Neh geh kơnhoàl tàm càr tus rềp mờ jơnau kờñ lơh sir tơn jơh hìu lơh ing, hìu ồm sèt ñhăt dà mìu ai làng bol in. Kon Rẫy là kơnhoàl lam lài bơh càr Kon Tum dê tus tŭ do neh sơnđờm mut lơh, lơh pa mờ lơh niam wơl jơh 155 nơm hìu lơh ing, hìu ồm sèt ñhăt dà mìu ai ală hìu bơnhă in. Tàm hơ̆ khà hìu kờñ lơh pa là 102 nơm mờ lơh niam wơl là 53 nơm hìu.

Ồng Nguyễn Văn Thuỷ, Phó Củ tịc Anih duh broă Làng bol kơnhoàl Kon Rẫy, pà gĭt, tŭ do neh geh dùl nggùl khà hìu kờñ lơh pa, hìu kờñ lơh niam wơl geh lơh sir mờ tàm jàu ai hìu bơnhă in mut ơm. Kơnhoàl pơnđơl pràn lơh sir broă tơn jơh hìu lơh ing, hìu ồm sèt ñhăt dà mìu tàm lồi nhai 4 nam 2025. Bal mờ kơnhoàl Kon Rẫy, tàm càr Kon Tum geh kơnhoàl Đăk Hà kung mìng gam 9 nơm hìu mờ kơnhoàl Sa Thầy gam 34 nơm hìu là lơh sir broă lơh. Gơwèt mờ kơnhoàl tiah sar lơgar ngài, tiah kal ke bơh càr dê gam uă hìu lơh ing, hìu ồm sèt ñhăt dà mìu kờñ lơh pa, lơh niam wơl, bè: kơnhoàl Đăk Glei 646 nơm hìu, Kon Plông 572 nơm hìu, Tu Mơ Rông 423 nơm hìu, kờp tus tơngai tŭ do khà sơnđờm mut lơh, lơh sir lơh pa mờ lơh niam wơl kung geh rlau mờ nggùl.