Tàm hơ̆ geh mờr 1 rbô 500 hìu geh dong kờl lơh hìu pa mờ 440 hìu geh dong kờl lơh niam wơl hìu. Bè hơ̆ tus tơngai do, càr Kon Tum neh lơh geh 2 bơnah 3 broă rơndăp lơh tơn jơh hìu ing, hìu ồm sèt ñhăt dà mìu. Càr gam tơrgùm ală priă jền nàng tus lồi nhai 6 tus rơ̆p lơh sir broă tơn jơh 824 nơm hìu ing, hìu ồm sèt ñhăt dà mìu gam wơl. Kon Tum lơh jăt uă broă lơh bơsong rơcăng lài sơrbì nùs nhơm kơ̆p kơldìng, tơmăng wơl tàm bơnah dong kờl; jơnau geh ngan phan ngui lơh hìu ờ huan geh mờ gơguh giă; ờ tơl cau lơh hìu dong kờl tài bơh làng bol mŭt tàm kàl lơh sa…

 Ngai 11/04, Kông ty TNHH một thành viên 72 (Ling mpồl 15) neh bơyai lơh dơ̆ sơnđờm mut lơh tơn jơh hìu lơh ing, hìu ồm sèt ñhăt dà mìu mờ jàu priă dong kờl ai 26 hìu bơnhă là cau lơh phan mờ làng bol in tàm ù tiah kơnhoàl Đức Cơ, càr Gia Lai. Kông ty 72 neh hòi jà tă pơgồp bal priă jền, tàm sơm bat tê bal lơh pa 23 nơm hìu, lơh niam wơl 3 nơm hìu, mờ kờp jơh khà priă rlau 1 tơmàn 300 tơlak đong. Bal mờ hơ̆, Kông ty neh hòi jà tă pơgồp bal bơh kwang bàng, cau ling dê mờ lơh geh ală bơta ai cau lơh phan mờ cau lơh broă in ai lài priă nhai nàng geh priă jền pơgồp bal tàm broă lơh hìu dờng niam. Lài hơ̆, nam 2024, Kông ty 72 kung neh hòi jà tă pơgồp bal ală priă jền nàng dong kờl lơh 11 nơm hìu “Hìu cau ling bal”, “Hìu tam klăc dờng”, “Hìu ram mhŭ kông đoàn” mờ kờp jơh khà priă 760 tơlak đong.

Tàm càr Dăk Nông, Tập đoàn Lơh sa mờ măy mŏk Chah mờ Phan kwơ tàm ù Việt Nam (TKV) neh jàu pà 350 tơlak đong nàng lơh 5 nơm hìu dong ală hìu làng bol jơi bơtiàn dồ êt nă cau rƀah. Do là priă jền Tập đoàn TKV lời lơh jăt srơh “Tơn jơh hìu ing, hìu ồm sèt ñhăt dà mìu” tàm Dăk Nông nam 2025. Tơl hìu làng bol geh dong kờl 70 tơlak đong nàng lơh pa hìu ơm. Ală hìu bơnhă geh dong kờl dơ̆ do là H’Dôi ơm tàm ƀòn Păng Sim, sàh Trường Xuân, kơnhoàl Dăk Song, Điểu Nguyên ơm tàm ƀòn Phi lơ te, sàh Dăk Ngo, kơnhoàl Tuy Đức; K’Sét ơm tàm ƀòn B’Nor, sàh Dăk Som, kơnhoàl Dăk Glong, Thị Nhú ơm tàm bòn Bu Srê I, sàh Dăk Ru, kơnhoàl Dăk R’lâp mờ Nông Văn Dương ơm tàm sàh Buôn Choáh, kơnhoàl Krông Nô.