Gùt càr Lâm Đồng tŭ do geh 1 rơbô 581 hìu bơsram bơto bơtê mờ mờr 841 rơbô nă kơnòm bơsram mờ 25 rơbô 799 ơdŭ bơsram. Mơya, ală hìu bơsram, ơdŭ bơsram gam rah rài, mờ 770 tiah bơsram rah rài; jơh gùt càr gam ờ tơl rlau 5 rơbô 300 nă cau pơgru, cau lơh broă pơndrờm mờ khà ai lơh nền.

Tềng đăp nam bơsram pa, ală hìu bơsram bơto bơtê càr Lâm Đồng gam mhar kờp sền ơdŭ bơsram, ồs đèng, dà, internet, hìu jă brê mờ phan bơna măi mok bơto bơsram; lơh niam wơl ală phan ờ diơng, ờ gŏ di lời kơnòm bơsram tàm ơdŭ bơsram ờ gàr niam lơngăp lơngai. Ală broă lơh bơt bơtàu hìu bơsram geh sồr lơh mhar tŭ tơngai mut lơh, pơn đơl pràn lơh ngan lơh sir lài mờ ngai 15/8.