Nam bơsram pa do, oh Y Hiển Nhi, kòn ùr bơh bi A Trang, tàm ƀòn Kram, sàh Rờ Kơi, càr Quảng Ngãi dê mŭt bơsram ơdŭ 1B Hìu bơsram ơm sa bic tơn bàr kấp Kấp 1 mờ Kấp 2 sàh Rờ Kơi. Bàr poh pa do, ngai lơi oh kung tus hìu bơsram nàng lơh kwèng mờ tiah bơsram pa. Tàm ală ngai sơnrờp gam ờ khin, geh pơgru pơlam, oh Y Hiển Nhi rơhời mờng kwèng mờ tiah bơsram pa.

Ùr bơklao bi A Trang, lơh broă tàm suơn mìr, jơh ngai ơm lơh broă tàm suơn mìr den tàng broă jun rò kòn kung là dùl bơta kơlôi rơcang ngan. Nam bơsram pa do, bi A Trang iang nùs rơlao tŭ Hìu bơsram ơm sa bic tơn bàr kấp Kấp 1 mờ Kấp 2 sàh Rờ Kơi bơyai lơh ơm ngai, ơm sa bic tơn den tàng broă bơsram sră mờ jun rò kòn lòt bơsram geh ƀuơn rơlao: “Tàm do làng bol lòt lơh broă jơh ngai, glar bòl ngan, uă tŭ tàm sào ngai ờ geh tŭ nàng lòt rò kòn. Di lah geh ơm ngai den niam ngan cau cau mè bèp kơnòm bơsram in, tài broă lơh tàm do là lơh broă mờ jơng tê lơm, jơh ngai lòt lơh broă ngài, ờ jai lòt rò kòn. Cau mè bè kơnòm bơsram kung chờ hờp ngan tŭ ală kòn lòt bơsram geh lơngăp lơngai, hơ̆ sồng geh pơngàr niam. Dà lơgar dong kờl tiah nhàr lơgar bè do, cau mè bèp kơnòm bơsram chờ hờp ngan. Kung kơ̆p kờñ tơnơ̆ do ală oh kòn pal lơh ngan bơsram sră jăk”.

Nam bơsram 2026-2027, Hìu bơsram ơm sa bic tơn bàr kấp Kấp 1 mờ Kấp 2 sà Rờ Kơi geh 1 rơbô 156 nă kơnòm bơsram, geh bơsram tàm 34 ơdŭ, tàm hơ̆ geh 20 ơdŭ kấp 1 mờ 14 ơdŭ kấp 2. Ală gùng dà broă lơh bè sào sa, ơm, bơsram sră, lơngăp lơngai niam, rơcang kơrian mờ crùh ồs sa mờ kloh niam phan sa geh rơcang lài bơh gờñ. Hìu bơsram kung bơyai lơh bơsram tàp ai ală kwang bàng, cau pơgru, cau lơh broă in bè broă atbồ, sền gàr kơnòm bơsram ơm sa bic tơn mờ ơm ngai in.

Hìu bơsram Ơm sa bic tơn Kấp 1 mờ Kấp 2 sàh Mô Rai gam tàm tơngai lơh gơs, ờ hềt gơtùi ngui di tàm dơ̆ sơn đờm nam bơsram pa. Sàh do hòi jà jơh gùt mpồl lơh broă chính trị bal mờ ală mpồl ling, cau ling sền gàr tiah nhàr lơgar mờ Công ty 78, Binh đoàn 15 dong kờl lơh gơs ală bơnah broă gam tai. Pah ngai geh di pơgăp 30 nă cau lơh broă tus wàs phan, dong kờl bơnah broă lơh mhar nàng lơh gơs.

Tàm hìu bơsram ờ hềt gơtùi ai ngui mơ, kơnòm bơsram kấp 1 mờ kấp 2 kung gam bơsram tàm hìu bơram lài do, gàr niam broă lơh tàm nam bơsram. Ală ơdŭ sơnrờp kấp geh bơyai lơh wă rò kơnòm bơsram bơh gờñ jăt mờ jơnau geh ai. Ồng Trương Công Chính, Bí thư Đảng ủy sàh Mô Rai pà git, tus tŭ do, mpồl kwang bàng atbồ mờ cau pơgru tàm hìu bơsram neh geh tơl.

Tàm tơngai sơnrờp, càr Quảng Ngãi ai ngui 4 hìu bơsram ơm sa bic tơn bàr kấp tàm ală sàh Dục Nông, Sa Loong, Rờ Kơi mờ Mô Rai tàm ngai 05 nhai 9 nam 2026. Gah Bơto bơtê mờ Bơsram càr Quảng Ngãi pơgồp bal mờ ală sàh, sơnah ƀòn sền wơl, ai mpồl kwang bàng atbồ, cau pơgru, cau lơh broă; lơh gơs gùng dà broă rơwah kơnòm bơsram, bơyai lơh bơto bơsram, ai anih ơm sa mờ sền gàr kơnòm bơsram. Ală phan bơto bơsram, hìu trŭ sa, hìu sền sră, anih lơh broă… tŭ lơi kung rơcang lài lơh broă niam bơh tàm bồ nam bơsram tơn.

Ồng Nguyễn Ngọc Thái, Kwang Lam bồ Sờh Bơto bơtê mờ Bơsram càr Quảng Ngãi pà git, càr geh 9 hìu bơsram geh Dà lơgar bơcri priă, tàm hơ̆ geh 4 hìu bơsram tàm tơngai sơnrờp mờ 5 hìu bơsram tàm tơngai dơ̆ 2, kờp jơh priă bơcri mờr 2 rơbô tơmàn đong: “Do là gùng dà broă lơh di ngan mờ ờ mìng drơng tàm broă bơsram sră mờ gam gơrềng bal tus mờ broă sền gàr lơngăp lơngai, sền gàr Dà lơgar, gàr kơl jăp tiah nhàr lơgar. Sờh Bơto bơtê mờ Bơram càr Quảng Ngãi neh dan mờ Ainh duh broă Làng bol càr Quảng Ngãi hòi jà jơh ală mpồl lơh broă, tơnguh tơngai lơh, lơh ngan ală broă sền wơl ală broă lơh sră nggal mờ ai ngui nam bơsram pa di mờ gùng dà broă lơh bơh càr dê”.

Bơh Rờ Kơi tus Mô Rai, Sa Loong, Dục Nông, càr Quảng Ngãi, ală hìu bơsram pa gam rơhời geh gŏ mùl màl tàm tiah nhàr lơgar, cèng bal nùs nhơm chờ hờp mờ kơ̆p kờñ bơh kơnòm bơsram, cau mè bèp kơnòm bơsram bal mờ cau pơgru dê. Tŭ kơnòm bơsram geh bơsram tơl, làng bol iang nùs lơh broă sa, bơtàu tơnguh lơh sa, gàr kơl jăp tiah nhàr Dà lơgar.