Gơ wèt mờ làng bol kòn cau Bahnar ơm tàm ƀòn Klah, xã Kon Chiêng, kơnhoàl Mang Yang, ồng Hip, cau kra ƀòn ngan là “sềm lam bồ mpồl”, tề lam làng bol ƀòn lơgar sơrlèt gan kal ke, bòl glar, bơ̆t bơtàu rài kis hờm ram. Neh rlau 75 sơnam, rlau mờ cau lơi jơh, ồng Hip là cau gĭt wă ngan gùng dà, broă lơh dong kờl dipal ngan bơh Đảng, Dà lơgar dê lời ai làng bol jơi bơtiàn dồ êt nă cau in, kung bè wă wờng ngan bồ tơngoh kơlôi sơnơng, bơta kơ̆p kờñ bơh làng bol ƀòn lơgar dê. Den tàng bè hơ̆, ồng sùm kơlôi sơnơng lơh bè lơi nàng làng bol in klàs geh bơh bơta jơgloh, bơta rƀah. Kơlôi là lơh, ồng Hip mblàng yal, hòi jà làng bol tă pơgồp kes priă bal bơh ƀòn dê nàng ai hìu bơnhă rƀah in jồm càn bơtàu tơnguh lơh sa mơkung bơ̆t bơtàu broă lơh “Ai jồm kơnrồ ròng deh kòn”. Jăt mờ hơ̆, tơl hìu rƀah dờp ròng dùl nơm kơnrồ me, tŭ kơnrồ deh kòn den geh gàr wơl kơnrồ kòn, kơnrồ me den rơ̆p jàu ai hìu bơnhă ndai in ròng. Bơh broă lơh geh kwơ do, uă hìu neh rơhời lik klàs bơh rƀah. Ồng Hip sùm đơs, gam kis là gam dong kờl jơh tơl nă cau jăt jơnau bơto sồr bơh Wa Hồ dê. Ồng Hip, kra ƀòn xã Kon Chiêng, đơs bè do: Iăt jăt jơnau Đảng, Wa Hồ dê, bơta lơi geh kwơ ai làng bol in den he lơh bơta hơ̆. Halà gŏ bơta lơi niam den he đòm jăt gơtùi ai làng bol in den he lơh. Pal mblàng yal, pal lơh ai làng bol in sền gŏ là ờ geh jơnau ờ lơh mờ geh phan sa, pal lơh broă, gĭt lùp bơsram bơta pa, bơta niam den hơ̆ sồng gơtùi jơh rƀah. He lòt mblàng yal ai làng bol in bè hơ̆.

Tŭ pa lik ơm hìu is, hìu bơnhă bi Bzyich là hìu rƀah ƀòn Klah, xã Kon Chiêng, kơnhoàl Mang Yang dê geh ồng Hip dong kờl. Kra ƀòn neh pơrjum làng bol ƀòn lơgar mờ ring bal ai lài bơta dong kờl ai hìu bơnhă bi Bzyich in càn priă bơh kes priă ƀòn dê nàng blơi kơnrồ me. Là cau geh bơta mờng chài, ồng Hip să tờm tơn ià tê sơñio broă dong kờl ùr bơklau bi lơh tam gơl wơl sươn rơhàng nàng geh tai priă jền. Mìng tơnơ̆ bàr pe nam, lơh sa hìu bơnhă Bzyich dê ngai sơlơ bơtàu tơnguhr lau. Bi Bzyich, đơs: Kơnờm bơh kra ƀòn, dà kơlhề bơta pràn bơh jơh dùl ƀòn dê neh ai tơl bơta ai oh in càn 10 tơlak đong nàng bơ̆t bơtàu broă lơh ròng siam, blơi kơnrồ, bơtàu tơnguh ròng phan 4, 5 nam do neh kơ̆ kơl jăp. Tơngai mờr tus, oh pơđơl pràn uă rlau tai bơtàu tơnguh broă lơh tam tờm chi jŏ nam, pơgồp bal mờ ròng phan.

Mờ bơta kơlôi sơnơng, bơtàu tơnguh lơh sa pal gơ jăt bal mờ prăp gàr niam chài jơi bơtiàn dê, ồng Hip neh lời uă ngan bơta jơh nùs mờ tŭ jiơ pờ ală ơdŭ bơto dròng cing jañ mồng ai bol kơnòm tàm ƀòn in. Bơh tơl săp ntas dròng cing dê, jơnau tam ya xoang, jơnau yal, ồng Hip kơ̆p kờñ là mpồl ơruh pơnu bơh ƀòn dê rơ̆p gĭt sền gàr , lơh rề ơnàng bơhiàn niam chài ờs mờng bơh yau bơh mò pàng he dê. Ồng Hip, đơs: Tŭ do añ neh kra bloh, mìng kơ̆p kờñ tàm ƀòn pal prăp gàr ală bơta niam bơh ồng pàng he dê, bơta lơi niam den lơh, bơta lơi iơh den pal gĭt pleh. Tàm ƀòn den ờ geh tam cah is mờ pal tam klăc bal, tàm bơto sồr bal nàng bơtàu tơnguh bal. Tŭ do, ƀòn geh uă hìu pa lơh dờng mờ niam, bol kòn se kơnòm lơi kơnờm hơ̆ kung lòt bơsram lơm, añ gŏ gơlơh chờ hờp ngan.

Jơnau đơs jơh nùs gơlòt bal mờ broă lơh, ồng Hip là dùl nă đảng viên sùm geh làng bol kờñ gơboh. Ờ mìng bè hơ̆ lơm, ồng sùm geh kâp ủy, gơnoar ătbồ xã sền dờng màng ngan. Ồng Đinh Y Rươm, Củ tịc Ủy ƀan Mặt trận dà lơgar Việt Nam xã Kon Chiêng, kơnhoàl Mang Yang, đơs: ồng Hip là cau geh bơngă pin dờn, geh kơnòl mờ broă lơh, là dùl nă kwang bàng hòi jà làng bol chài, là anih tờm bơh mpồl tam klăc dờng dê. Ồng Đinh Y Rươm, đơs: Ồng mblàng yal làng bol in ờ gŏ dipal ngài ir mờ rềp mềl ngan, dipal ngan mờ rài kis làng bol dê, ală làng bol kal ke ồng sùm tam pà bal. Làng bol pin dờn ồng uă ngan. Añ gŏ gơlơh pal lùp bơsram bơh ồng, kơnờm mờ ồng nàng pơn jăt tai lơh broă mblàng yal, dong kờl bol hi tàm broă dong làng bol ƀòn lơgar ngai sơlơ bơtàu tơnguh.

Ồng neh 75 sơnam, mŭt Đảng rlau 30 nam do, ồng Hip sùm tơngŏ nùs nhơm lam lài lơh krơh, ai broă dong kờl làng bol lơh bơta chờ hờp. Làng bol kòn cau Bahnar tiah do cau lơi kung kờñ đơs jơnau ưn ngài mờ ồng Hip lơm, là cau neh lơh gơlik nùs nhơm gơdan lam lài tàm srơh bơtàu tơnguh lơh sa, sang sơrbì bơhiàn ờ niam bơh yau ờ gam kwơ tai, dong kờl làng bol ƀòn lơgar geh rài kis hờm ram.