Củ tịc Quôk hội Vương Đình Huệ pà gĭt bơta do tŭ đơs tàm sơnđờm mut pơrjum dơ̆ 28 bơh Ủy ƀan Thường vụ Quôk hội drim ngai 13/12. Pơrjum geh bơyai lơh tàm 3 ngai, ngai 13,14 mờ 18 nhai 12. Bè broă tă pơgồp jơnau đơs tơn jơh pơrjum dơ̆ 6, Củ tịc Quôk hội pà gĭt, jat bè ờs rơ̆p sền sơ wì tơn jơh tơl làm jat tàm ală jơnau đơs bơh kwang bàng mờ cau tĕ khà dê sền geh broă lơi kờñ ai tơlik bơta mờng chài lơh broă, ngan là pal tam gơl pa bơta lơi nàng tơnguh uă cồng nha bơh dơ̆ pơrjum dê.

Geh gơrềng tus tơngume tă pơgồp jơnau đơs bơh sơn rờp bè rcang pơrjum dơ̆ 7 (nhai 5 nam 2024), ồng Vương Đình Huệ đơs loh, pa do geh 2 rơndăp broă lơh adat kwơ màng Quôk hội lơh nền ờ hềt ring bal mờ gam rơndăp ù tiah dà lềng Dà lơgar, Nghị quyết lơh tơrlòng lài broă lơh krơi is ai 3 broă lơh jơnau kờñ Dà lơgar kung bè bàr pe tơngume bè priă jền, kes priă Dà lơgar gam gơ kòl gơwèt mờ gơnăp gơnoar Quôk hội dê. Den tàng, pal kờp tus bơta digơlan geh 1 dơ̆ pơrjum mìng dùl tơngume (nisơna) nàng bơsong ală broă gam gơ kòl mờ jal mhar tềng đăp mat.