Nggùl nhai 7, hìu pa bơh mò Nguyễn Thị Nhường, tàm sơnah ƀòn Ea Kao neh di tŭ lơh gơs, di tàm dơ̆ tơnkah 79 nam Ngai cau ling sồt să – Cau chơ̆t màng. Cèng tàm să sơnơm khih gơtờp bơh bèp neh geh tŭ tus tam lơh, rài kis mò Nhường kal ke ngan, mìng kơ̆p kờñ geh hìu kơl jăp nàng ơm. “Geh Đảng, Dà lơgar bal mờ ală anih lơh broă, mpồl lơh broă dong kờl hìu nhă lơh geh hìu pa, hìu nhă chờ hờp ngan. Kơ̆p kờñ neh git nđờ nam tŭ do neh geh mùl màl. Do là bơta pràn nàng hìu nhă lơh ngan, pơn đơl ngan, kis niam mờ geh kwơ rơlao”.

Nùs nhơm chờ hờp hơ̆ sơlơ uă rơlao tŭ ală cau tă pơgồp bơta pràn nàng lơh gơs hìu mò in là ală cau ling Wa Hồ dê. Tàm ală ngai do, 10 nă kwang bàng, cau ling Tiểu đoàn Đặc công neh dong kờl hìu nhă mò Nhường tơrmù tơngai lơh mờ tơrmù uă ngan priă tă lơh. Thiếu tá ồng Nguyễn Văn Duẩn, Chính trị viên phó Tiểu đoàn Đặc công 20 pà git: “Tơnơ̆ mờ tŭ dờp kơnòl, bol añ neh sồr jơh ală oh mi pal ai loh nùs nhơm lơh ngan lơh gơs di mờ tơngai neh geh ai, dong kờl mlŏ wa geh hìu ơm kơl jăp, niam. Tơnơ̆ mờ tŭ lơh gơs, mpồl neh tơrgùm siồ siă kloh niam jơh gùt dar nàng hìu nhă mŭt ơm kis niam bơnĕ ngan”.

Di lah gơwèt mờ mò Nhường là bơta chờ bè dùl nơm hìu pa, den gơwèt mờ hìu nhă mò Phạm Thị Ngân tàm sơnah ƀòn Tân An, mìng kờñ geh cơl dŭ ơm ờ gơtìp ñhăt dà pah tŭ trồ mìu neh là bơta chờ hờp dờng màng ngan. Bơklao mò neh geh tŭ tus bal tam lơh, bàr nă kòn klao ndrờm gơtìp sơnơm khih tàm rài tam lơh, lơh aniai. Dùl nă neh chơ̆t, cau kòn gam tai neh rơlao 40 sơnam mơya ờ gơtùi lòt rê, ală bơta tàm rài kis gơrềng jơh mờ mè bèp neh kra.

Cơl dŭ cau kòn ơm kis uă nam do neh gơtìp sèt, ñhăt dà, lơ phong lơh mờ thạch cao neh gơtìp tơrlah, kơl lik hìu gơmŭt dà lơh ồm. Tơnơ̆ mờr 1 nhai, bal mờ boă tus bal bơh mpồl ling, mpồl sền gàr lơngăp lơngai tàm ƀòn lơgar, Mpồl Làng bol lơh broă sa mờ Đoàn ơruh pơnu, hìu neh geh lơh niam wơl ndrờm bal bơh broă sơndră mờ ñhăt dà rơkàng hìu, lơh wơl lơ phong, sơng wơl kơlik hìu tus mờ broă lơh niam wơl ƀlàng hìu. Mò Phạm Thị Ngân ngoh rơngăc pà git: “Geh jơnau yal đah mpồl ling tus lơh niam wơl hìu ơm dong kờl den gơlơh ni sơna ngan, tài hìu nhă kung kòn là ơpah cau chài lơh, mơya tài bơrtơu lòt lơh broă ngài ờ hềt thàn rê, bơtoah ngan geh dà lơgar dong kờl, chờ hờp ngan”.

Jăt ồng Nguyễn Công Thảo, Phó Chủ tịch Anih duh broă Làng bol sơnah ƀòn Tân An yal, sơnah ƀòn tŭ do geh mờr 480 nă cau geh màng mờ dà lơgar. Di tơnkah ngai 27 nhai 7 nam do, bal mờ ală broă lơh “kis git jơnau git adăt”, sơnah ƀòn neh sền wơl mờ geh jơnau sồr dong kờl lơh niam wơl hìu ơm ai ală cau geh tơl bơta in. Mìng is gơwèt hìu nhă mò Ngân, sơnah ƀòn pơn jăt tai lam ală cau geh nùs nhơm niam dong kờl sùm. “Anih duh broă Làng bol sơnah ƀòn neh geh sền wơl jơh, tơrgùm yal mờ geh càr, Dà lơgar kĭ lơh niam wơl ai 2 nă cau in, tơl nă cau geh 30 tơlăk đong nàng lơh niam wơl bàr nơm hìu nàng tơl niam rài kis ai bàr hìu nhă in, rài kis bơh ală cau do lơngăp lơngai rơlao, niam rơlao. Bơdìh hơ̆ tai, Đảng ủy, Anih duh broă Làng bol sơnah ƀòn lòt còp să ală cau geh sră dong kờl bơh mpồl bơtiàn dê, bơdìh mờ priă bơh Dà lơgar mờ càr ai den sơnah ƀòn kung pơn drờm bal kes priă nàng pà phan tơl hìu nhă in geh 200 rơbô đong”.

Gùt càr Dăk Lăk tŭ do geh 42 hìu nhă là kòn tờm bơh cau lơh broă rài tam lơh gơtìp sơnơm khih lơh aniai geh dong kờl lơh hìu ơm, tàm hơ̆ geh 22 nơm hìu lơh pa mờ 20 nơm hìu lơh niam wơl. Nàng lơh gơs lài mờ ngai 27 nhai 7, ală mpồl ling neh dơ̆ lĕ bal lik lơh bơh lồi nhai 5. Jăt ồng Đào Mỹ, Phó Chủ tịch Anih duh broă Làng bol càr Dăk Lăk đơs, broă lơh gơs broă lơh do lài mờ ngai 27 nhai 7 ờ mìng gàr niam di tơngai geh ai mờ gam là phan pà ưn ngài mùl màl ai ală hìu nhă kòn tờm bơh cau lơh broă tàm rài tam lơh gơtìp sơnơm khih lơh aniai in. “Bol añ lơh ngan lơh gơs broă lơh ală hìu do mờ do kung là nàng pơn dờm pơn iang bơnah lơi roh rui bơh cau pròc mhàm ală cau do in mờ ai tơngŏ nùs nhơm Đảng mờ Dà lơgar sùm sền gròi drơng gàr ai ală cau geh màng mờ dà lơgar in”.

Tơl nơm hìu lơh gơs lài mờ ngai 27 nhai 7 ờ mìng dong kờl ală hìu nhă geh hìu ơm kơl jăp rơlao, mờ gam là cơng tàng pà git broă ưn ngài geh ai tơngŏ mờ ală broă lơh mùl màl. Tŭ ală hìu geh lơh gơs, ală roh rui tài tam lơh kung bơnah lơi geh gơmù, nàng ală hìu nhă cèng bơta sồt jê rài tam lơh geh tai nùs nhơm pin dờn mờ bơta pràn pơn jăt tai brồ guh tàm rài kis.