Broă gơtìp lơyài do pơhìn tơn tus mờ broă bơsram sră, rài kis mờ lơngăp lơngai bơh 950 nă kơnòm bơsram ơm sa bic tơn tàm nam bơsram 2026-2027 dê, ală kơnòm bơsram do ndrờm kis mờ bơsram sră ơm sa bic tơn tàm hìu bơsram.

Gam 10 ngai tai tus ngai lòt bơsram, mơya tiah ƀlàng hìu bơsram, ală ròt ơdŭ bơsram, hìu ơm, hìu sa kung gam geh ală bơrtul lŭ, bràs phan lơh hìu bal mờ gơnru siồ siă. Tềng đăp mờ bơta do, Mpồl Kwang atbồ hìu bơsram neh tam pà cau pơgru tus, jăt sền broă lơh, mờ sồr cau tòm bơcri priă mờ ală cau lơh tơnguh uă kơnòl. Hìu bơsram sồr cau tờm lơh geh gùng dà broă lơh nàng tơnguh tŭ lơh, ai lài lơh gơs ală mpồl hìu, gah broă lơh drơng tơn tus mờ broă bơto, bơsram, hìu sa, hìu ơm kơnòm bơsram dê.