Tàm sàh tiah nhàr lơgar Ia Chia, ală ngai do, nùs nhơm rcang ai dơ̆ tĕ khà geh bơyai lơh gơ jal ngan. Bơh drim gờñ, kwang bàng, cau ling Pôs đồng ling sền gàr tiah nhàr lơgar Ia Chia neh geh mat tàm ală thôn, ƀòn, pơgồp bal mờ ală tiah mblàng yal, hòi jà làng bol bè kơnòl pal lơh sền gàr gơnoar tờm kơnhoàl ù tiah, lơngăp lơngai tiah nhàr lơgar Dà lơgar dê; gơnoar mờ kơnòl broă bơh làng bol dê tàm dơ̆ tĕ khà. Ồng Phạm Văn Phúc, Ƀí thư Ci ƀộ ƀòn Kom Yố, sàh Ia Chia pà gĭt, bơh tơl dơ̆ mblàng yal, làng bol ờ mìng wă loh làng rlau tai gơnoar kwơ, kơnòl broă bơh he dê lơm mờ gam geh tai bơta pin dờn tàm bơta đơng lam bơh Đảng, bơta đơng lam bơh gơnoar atbồ tiah do dê:“Tus tơngai tŭ do neh mblàng yal dơ̆ tĕ khà geh 3 dơ̆, tŭ do tàm thôn, ƀòn, mpồl tĕ khà sồ 5 neh lơh sir bè broă lơh lĭp sră cau tĕ khà. Ngai tĕ khà di ngai 15/3/2026 den neh mblàng yal jơh làng bol in gĭt ală tơngume tàm broă lơh tĕ khà rao”.

Tàm mpồl bơtiàn, gơnoar bơh ală kra ƀòn, cau geh bơngă pin dờn pơn jat tai lơh jat, mblàng yal tơn bè bơta gơtha dơ̆ tĕ khà dê, hòi jà làng bol ngăc ngar ngan rơ wah cau ala mat di pal, mơkung tơnguh uă bơta rcang ngăc tềng đap ală jơnau đơs blăc pơrlồm, tam cah is mpồl tam klăc dờng jơi bơtiàn. Kra ƀòn ồng Rơ Châm Chích, ơm tàm ƀòn Beng, sàh Ia Chia pà gĭt:“Să tờm añ đơs sùm uă broă nàng làng bol in wă, nàng ngăc ngar ngan rơwah ală cau geh nùs nhơm niam, geh bồ tơngoh jak chài, mờ jơh nùs jơh tồr mờ broă lơh nàng rcang ai làng bol in. Añ là ù tiah sàh tiah nhàr lơgar den tàng kờñ pal rcang ngăc ngan tềng đăp ală jơnau jòi kai lơh gơlik bơta tam gơl ring lơngai mờ lơh sồr lồng sơr làng lơh gơ lừ bơh ală mpồl cau gơ jrañ kơ uềng, ờ iăt, ờ jat, pal lơh jat niam ală broă gùng dà broă lơh bơh Đảng, adat boh lam bơh Dà lơgar mờ ală jơnau sồr bơh ală tiah dê”.

Thiếu tá Nguyễn Thanh Bảo, Cíñ trị viên Pôs đồng ling sền gàr tiah nhàr lơgar Ia Chia pà gĭt: jat nền jơnau sồr lơh bơh kấp hơ đang dê, mpồl ling tus tơn tàm tơl hìu bơnhă làng bol nàng cribơyai, bơto pơlam ngan ngồn, dong làng bol gĭt wă gơtha, bơta kwơ màng bơh dơ̆ tĕ khà dê; tơnguh uă nùs nhơm rcang ngăc, gàr kơ̆ mpồl tam klăc dờng jơh gùt jơi bơtiàn tiah nhàr lơgar:“Tơnguh uă bơta gĭt wă bơh làng bol dê nàng gĭt wă loh làng bè jơnau kờñ, gơtha, tơngume bơh dơ̆ tĕ khà. Bơh hơ̆ làng bol ngăc ngar rơ wah ală cau ala mat geh tơl nùs nhơm, bơta pràn jak, ala ai jơnau đơs bơh làng bol tàm ù tiah do dê, is ồn ù tiah tiah nhàr lơgar. Làng bol kung tơngŏ geh nùs nhơm lơh ngan kung bè bơta tam klăc bal, làng bol lơh tờm tàm sră đùh bơh he dê. Bol añ mblàng yal nàng làng bol in tơnguh uă bơta gĭt wă rcang ngăc, lơh jat niam ală gùng dà broă lơh bơh Đảng, adat boh lam bơh Dà lơgar mờ rcang lài kơryan ală broă lơh bơh mpồl cau gơ jrañ kơ uềng, pơrlơ̆ dră, tam cah is mpồl tam klăc dờng jơi bơtiàn dê”.

Sàh Ia Chia neh lam lơh 6 mpồl lơh broă tĕ khà tàm 10 thôn, ƀòn; pồ tơl ală mpồl dềt yal tơngĭt jơnau, mblàng yal jơnau, gàr niam lơngăp lơngai rơndăp tăp sèng, bơsong jơnau yăl, jơnau yă... Mờ rlau 70% khà kờp làng bol là làng bol jơi bơtiàn dồ ết nă cau, bơta gĭt wă ờ ring bal, broă lơh mblàng yal geh sền gĭt là kơnòl broă pal lơh tờm, nhăp nhar, ƀuơn wă, rềp mờ bơta geh ngan. Ồng Nguyễn Công Hòa, Củ tịc Anih duh broă Làng bol sàh Ia Chia pà gĭt:“Ală mpồl dềt geh broă rơndăp lơh, geh kơrnoat pal jat, geh tam jàu kơnòl pal lơh ai tơl nă cau in. Ală mpồl pơgồp bal, geh mpồl ling sền gàr tiah nhàr lơgar, Kwang àng, Mpồl đơng lam ling klàng sàh... neh pơrjum, tàm jàu kơnòl pal lơh nàng gàr niam lơngăp lơngai rơndăp tăp sèng lài mờ tŭ, tàm tŭ mờ tơnơ̆ dơ̆ tĕ khà Quôk hội khoă XVI mờ Mpồl duh broă làng bol ală kấp tơngai lơh broă bơh nam 2026-2031 geh niam bơnĕ mờ gàr niam ngan bè lơngăp lơngai rơndăp tăp sèng tàm ù tiah sàh tiah nhàr lơgar dê”.

Tŭ tiah nhàr lơgar lơngăp lơngai, nùs nhơm ring bal, tơl nơm sră đùh tiah lam lài sơlơ geh tai bơnah geh kwơ. Tơl nơm sră đùh tiah nhàr lơgar ờ mìng là bơta sac rơwah cau ala mat lơm mờ gam là bơta đơs nền gơnoar tờm, là tềl tơngŏ niam ngan bơh mpồl tam klăc dờng jơh gùt jơi bơtiàn dê. Bơh bơta mut lơh bal dơ̆ lĕ bal bơh jơh bal ală anih lơh broă cíñ trị bal mờ nùs nhơm geh kơnòl bơh tơl nă làng bol tiah nhàr lơgar dê gam lơh geh bơnàng jă kơnhăp kơ̆ nàng Ngai chờ dà ia brê bơnơm dà lơgar geh bơyai lơh lơngăp lơngai, làng bol lơh tờm, di mờ adat boh lam.