Sàh tiah kơh bơnơm A Vương là 1 tàm 3 tiah bơyai lơh broă lơh kham kòp, pà sơnơm ờ sa priă dong làng bol rƀah in. Pơgăp mờ do bàr pe nhai, tiah kơh bơnơm do gơtìp mìu dờng dà tih dà lìu tam cah jơh lơm, rài kis gơtìp sơr lồng sơr làng. Bơh drim gờñ, gĭt nđờ rơhiang nă làng bol rƀah kòn cau Cơ Tu neh lòt tus Hìu lơh broă Anih duh broă Làng bol sàh nàng dờp phan pà mờ kham kòp, dờp sơnơm ờ sa priă. Ală ồng kra, mò kra, kơnòm dềt, cau ùr geh ală, y, ƀák sìh ală hìu sơnơm kơnă dŭt ndơl tàm ƀòn dờng Đà Nẵng jơh nùs kham ală bơta kòp, bè: kòp gơguh gùng mhàm, tàm dơlam să, gùng tơdih phan sa, rơnồng dờ, ntìng, kồ ntìng, măt... Làng bol geh bơto pơlam, pà sơnơm ờ sa priă nàng sơm kòp, rcang lài kòp mờ tơnguh uă bơta pràn kơl dang să jan dê. Bi A Lăng Thị Hiềm, ơm tàm thôn Ta Lang, sàh A Vương gơ lơh ram nùs ngan:“Bol añ ưn ngài uă ngan mpồl neh tus jàu pà phan ai jơh ală làng bol tàm do in. Geh mpồl tus kham kòp, làng bol tàm do chờ hờp ngan, gơ boh gơbài nàng wă ò sa tềp ram mhŭ”.

Tus bal broă lơh do geh rlau 100 nă y, ƀák sìh lam lài gah broă, Kwang lam bồ, Phó Kwang lam bồ ală Hìu sơnơm kơnă dŭt ndơl tàm Đà Nẵng dê; Lam bồ, Phó Lam bồ ală Gah gơwèt Hìu sơnơm Đà Nẵng, Hìu sơnơm Ung bướu Đà Nẵng, Hìu sơnơm deh dùh kơnòm dềt, Hìu sơnơm Mắt Đà Nẵng, Hìu sơnơm Klờm soh; Hìu sơnơm Ling klàng 17; Hìu sơnơm C, Mpồl Cau lơh sơnơm kơnòm să ƀòn dờng Đà Nẵng mờ bàr pe Hìu sơnơm tàm tiah do dê.

Tus bal broă lơh do, ală hìu sơnơm kơnă dŭt ndơl tàm Đà Nẵng neh ai ală y, ƀák sìh jak, geh uă mờng chài rơ̆ ru cèng jat bal uă măi mok, sơnơm tơm ƀa kwơ màng mờ pa ngan bè măi siêu âm, điện tim, măi cồp X.Quang ntrờn lam bă tiah... Is ồn, Gah Đơng lam Ling tiah 5 mờ ală Hìu sơnơm tus bal broă lơh do neh dong kờl rlau 1 rơbô ală bơta sơnơm, 300 yô krơh mat tar sền ngài mờ gơnơng mat krơh nàng pà ai làng bol tus kham kòp gah is ồn in. Ƀák sìh ồng Phạm Minh Huy, Phó Kwang lam bồ Gah sồt să lơh niam wơl să jan Hìu sơnơm Đà Nẵng gơ lơh ram nùs tŭ tus bal broă lơh geh kwơ ngan do:“VOV tiah tàm gùl lơgar mờ Mpồl cau lơh sơnơm kơnòm să ƀòn dờng Đà Nẵng pơgồp bal mờ jơh ală hìu sơnơm tàm jơh gùt ƀòn dờng Đà Nẵng bơyai lơh broă lơh “Jàu pà phan Sa tềp nam Ơseh 2026- Tam klăc bal Đà Nẵng, lơh gơrề uă bơta kờñ gơboh” geh kwơ uă ngan. Bol añ rơ̆p sùm lòt bal mờ broă lơh nàng geh bơta lơh gơ rề uă pơn jat tai”.

Tàm broă lơh do, Mpồl bơyai lơh neh jàu 1 rơbô 300 bơnah phan pà, tơl bơnah phan 600 rơbô đông pà làng bol kal ke tàm ală sàh tiah nhàr lơgar Hùng Sơn, A Vương, cau lơh phan geh rài kis kal ke gam lơh broă tàm Tiah Măi mok pa mờ ală tiah lơh sa mờ măi mok Đà Nẵng. Mìng tàm dùl ngai, broă lơh neh kham kòp gah ờs mờng tơnguh uă, pà sơnơm ờ sa priă dong 600 nă làng bol tàm sàh A Vương in; 500 nă cau lơh phan geh rài kis kal ke tàm Tiah Măi mok pa mờ ală tiah Lơh sa mờ măi mok Đà Nẵng; kham sac rơwah kòp gùng mhàm plai nùs ai 500 nă kơnòm dềt mầm non, kấp 1 tàm hìu bơsram kấp 1 Ba Lế, sàh A Vương, ƀòn dờng Đà Nẵng. Kờp jơh khà priă pà phan tàm broă lơh do dê là pơgăp 1 tơmàn 500 tơlak đong.