Tơnơ̆ rlau dùl nam lơh broă gơnoar ătbồ ƀòn lơgar 2 kâp, Lâm Đồng kung gam uă gơkòl tàm ătbồ ù tiah. Gĭt nđờ jơ̆t rbô lồ ù rơndăp ù tiah lŭ bauxite, titan rơndăp rơndồl mờ tiah làng bol ơm kis, tiah drà mờ broă lơh bơ̆t bơtàu phan bơna; gĭt nđờ rbô hìu làng bol gam ơm kis tàm bă ù brê halà tàm ală kơnhoàl ù tiah ờ hềt geh rơndăp ù tiah anih làng bol ơm kis. Uă bă ù lơh broă sa sươn sre gam tam pìt mờ anih lơh sa sươn dờng, anih tam brê.

Ồng Bon Yô Soan, Phó Chủ tịch Anih duh broă Mặt trận Dà lơgar Việt Nam càr Lâm Đồng pà gĭt, Adăt Ù tiah nam 2024 mờ ală sră nggal bơto pơlam neh lơh gơlik geh tam gơl niam ngan, mơya ală tŭ lơh kung gam gơlik geh sơl ală bơta siơ̆u sră nggal dipal mờ kơrnoăt boh lam mờ broă lơh jăt ờ hềt ring bal, ngan là gơ wèt mờ ală broă gơkòl bơh lài:

 “Cau tĕ khà kơ̆p kờñ Quốc hội, Chính phủ mờ ală Ƀộ, gah Dà lơgar pơn jăt tai kờp sền wơl, lơh sir ală jơnau cih kơrnoăt boh lam dê bè ù tiah jăt gùng loh làng, ring bal, ƀươn lơh jăt, mơkung geh kơrnoăt bơsong gơ wèt mờ ală cau gơ wèt mờ ală jơnau gơ dŏ jòng pleh gơlik jơnau lùp yă, gàr niam gơnoar mờ bơta kwơ dipal mờ kơrnoăt boh lam dipal ngan bơh làng bol dê”.

Jăt sền Dơ̆ pơrjum ờ bè ờs dơ̆ dùl, Quốc hội khoă XVI, cau tĕ khà càr Lâm Đồng tơlik nùs nhơm kơ̆p gơn pơlam gùng gùng dà broă lơh lơh tam gơl wơl Adăt Ù tiah nam 2024 Quốc hội mờ Chính phủ dê rơ̆p bơsong geh bơta pràn ù tiah ai rài bơtàu tơngguh pa in.

Gơ wèt mờ giă ù, ala măt gơnoar ătbồ mờ anih lơh broă ờs mờng càr Lâm Đồng dê dan Dà lơgar ring bal kơrnoăt đơng lam lơh jăt, wèt tus dùl bơta giă ù song dơ pă loh làng. Bal mờ hơ̆, pal lơh sir ală jơnau yal tơnggĭt ù tiah nàng yal loh làng jơnau tơnggĭt, ai tơl bơta ƀươn ai ală broă lơh bè tăc blơi, dờp pơrdờn gơnoar ngui ù mờ tơrmù ƀà gơlik geh tàm ătbồ.

Ồng Lê Trọng Yên, Phó Chủ tịch Duh broă sùm Anih duh broă Làng bol càr Lâm Đồng geh jơnau dan bè kơrnoăt ai wơl ù geh tơngai pơrgon gơ wèt mờ bàr pe rơndăp broă lơh, ngan là rơndăp broă lơh jòi phan kwơ tàm ù:

“Ală rơndăp broă lơh phan kwơ tàm ù mờ bol he ai wơl ù tơn den kal ke ngan. Tài bơh làng bol cau neh gơtìp ai wơl ù den bol he pal geh broă lơh broă sa ai làng bol in den ñchi bơh tài mờ he ờ geh kơrnoăt, gùng dà broă lơh bè ai wơl ù geh tơngai pơrgon. Broă lơh tam gơl wơl Adăt Ù tiah geh tơngai pơrgon rơ̆p gơmù geh tơm wơl dong kờl ntrờn ơm kis wơl mờ gơmù geh priă tă bơcri bơh chờm bè giă bơh alumin dê”.