, jơh 4 nơm hìu neh lơh geh di pơgăp 70% khà broă. Nàng di tơngai lơh gơs lài mờ ngai 20 nhai 7 jăt jơnau sồr bơh càr Quảng Ngãi dê, sàh do neh lơh ală mpồl dong kờl, hòi jà ală mpồl Kwang àng, Ling klàng, mặt trận mờ ală mpồl lơh broă bal mờ làng bol tus bal nàng sờr hìu lài do, pơn diang phan, tờ bơnàng, dong kờl broă lơh hìu. Ală ngai tus bal dong kờl, neh dong kờl ală hìu tơrmù kal ke uă ngan bè priă tă lơh.

Ồng Hồ Thanh Trường, Phó Chủ tịch Anih duh broă Làng bol sàh Thanh Bồng, càr Quảng ngãi pà git, jơh ală hìu geh dong kờl ndrờm gơwèt mpồl kal ke lơm. Sàh pơlam ală hìu nhă ngui priă geh bơh broă tam tờm keo, ròng phan nàng bơtơl priă lơh hìu; mờ hòi jà tai kwang bàng, công chức, ală cau geh nùs nhơm niam mờ ngui Kes priă Tài cau rơƀah dong kờl tai, dong kờl ală hìu geh tơl priă nàng lơh gơs ală hìu kơl jăp, lơngăp lơngai rơlao: “Anih duh broă Làng bol sàh Thanh Bồng sồr mpồl Kwang àng, Ling klàng pơgồp bal mờ Mặt trận, ală mpồl lơh broă bal mờ mpồl tàm thôn, tàm hơ̆ uă ngan là ală hìu rềp bal nàng dong kờl ală cau geh sră dong kờl bơh mpồl bơtiàn lơh hìu tàm sàh in, bè sờr hìu lài do, pơn diang phan, bràs, sơmăng, tờ bơnàng hìu… nàng lơh mhar tơngai lơh hìu ơm di jăt mờ jơnau sồr bơh càr dê, lơh gơs lài mờ ngai 20 nhai 7 nam 2026”.

Nhai 3 nam 2026, Thủ tướng Chính phủ ring bal gùng dà broă lơh dong kờl tơn jơh hìu sèt, hìu ồm ñhăt dà mìu ai ală oh kòn tờm cau lơh broă tàm rài tam lơh gơtìp sơnơm khih lơh aniai in mờ priă jơnkah bơh Kes priă Tài cau rơƀah Dà lơgar dê. Tơnơ̆ mờ hơ̆, Anih duh broă Làng bol càr Quảng Ngãi tơlik Broă rơndăp lơh, sồr ală tiah mhar sền wơl, lơh jăt mờ nùs nhơm lơh ngan lơh gơs lài mờ ngai 20 nhai 7 nam 2026.

Càr Quảng Ngãi geh 157 nă cau là kòn tờm bơh cau lơh broă tàm rài tam lơh gơtìp sơnơm khih lơh aniai tàm 51 sàh, sơnah ƀòn, tiah is ồn kờñ geh dong kờl bè hìu ơm. Mpồl Đơng lam Ling klàng càr Quảng Ngãi neh lơh geh 74 mpồl mờ 727 nă kwang bàng, cau ling tus dong kờl tơn làng bol lơh hìu. Sờh Bơ̆t bơtàu kung tơlik ală rùp hìu neh geh lơh lài bè hìu ơm, gàr broă lơh kơl jăp hìu mờ gơdờp bal mờ tàm bơta mùl màl bơh tơl tiah dê. Ờ mìng dong kờl lơh hìu ơm, uă tiah tàm càr Quảng Ngãi gam pơgồp bal mờ ală broă lơh ndai bè dong kờl sơntìl phan tam, phan ròng, ai tơl bơta niam nàng dong kờl làng bol geh càn priă sa priă cồng ờ uă bơh ală broă lơh jăt jơnau kờñ dà lơgar dê nàng bơtàu tơnguh lơh sa, rơhời kơl jăp rài kis.