Tŭ git jơnau yal tơnggit bè pang sră lời kir bơh ùr bơklau y sĩ Đào Ngọc Thạnh mờ dược sĩ Mai Thị Kim Ngân dê tàm sơnah ƀòn Cẩm Thành, càr Quảng Ngãi, hìu bơnhă mò Trần Thị Sô tàm sàh Tịnh Khê, càr Quảng Ngãi neh jòi tus tàm hìu nàng tàm pơn drờm wơl. Tàm khà sap sèng dơ̆ 46 tàm pang sră cih, mat sơnđan “Trần Thị Lê” gơ mpờl gŏ, ndrờm di mờ sră yal neh chơt mờ hìu bơnhă mò Sô gam prap. Jơnau yal tơnggit bơh ală pang sră cih neh ờ loh neh sòl pơnđàng tai bơta kơp kơnờm dờng ngan tơnơ̆ uă nam sùm lòt jòi cau pròc mhàm tờm. Mò Trần Thị Sô, oh tờm cau chơt màng Trần Thị Lê dê ngoh rơngac đơs:

“Añ chờ hờp ngan tŭ gŏ jơnau yal tơnggit mờ wa pơnđàng tàm mạng sàh hội. Jòi gŏ loh làng mat sơnđan Trần Thị Lê den chờ hờp ngan. Añ kơp kờñ ală oh mi gam lam lơh broă lơh dờng jòi bàn ƀồc ntìng bi ùr añ dê nàng cèng rê tơp tàm ƀlàng tơp ƀồc cau chơt màng sàh dê”.

Nam do neh 96 sơnam, mơya y sĩ Đào Ngọc Thạnh kung gam ngac ngar, kah loh bă tiah Hìu sơnơm B23 mờ tiah tơp uă cau ling bal lài do. Ồng pà git, pang sră cih wil tơl ngan ƀòn tờm, mpồl ling, ngai chơt phi să mờ jơnau yal bè sơm 181 nă cau chơt màng dê. Ngai phi să cih tàm pang sră là tŭ tơngai di ngan mờ ală cau chơt màng tac nhơm dut ndơl tàm hìu sơnơm, den tàng digơlan tìs rlau mờ sră yal chơt bơh mpồl ling dê. Đơs wơl tus bơta cau chơt màng Trần Thị Lê dê, ồng Đào Ngọc Thạnh kung gam kah bè ờs ngan:

“Trần Thị Lê, dilah ờ geh bơta lơi tam gơl huyện đội Trà Bồng dê den geh tơp tàm Cà Đam. Do là bơta di ngan, añ là cau tờm tơp tơn, kung yal wơl mờ hìu bơnhă in bè hơ̆”.

Ală jơnau cih wơl bal mờ ală jơnau kah kir ồng Thạnh dê gam gơ gơs là sră nggal tờm kuơmàng ngan, drơng tơn ai Broă lơh dờng 500 ngai mang càr Quảng Ngãi dê in. Lòt còp tơn hìu bơnhă mờ sền sră cih wơl, Đại tá Trịnh Công Sơn - Phó Chính ủy Gah đơng lam Ling klàng càr Quảng Ngãi ngoh rơngac ngan tŭ go jơnau cih kung gam bè ờs bơta kuơ gơ dê:

“Bơh ală jơnau yal tơnggit do, Mpồl sồr lơh càr Quảng Ngãi dê rơp pơn jat tai sền nền wơl, tàm pơndrờm mờ ală jơnau tơnggit neh geh yal mờ tàm pơndrờm tàm sră wac rùp ù tiah ngan ngồn. Is ồn là jat tàm jơnau pơn dut bè ù tiah ƀòn lơgar mờ jơnau kah yau càr Quảng Ngãi dê tàm rài tam lơh nàng sac rơ wah, pơn jat tai sền wơl hờ ù tiah ngan ngồn”.

Pang sră cih mờ tê bơh y sĩ Hìu sơnơm B23 lài do dê ờ mìng là phan kir sơnrai rài tam lơh, mờ gam ngan ngồn gơ gơs là “sơm pòl ồs” lam gùng lòt jòi cau ling bal. Ală jơnau yal tơnggit kuơmàng hơ̆ rơp pơn jat tai geh ală mpồl lơh broă geh gơnoar sền wơl, đal git; pơgồp bơnah lơh loh ală jơnau yal tơnggit, nàng gờñ lam ală cau khin cha jak chài chơt màng rê wơl mờ guàng tê hìu bơnhă mờ ƀòn tờm dê.