Tơngai pa do, ală kấp Mpồl neh hòi jà geh mờr 14 tơmàn đong. Bơh kes priă do neh dong kờl ai ală kơnòm bơsram kal ke, jàu priă bơsram ai kơnòm bơsram rƀah kờñ ngan bơsram sră; pà khà jờng kơnòm bơsram ală kấp in; pà khà jờng ai kơnòm bơsram mờ cau pơgru geh cồng nha jak ngan tàm ală dơ̆ pơrlòng, dơ̆ pơrlòng tàm tiah do mờ dà lơgar.

Ồng Phạm Đăng Khoa, Kwang atbồ Sở Giáo dục– Đào tạo càr Dăk Lăk, Củ tịc Mpồl duh broă atbồ Kes priă dê pà gĭt, broă tơlik mat Kes priă dong kờl bơsram sră càr Dăk Lăk mờ Jơnau sồr ngan ngồn rơ̆p gĭt nền loh làng jơnau kờñ dờng màng, broă lơh ờ di lơh geh priă cồng, dong kờl is, wèt tus drơng broă geh cồng nha bơtàu tơnguh bơto bơtê, dong kờl bơsram sră, dong kờl cau chài tàm ală tiah in. Di dơ̆ do, Mpồl bơyai lơh kung jàu 15 bơnah priă bơsram dong kờl bơsram sră ai 15 nă kơnòm bơsram sơr lèt gan kal ke, bơsram jak tàm càr Dăk Lăk dê in.