Tàm pơrjum mìng dùl tơngu me dơ̆ Bàr, Mpồl duh broă Làng bol càr Dăk Lăk khoă XI pa ring bal Jơnau lơh nền tàm pơrjum geh ai khà dong kờl priă gơwèt mờ cau lơh broă ờ lơh kơnòl broă tờm tàm thôn, jơnum làng bol tiah drà; broă dờp bal groăt mờ khà priă dong kờl geh ai dờp kơnòl broă; mờ ai geh khà, groăt mờ khà dong kờl gơwèt mờ cau tus bal lơh broă tàm thôn, jơnum làng bol tiah drà tàm càr.

Jơnau lơh nền tàm pơrjum geh ai, tŭ kwang bàng, công chức, viên chức, cau lơh broă tàm kấp sàh ha là cau lơh broă ờ lơh kơnòl broă tờm ai tai gơnoar broă ndai lơh gơmù dùl nă cau jăt mờ jơnau geh ai den geh dờp 100% khà priă dong kờl ha là dong kờl bơh groăt at kơnòl broă tai; di lah dờp tai kơnòl uă groăt broă mìng geh dờp dùl khà uă ngan. Priă geh lơh jăt tơl bơh kes priă Dà lơgar dê tă mờ kes priă càr. Gơwèt mờ cau lơh broă ờ lơh kơnòl broă tàm thôn, jơnum làng bol tiah drà, khà dong kờl geh jăt jơnau geh ai bơh tơl bơta ƀòn lơgar dê. Mùl màl, Bí thư Chi bộ geh dờp hệ sồ 2,8 dơ̆ khà priă nhai tàm thôn, jơnum làng bol tiah drà bơta 1 mờ 2,5 dơ̆ tàm ală ƀòn lơgar gam tai; Kwang lam bồ thôn, Lam bồ jơnum làng bol tiah drà dờp geh hê sồ ndrờm bal 2,7 mờ 2,3; Lam bồ mpồl lơh broă Mặt trận dờp hệ sồ ndrờm bal 2,5 mờ 2,0 khà priă nhai tờm.