Ală ngai do, bal mờ ală tiah ndai tàm tiah Tây Nguyên dê, xã tiah nhàr lơgar Thuận Hạnh, kơnhoàl Dăk Song, càr Dăk Nông, gam hô hơng tàm tơngai pĭc plai kơphê. Tiah nhàr lơgar ngài ngan, cau lơh broă apah pĭc kơphê tơrgùm uă, mơya tàm do ờ gơlik geh ală rềs àr mpồl bơtiàn. Bi Nguyễn Thị Trang, ơm tàm thôn Thuận Bắc, xã Thuận Hạnh, kơnhoàl Dăk Song pà gĭt:  “Tŭ mut tàm tơngai pĭc plai kơphê, tiêu kờñ apah cau lơh broă den bol añ pal yal tiah ơm kis ing mờ kwang àng xã halà pôs đồng ling sền gàr tiah nhàr lơgar in. Mờ dilah geh cau krơi mut tàm do den bol añ rơ̆p yal ai Pôs đồng ling sền gàr tiah nhàr lơgar rềp ngan rlau jơh in”.

Jat kềng gah gùng tiah nhàr lơgar jòng 20 kơi sồ gơwèt xã Thuận Hạnh geh uă ngan mìr bơh làng bol dê neh tam phan bơh jŏ ngan rao. Bi Y Quyết, kòn cau M’nông, ơm tàm ƀòn Sapa, xã Thuận An, kơnhoàl Dăk Mil, lơh kơphê tàm tiah nhàr lơgar Thuận Hạnh đơs là, tơl nă làng bol tŭ lòt lơh broă tàm mìr drờm gĭt wă bal mờ mpồl ling sền gàr tiah nhàr lơgar sơm bat tê bal sền gàr gùng tiah nhàr lơgar, jrong nhàr lơgar dê: “Hìu bơnhă añ geh mìr tàm do, mờ geh dùl jrong nhàr lơgar tàm mìr tơn. Pah tŭ lòt lơh broă den añ kung wàs rŭ rơm  jì nhơ̆t tàm gùt dar jrong nhàr lơgar dê. Mờ dilah sền gŏ cau krơi mut tàm tiah nhàr lơgar den bol añ rơ̆p yal ai mpồl ling sền gàr tiah nhàr lơgar in gĭt. Mpồl ling sền gàr tiah nhàr lơgar lòt sền sùm den bol añ kung iang nùs lơh broă tàm suơn tàm mìr tàm tiah do dê”.

Ai bi Nguyễn Văn Tuynh den đơs là, mờ bơta tam klăc bal bơh mpồl ling sền gàr tiah nhàr lơgar dê, lơh niam broă lơh mblàng yal jơnau, hòi jà làng bol tàm tiah nhàr lơgar sùm gĭt wă tus bal sền gàr lơngap lơngai rơndăp tăp sèng, sền gàr gơnoar tờm kơnhoàl ù tiah tiah nhàr lơgar bơh Dà lơgar dê: “Tàm do là tiah gùng kềng tiah nhàr lơgar dê, den tŭ mờ he gơ lơh geh ală bơta krơi lơi, bè là geh cau krơi mut tàm do, den he rơ̆p yal mơ tơn ai anih ơm gak halà yal mơ ai pôs đồng in tơn. Đơs bal là gĭt gơ̆p đah pôs đồng ling sền gàr tiah nhàr lơgar mờ làng bol tàm do den niam ngan”.

