Ƀùi drim, Quôk hội cribơyai bè jơnau rơcang cih Jơnau lơh nền tàm pơrjum bơh Quôk hội dê bè bàr pe gùng dà, broă lơh tam gơl pràn bơtàu tơnguh niam chài Việt Nam. Do là broă lơh gơs kơrnuat boh lam gùng dà broă lơh, lam lơh jat ngan ngồn jơnau lơh nền bơh Đảng dê bè bơtàu tơnguh niam chài jat Jơnau lơh nền tàm pơrjum sồ 80 bơh Ƀộ Cíñ trị dê.

Kung tàm ngai do sơl, Quôk hội rơp cribơyai tàm hìu pơrjum bè ală jơnau rơcang cih Jơnau lơh nền tàm pơrjum bơh Quôk hội dê bè broă tơnggơs ƀòn dờng Đồng Nai gơ wèt dà lơgar; bè lam lơh tơrlòng lài jơnau cih kơrnuat boh lam dê bè cau chài cah rơña dà lơgar; bè gùng dà, broă lơh krơi is nàng lơh glài broă lơh tìs adat boh lam bè ù tiah bơh mpồl bal, cau nă să is dê gơlik geh lài mờ tŭ Adat Ù tiah nam 2024 geh ai lơh jat ngan ngồn mờ broă lơh pơn jat tai tă bơsong kal ke, bơta gơ kòl ai ală rơndap broă lơh gam wơl mờ jŏ jòng in.