Jăt Sờh Bơto bơtê mờ Bơsram càr Khánh Hoà yal, tŭ do jơh gùt càr geh rlau 64 rbô nă kơnòm bơsram jơi bơtiàn dồ êt nă cau, tàm hơ̆ kâp dùl rlau 28 rbô nă oh. Is kơnhoàl ù tiah đah Jum càr (ù tiah càr Ninh Thuận yau), geh rlau 60% khà kơnòm bơsram kâp dùl là cau jơi bơtiàn dồ êt nă cau.

Mò Lê Thái Trường Thi, Phó Kwang Lam bồ Sờh Bơto bơtê mờ Bơsram càr Khánh Hoà pà gĭt, lài do tài priă rề dia gam ờ hềt uă, càr Ninh Thuận yau mìng lam lơh geh bàr pe broă dong kờl bè dong kờl phe ai kơnòm bơsram ơm sa ngai tàm hìu bơsram mờ priă dong kờl bơsram ai kơnòm bơsram jơi bơtiàn dồ êt nă cau in, tàm tŭ uă broă dong kờl krơi is ndai ờ hềt geh lơh wil tơl. Tơnơ̆ tŭ tơrgùm dùl bàr càr bơh ngai 1/7/2025, broă lam lơh ală broă dong kờl ndrờm bal ờ hềt lam lơh di tŭ. Mò Lê Thái Trường Thi, yal:

“Broă lam lơh Jơnau lơh nền tàm pơrjum ring bal bal rơ̆p gam uă broă gơrềng tài gam priă jền tă, jơnau lơh nền. Tài gơrềng tus bơto bơsram 2 ƀùi dùl ngai, pơgru, phan bơna, pà dong kờl sền gàr…uă bơta gơrềng tus broă sàu ngai bơh ală sau dê. Gam uă ngan kal ke. Tiah Ninh Thuận yau uă tiah kung gam ờ hềt gơtùi lơh jăt bơto bơsram 2 ƀùl dùl ngai sơl”.

Tơnơ̆ yal bơh VOV dê bè broă kơnòm bơsram kơnhoàl ù tiah đah Jum càr Khánh Hoà ờ hềt geh dờp broă dong kờl sa ơm sa ngai tàm hìu bơsram, Anih duh broă Làng bol càr Khánh Hoà pà gĭt neh jàu Sờh Bơto bơtê mờ Bơsram neh đơng lam kờp sền nền wơl jơh ală broă dong kờl bơto bơtê bàr ƀòn lơgar lài do, bơh hơ̆ dan lơh ală jơnau lơh nền tàm pơrjum pa yal Mpồl duh broă Làng bol càr in. Tơngume tơrgùm tàm ală broă dong kờl kơnòm bơsram tiah kal ke bè priă dong kờl bơsram ai kơnòm bơsram jơi bơtiàn dồ êt nă cau in, dong kờl priă pal tă bơsram, broă lơh dà toh hìu bơsram, bal mờ ală broă dong kờl ơm sa ngai tàm hìu bơsram mờ lơh niam wơl bơta bơsram ai kơnòm bơsram tiah làng bol jơi bơtiàn dồ êt nă cau in. Broă lơh ală jơnau lơh nền tàm pơrjum pa nàng kờñ tơrmù bơta ờ ndrờm bal dờp broă dong kờl đah ală tiah, kờñ kơnòm bơsram tàm jơh gùt càr Khánh Hoà tơnơ̆ tơrgùm dùl geh dờp bơta bơsram mờ sền gàr pràn kơldang niam rlau.

Ồng Nguyễn Thanh Hà, Phó Củ tịc Anih duh broă Làng bol càr Khánh Hoà pà gĭt, ală jơnau lơh nền tàm pơrjum digơlan rơ̆p geh yal Mpồl duh broă Làng bol càr Khánh Hoà in tàm dơ̆ pơrjum tus, tơnơ̆ hơ̆ lam lơh ndrờm bal tàm jơh gùt càr, is ồn ai lài tiah jơi bơtiàn dồ êt nă cau mờ tiah gam uă kal ke in.

“Broă dong kờl sàu ngai, ơm sa ngai tàm hìu bơsram ai kơnòm bơsram jơi bơtiàn dồ êt nă cau in cèng wơl cồng nha niam ngan. Dong ală oh bơsram sùm, dong kờl ai ală oh in tàm lòt bơsram, dong kờl ală hìu bơnhă gam kal ke. Bơh hơ̆, dong ală oh tơngguh tai phan sa tơl pràn, pơgồp bơnah bơtàu tơngguh tơl làm, geh pràn kơldang nàng pơn jăt tai lơh jăt jơnau kơ̆p kờñ bơh he dê”.