- Ơ ồng, lài ngan dan ồng yal bè bơta lam lơh, broă lơh tơn jơh hìu lơh ing, hìu sèt ñhăt dà mìu tàm ù tiah càr Lâm Đồng dê tàm tơngai pa do?

 Ồng Bon Yô Soan: Tàm ală nam do, broă lơh tơn jơh hìu lơh ing, hìu sèt ñhăt dà mìu là dùl tàm ală kơnòl broă tờm mờ Mặt trận Dà lơgar Việt Nam càr Lâm Đồng pơgồp bal mờ ală ƀan, gah broă tàm càr lam lơh kràñ cê jơh nùs ngan. Càr neh hòi jà tă pơgồp bal uă priă jền mpồl bơtiàn, is ồn bơta tàm sơm bat tê bal tă pơgồp bơh mpồl bơtiàn, ală mpồl lơh sa kă bro, mpồl cau mờ cau dồ nă să dê. Bơh bơta tă pơgồp jơh nùs do, tus tŭ do, gĭt nđờ rơbô hìu bơnhă geh rài kis kal ke, is ồn là làng bol jơi bơtiàn dô ết nă cau tàm càr neh geh dong kờl bơt bơtàu, lơh niam wơl hìu ơm dờng niam, gàr niam lơngăp lơngai mờ kơ̆ kơl jăp rlau. Bơh hơ̆, geh tai ală bơta dong làng bol in brồ guh lik klàs rƀah, bơtàu tơnguh rài kis.

- Den, tàm tŭ lam lơh jat, bơta lơi là ală kal ke mờ bơta lòng dờng ngan rlau jơh mờ càr Lâm Đồng gơtìp geh taih?

Ồng Bon Yô Soan:  Bơta lòng dờng ngan rlau jơh là priă jền gam ờ hoan geh, tàm tŭ jơnau kờñ bơh làng bol dê den dờng ngan. Mơya, kơnờm bơta dong kờl bơh gơnoar atbồ tiah do, bal mờ nùs nhơm tam klăc bơh mpồl bơtiàn dê, bol añ neh hời rơ hời sơr lèt gan ală bơta lòng do.

- Ơ ồng, den, tàm nam 2024 pa do, broă lơh neh geh ală cồng nha geh ngan bè lơi?

Ồng Bon Yô Soan: Kờp tus jơh nam 2024, jơh gùt càr neh tơn jơh geh pơgăp 900 nơm hìu lơh ing, hìu sèt nhăt dà mìu. Tàm hơ̆, geh mờr 750 nơm hìu pa geh lơh mờ mờr 150 nơm hìu yau geh lơh niam wơl mờ lơh kơnhăp. Ală hìu bơnhă geh dong kờl ndrờm tơngŏ bơta brơn brài, ưn ngài Đảng, Dà lơgar mờ ală mpồl, mpồl cau dê. Kwơ màng rlau tai, broă lơh ờ mìng tam gơl niam rài kis lơm mờ gam lơh geh bơta gơn kơnờm nàng làng bol in brồ guh lik klàs rƀah kơ̆ kơl jăp.

- Den, tàm tơngai tus, Anih duh broă Mặt trận Dà lơgar Việt Nam càr Lâm Đồng geh broă rơndăp lơh lơi nàng pơn jat tai lam lơh broă lơh do nàng lơh geh cồng nha uă ngan rlau jơh taih?

Ồng Bon Yô Soan: Bol añ rơ̆p pơn jat tai hòi jà tă pơgồp uă ngan rlau jơh ală priă jền mpồl bơtiàn mờ lơh pràn broă lơh pơgồp bal đah ală kấp, ală gah broă. Mờ càr kung rơ̆p tơrgùm tàm ală hìu bơnhă kal ke uă ngan mờ ai lài dong kờl tàm ală tiah sar lơgar ngài. Bơdìh hơ̆, Anih duh broă Mặt trận Dà lơgar Việt Nam càr kung rơ̆p bơyai lơh uă broă lơh jat sền, gàr niam broă lam lơh song dơ pă, geh cồng nha mờ di cau. Mờ lơh ngan lơh bè lơi tàm nam 2025 do jơh gùt càr rơ̆p ờ gam geh hìu sèt ñhăt dà mìu, hìu lơh ing tai jat broă rơndăp lơh mờ càr dê neh geh ai.

-Ơi, dan ưn ngài ồng uă ngan!