Sră nggal pơyua Củ tịc Ủy ƀan Ñân zân ală càr, ƀòn dờng tiah đah tô dà lơgar, tiah ring đah tô dà lơgar mờ tiah đah tô tàm gùl lơgar mờ ală Ƀộ, gah broă lơh dà lơgar geh gơ rềng đơs loh: Ală ngai pa do, tiah đah tô dà lơgar mờ tiah đah tô tàm gùl lơgar neh gơlik geh bơta trồ mrềt ngan, tiah kơh bơnơm jơnhua geh piar lơh gơ rềng tus pràn kơldang să jan làng bol mờ broă ròng phan, lơh sa suơn sre.

Nàng rơcang lài sơndră mờ bơta do, Thủ tướng Cíñ phủ sồr ală tiah lam lơh jat sền broă gơlik geh bơh trồ tiah dê, rơcang lài sồr lơh, lam lơh ală broă lơh sơndră mờ bơta trồ mrềt ngan, gàr niam pràn kơldang să jan mờ lơngăp lơngai làng bol in, rơcang sơndră jơloh, mrềt, kòp bơtờp gơ wèt mờ chi tam, phan ròng, phan tàm dà nàng kờñ tơrmù ƀà hoàc huơr gơ wèt mờ broă lơh sa suơn sre. Ờ gŏ di sền ờ sơp, di tŭ ai ală mpồl lơh broă tus kâp hơ đơm, ngan là ală xã tiah kơh bơnơm nàng mblàng yal, pơlam, sền sơ wì, sồr lam lơh tơn broă lơh rơcang sơndră trồ mrềt ai làng bol, chi tam, phan ròng in… tơrmù ƀà hoàc huơr tus khà lơyah ngan rlau jơh, gàr tơl kòi phe, phan sa pal geh drơng jơnau kờñ drà kă bro tàm tơngai lồi nam mờ sa tềp bơhiàn yau dà lơgar dê.