Tơnơ̆ uă nam kis tàm hìu lơngơh, mìu ñhăt, càl hềr, hìu bơnhă ồng Siu Hoàng, kòn cau Jrai, ơm tàm sàh Ia Mơ, kơnhoàl Chư Prông, càr Gia Lai neh hừh nùs kơ̆p kờñ geh dùl nơm hìu ơm kơ̆ kơl jăp, lơngăp lơgai. Mut ơm tàm hìu pa bơh Mpồl ling sền gàr tiah nhàr lơgar càr Gia Lai dê dong kờl lơh pà, ồng Siu Hoàng ngoh rơngăc đơs: "Mpồl ling sền gàr tiah nhàr lơgar, Dà lơgar sền gròi lơh ai hìu bơnhă añ in hìu pa. Hìu bơnhă añ chờ hờp mờ brơn brài ngan”.

Bơh priă tă pơgồp bal bơh Kwang bàng, cau ling bal mờ bơta tàm sơm bat tê bal bơh ală cau geh nùs nhơm niam, Mpồl ling sền gàr tiah nhàr lơgar càr Gia Lai neh lơh 10 nơm hìu ơm dong làng bol kòn cau rƀah tàm tiah nhàr lơgar in. Tơl nơm hìu geh dong kờl 70 tơlak đong, mpồl ling tă pơgồp tai phan bơna bơt bơtàu mờ ngai lơh broă, gàr niam broă lơh hìu ơm dờng rơđàih rlau.

Đại tá ồng Trần Tiến Hải, Đơng lam Mpồl ling sền gàr tiah nhàr lơgar càr Gia Lai pà gĭt, broă tơn jơh hìu lơh ing, hìu ồm sèt ñhăt dà mìu ờ mìng dong làng bol geh tiah ơm kơnhăp, kơ̆ kơl jăp rài kis lơm mờ gam pơgồp bơnah bơt bơtàu nùs nhơm ling klàng làng bol sơlơ rềp mềr, bal mờ sền gàr kơ̆ kơl jăp gơnoar tờm lơngăp lơngai tiah nhàr lơgar. Đại tá ồng Trần Tiến Hải, đơs: "Tàm ală nam do, bol añ sền gròi ngan broă do, nàng hòi jà bơta tă pơgồp bal bơh kwang bàng, cau ling mờ ală cau geh nùs nhơm niam dê. Bol añ gŏ geh kơnòl gơwèt mờ làng bol tàm tiah nhàr lơgar, nàng kah ưn ngài nùs nhơm bơh làng bol dê gơwèt mờ mpồl ling sền gàr tiah nhàr lơgar”.

Pa do Ƀộ Ling klàng kung neh geh sră nggal ring bal bè broă jàu Ling tiah 5, Ling mpồl 34, Ƀiñ đoàn 15 dong kờl làng bol càr Gia Lai in tơn jơh hìu lơh ing, hìu ồm sèt ñhăt dà mìu. Jat tàm bơta geh ngan, ală mpồl ling pa dong làng bol lơh pa, lơh niam hìu ơm, lơh jat nùs nhơm duh rngòt broă lơh mờ lơngăp lơngai ngan. Geh gĭt, lài mờ tŭ geh broă lơh tơn jơh hìu lơh ing, hìu ồm sèt ñhăt dà mìu tàm jơh gùt lơgar, mpồl ling klàng kung neh geh broă lơh dong kờl làng bol lơh hìu. Jat jơnau yal, 5 nam do, Ƀiñ đoàn 15 mờ Ling mpồl 34 neh pơgồp bal mờ kấp ủy, gơnoar atbồ tiah do, lòt sền, bơt bơtàu, lơh niam wơl, lơh kơnhăp mờ tàm jàu rlau 1 rơbô nơm hìu ai ală hìu bơnhă rƀah tàm ù tiah càr Gia Lai mờ Kon Tum in. 

Pa do, broă lơh “Nhai 3 tiah nhàr lơgar” kung geh bơyai lơh tàm kơnhoàl tiah nhàr lơgar Đức Cơ, càr  Gia Lai, mờ uă broă lơh geh kwơ, tàm hơ̆, geh broă dong kờl làng bol tơn jơh hìu lơh ing, hìu ồm sèt ñhăt dà mìu. Bi Đỗ Đức Thanh, Phó Ƀí thư Tỉñ đoàn càr Gia Lai pà gĭt:“Bol añ kung hòi jà dong kờl lơh niam wơl hìu ơm, tus bal srơh tàm sơm bat tê bal tơn jơh hìu lơh ing, hìu ồm sèt ñhăt dà mìu gam geh lam lơh. Broă lơh nam do bơdìh mờ bơtà lòt bal bơh ală mpồl lơh broă bơh ƀòn dờng Hồ Chí Minh dê den kung neh dờp geh bơta lòt bal bơh ală mpồl lơh broă tàm càr tờm dê, bơh hơ̆ pà gŏ bơta sền gròi bơh ală mpồl cau, cau dồ nă să kờñ tă pơgồp ai ƀòn lơgar, bơt bơtàu ƀòn lơgar ngai sơlơ pas pràn”.

Tus tŭ do, càr Gia Lai neh sơnđờm mut lơh pa mờ lơh niam wơl rlau 2 rơbô nơm hìu gơwèt broă lơh tơn jơh hìu lơh ing, hìu ồm sèt ñhăt dà mìu. Mờ jơnau kờñ lơh rlau 8 rơbô 400 nơm hìu ai ală hìu bơnhă gơwèt broă lơh lài mờ kàl mìu nam do, Gia Lai neh hòi jà uă priă jền mpồl bơtiàn. Tàm hơ̆, dùl mpồl lơh sa kă bro neh ring bal Kes priă “Tài cau rƀah” càr, dong kờl 10 tơmàn đong; Ƀộ Kwang àng neh dong kờl rlau 201 tơmàn đong mờ Anih duh broă Làng bol càr Gia Lai neh jàu 211 tơmàn đong. Anih duh broă Làng bol ală kơnhoàl, ƀòn drà dờng, ƀòn dờng geh jàu pơgồp bal mờ Anih duh broă Mặt trận Dà lơgar Việt Nam càr dờp mờ ai priă jền mpồl bơtiàn lơh bal, gờñ lơh sir jơnau kờñ tơn jơh hìu lơh ing, hìu ồm sèt ñhăt dà mìu tàm ù tiah do dê. Phó Củ tịc Anih duh broă Làng bol càr Gia Lai, mò Nguyễn Thị Thanh Lịch pà gĭt:“Bol añ sền gĭt lam lơh dồ ròt bal, kal ke tiah lơi tă bơsong tiah hơ̆. Bol añ sền gĭt tơrgùm jơh ală bơta pràn lơh jat broă lơh do. Jat hơ̆ bơdìh mờ priă geh pà, càr hòi jà tă pơgồp bal ală priă jền bơh mpồl ling klàng, làng bol mpồl bơtiàn, mờ mpồl lơh sa kă bro nàng bal mờ gơ̆p bơt bơtàu hìu dờng rơđàih ai làng bol in. Càr Gia Lai ai jơh nùs lơh ngan uă, kờp dŭ tus nhai 6 nam 2026 rơ̆p lơh sir tơn jơh hìu lơh ing, hìu ồm sèt ñhăt dà mìu tàm ù tiah càr dê".