Bơh jơnau yal bơh ală cau tus bal tam lơh kah yau, Mpồl 51, Gah đơng lam Mpồl ling klàng càr Dăk Lăk neh bơyai lơh sền gĭt, lòt jòi mờ rờ tơrgùm geh cồng nha ƀồc ntìng cau ling chơ̆t màng Y Chông Triêk ơm tàm ƀòn Trang Yôk, sàh Krông Nô. Rlau 50 nam tơnơ̆ ngai chơ̆t phi să, ồng hơ̆ sồng geh rê ơm rlô să tàm ƀòn lơgar tờm. Mờ ală kwang bàng, cau ling lơh broă lơh rờ tơrgùm, pah dơ̆ lòt jòi ƀồc ntìng cau ling chơ̆t màng ndrờm là tŭ tơngai kwơ màng. Neh 20 nam đềt mềr mờ kơnòl broă is ồn do, Thiếu tá ồng Nguyễn Chí Tiến, Cau tàm Mpồl K51 kung  ờ gơtùi mpồn geh bơta ngoh rơngăc tŭ mpồl jòi gŏ cau ling chơ̆t màng Y Chông Triêk kềng gah hiòng dà dờng Krông Nô dê.

“Tŭ mờ jòi gŏ di ƀồc ntìng cau ling chơ̆t màng, ngan ngồn bol añ ngoh rơngăc ngan, ờ gĭt đơs bơta lơi tai. Jun geh wa rê là bol añ chờ hờp ngan”.

Ờ mìng cèng wơl bơta pơndờm pơnđiang ai dùl hìu bơnhă in lơm, tơl ƀồc ntìng cau ling chơ̆t màng geh jòi gŏ gam lơh geh tai bơta kơ̆p gơn ai gĭt nđờ rơbô nă cau pròc mhàm kung gam kơ̆p gơn uă ngan jơnau yal cau pròc mhàm he dê tơnơ̆ rài tam lơh. Jat kờp sền, jơh gùt càr Dăk Lăk tŭ do geh 34 ƀlàng tơ̆p ƀồc cau ling chơ̆t màng mờ rlau 15 rơbô 200 bơtô ƀồc; tàm hơ̆ rlau 4 rơbô bơtô ƀồc cau ling chơ̆t màng ờ hềt gĭt jơnau yal kờñ pal đal git muh mat mờ ADN. Bơdìh hơ̆, mpồl lơh broă geh gơnoar sền gĭt kung gam rlau 6 rơbô jơnau yal bè cau ling chơ̆t màng bal mờ uă jơnau yal kờñ pal pơn jat tai sền gĭt loh. Mpồl broă lơh dờng ngan tàm tŭ tŭ tơngai sơlơ jŏ den broă lòt jòi sơlơ kal ke. Tiah tam lơh lài do neh tam gơl, sră nggal ơn prap ờ tơl bơta ring bal, cau tus bal tàm rài kah yau ngai sơlơ dồ ết, tàm tŭ phan bơna măi mok ờs ngui mờ priă jền drơng kơnòl broă gam ờ hoan geh.

Bulah bè hơ̆, ală kal ke hơ̆ ờ gŏ lơh dơrcul nùs ală cau ling lơh kơnòl broă kah ưn ngài dê ờ. Tàm kàl prang nam 2025- 2026, Mpồl K51, Gah đơng lam Mpồl ling klàng càr Dăk Lăk neh sơr lèt gan ù tiah kal ke sơbơng roh tàm càr Mondulkiri (lơgar Bơtau Campuchia), tơrgùm jơnau yal, lòt sền ù tiah mờ tơrgùm geh 27 ƀồc ntìng cau ling chơ̆t màng dong kờl is, cau gĭt wă jrô broă lơh Việt Nam chơ̆t phi să tàm ù tiah lơgar bơyô dê.