Ù tiah tiah nhàr lơgar Thuận Hạnh geh 13 jơi bơtiàn oh mi ơm kis bal. Nàng bơt bơtàu nùs nhơm rcang lài sền gàr tiah nhàr lơgar jơh gùt làng bol ngai sơlơ kơ̆ kơl jăp, Pôs đồng ling sền gàr tiah nhàr lơgar Dăk Song neh tă pơgồp jơnau đơs mờ bal mờ gơnoar atbồ tiah do tơlik mat mờ lơh sùm broă lơh 9 mpồl atbồ is gùng tiah nhàr lơgar, jrong tiah nhàr lơgar mờ 11 mpồl atbồ is sền gàr lơngap lơngai, rơndăp tăp sèng thôn dê. Kơnờm geh bơta sơm bat tê bal bơh làng bol dê, mờ ală nam rềp ndo, tàm ù tiah Thuận Hạnh ờ gĭt gŏ cau lơi mut mờ lik tàm lơgar tìs mờ kơrnoat boh lam.

Jat Trung tá Lương Đình Hùng, Cíñ trị viên Pôs đồng ling sền gàr tiah nhàr lơgar Dăk Song, càr Dăk Nông, gĭt nền sền gàr kơ̆ kơl jăp tiah nhàr lơgar ờ mìng là kơnòl broă bơh mpồl ling sền gàr tiah nhàr lơgar dê lơm mờ gam là kơnòl broă bơh jơh gùt làng bol, pal jat tàm bơta pràn bơh làng bol dê. Tam klăc bal mờ làng bol, mpồl ling sùm sền gròi broă lơh sền gàr niam rài kis mpồl bơtiàn in, “sa bal ơm bal lơh bal” dùl nùs bal mờ làng bol tàm tiah nhàr lơgar dê. Mơkung lơh niam broă lơh tă pơgồp jơnau đơs, bal mờ kấp ủy, gơnoar atbồ tiah do lơh pràn srơh jơh gùt làng bol tus bal sền gàr gùng tiah nhàr lơgar, jrong nhàr lơgar, ngan là gơwèt mờ ală hìu bơnhă ơm kis halà ù lơh sa rềp mờ tiah nhàr lơgar. Jat Trung tá Lương Đình Hùng, đơs:“Bol añ gĭt nền bơdìh mờ ală broă lơh lơh broă sền gàr tiah nhàr lơgar den mpồl ling pal kơdìng tàm mpồl làng bol, làng bol là cau tờm tàm broă atbồ sền gàr tiah nhàr lơgar dê, mpồl ling sền gàr tiah nhàr lơgar là mpồl ling tờm ờs drơng lơh kơnòl broă. Pah nam den mpồl ling pơgồp bal mờ gơnoar atbồ xã lam lơh uă broă lơh niam chài, đơs crih tam ya, tàp pràn să jan, mờ pơrjum sền wơl 1 nam lơh jat srơh jơh gùt làng bol sền gàr lơngăp lơngai gơnoar tờm tiah nhàr lơgar, nàng bal mờ làng bol lơh jat niam kơnòl broă sền gàr gơnoar tờm lơngap lơngai tiah nhàr lơgar tàm tiah do dê”.

Kwang đơng lam bồ Pôs đồng ling sền gàr tiah nhàr lơgar Dăk Song pà gĭt tai, “Jơh gùt làng bol tus bal sền gàr gơnoar tờm kơnhoàl ù tiah, lơngăp lơngai tiah nhàr lơgar tàm bơta pa” pal geh pơgồp bal mờ srơh tàm pơrlòng kờñ gơboh Dà lơgar mờ bơt bơtàu ƀòn lơgar pa, sơlơ bơtàu tơnguh lơh sa, bơtàu tơnguh rài kis làng bol dê. Tàm tơngai tus mpồl ling rơ̆p pơn jat tai pơgồp bal niam mờ kấp ủy, gơnoar atbồ ală tiah, ală ƀan, ngàñ, mpồl cau mblàng yal, hòi jà, dong kờl làng bol bơtàu tơnguh lơh sa- mpồl bơtiàn, tơn jơh jơgloh tơrmù rƀah, pơgồp bơnah bơt bơtàu rài sền gàr Dà lơgar jơh gùt làng bol dê pràn kơl dang, kơ̆ kơl jăp.