Tơnơ̆ dơ̆ iês, tơ̆p ƀồc ală cau ling chơ̆t màng geh jun rê tàm lơgar, bồ nhai 6 pa do, kwang bàng, cau ling Mpồl K51 pơn jat tai lòt gùng lơh jat Broă lơh dờng 500 ngai mang. Bơh jơnau yal bơh làng bol mờ ală cau tus bal tam lơh dê, mpồl ling neh pơgồp bal mờ ală tiah bè Krông Bông, Tây Sơn, Chư Prao mờ Krông Nô lòt jòi, rờ tơrgùm geh tai 6 ƀồc ntìng cau ling chơ̆t màng. Jat Đại tá ồng Đỗ Văn Thiệu, Chính trị viên Mpồl K51, Gah đơng lam Mpồl Ling klàng càr Dăk Lăk, bơh ngkời tơl ƀồc ntìng cau ling chơ̆t màng geh jòi gŏ dê là gĭt nđờ ngai nhai jơh nùs lơh ngan lòt jat tơl jơnau yal, tơl tềl lời wơl gam jơng kah wơl bơh rài tam lơh dê.

"Jòi geh ală wa là kal ke uă ngan. Oh mi sền gĭt gam jơnau yal là gam lòt jòi. Bulah mìng geh 1% kơ̆p kơnờm kung jơh nùs lơh ngan lơh tus gùng tus dà sơl. Hơ̆ là kơnòl mơkung là nùs nhơm bơh ală cau ling tŭ do dê gơwèt mờ ală rơnàng lòt lài”.

Ndrờm bal mờ broă lơh lòt jòi, Dăk Lăk gam ai mẫu sinh phẩm, lơh sồ jơnau yal ală bơtô ƀồc cau ling chơ̆t màng nàng drơng broă sền gĭt ADN. Tơl mẫu sinh phẩm geh ơn prap wơl di mờ jơnau sồr, tơl ală jơnau yal geh sền gĭt tơl làm rơ̆p pờ tai tŭ tơngai đal gĭt muh mat ai ală cau ling chơ̆t màng gam ờ hềt gĭt geh jơnau yal. Jat Đại tá ồng Ksơr Lành, Phó Chính ủy Gah đơng lam Mpồl Ling klàng càr Dăk Lăk, nàng Broă lơh dờng 500 ngai mang lơh geh cồng nha, bơdìh mờ bơta lơh ngan bơh ală mpồl lơh kơnòl broă dê, bơta kwơ màng là hòi jà bơta tus bal bơh gùt mpồl bơtiàn, ngan là ală cau ling yau, cau tus bal tam lơh kah yau mờ làng bol dê tàm broă yal jơnau yal.

 "Bol añ gam lam lơh mblàng yal nàng kwang bàng, làng bol in wă loh gơtha bơta gơ jal ngan bơh Broă lơh dờng 500 ngai màng bè lòt jòi, rờ tơrgùm, đal gĭt muh mat ƀồc ntìng cau ling chơ̆t màng dê. Bơh hơ̆, yal uă rlau ală jơnau yal kwơ màng nàng drơng broă lơh lòt jòi, rờ tơrgùm mờ đal gĭt muh mat ƀồc ntìng cau ling chơ̆t màng dê”.

Tam lơh neh jŏ ngan mơya gùng lòt lòt jòi ală cau neh chơ̆t phi să kung gam ờ hềt jơh. Broă lơh dờng 500 ngai mang ờ mìng là dơ̆ ntoăt pơrlòng mờ tŭ tơngai nàng kờñ jun ală cau ling chơ̆t màng gam ơm bĭc wơl tàm tiah tam lơh rê wơl mờ Dà lơgar tờm, ƀòn lơgar tờm lơm mờ gam là bơta tàm pơr dờn nùs nhơm “Hùc dà kah tô dà” mờ ală broă lơh geh ngan, kơ̆ ngan mờ geh kơnòl bơh jơh ală anih lơh broă chính trị mờ jơh gùt mpồl bơtiàn dê. Tài bơh bơta kah ưn ngài wil tơl ngan rlau jơh là jun ală cau neh chơ̆t phi să rê wơl mờ hìu bơnhă mờ geh hòi di mat he dê.