Tŭ do, càr Dăk Lăk geh rlau 252 rơbô năc càn priă Anih priă jền Cíñ sác Xàh hội, mờ kờp jơh priă jơng kah dồs rlau 14 rơbô 500 tơmàn đong. Ală cau geh càn priă, geh: hìu bơnhă rƀah, hìu bơnhă pa lik klàs rƀah, hìu bơnhă cíñ sác, làng bol jơi bơtiàn dồ ết nă cau, kơnòm bơsram- cau bơsram dờng; ală hìu bơnhă kờñ dong kờl lơh sa, kă bro, hìu ơm, dà sàng goh...

Ai càn priă dong kờl neh pơgồp bơnah kơryan càn priă sa priă cồng uă tàm tiah sar lơgar ngài; dong kờl uă tiah lơh sir broă jàu ƀòn lơgar, bơh hơ̆ gàr niam lơngăp lơngai cíñ trị, rơndăp tăp sèng mpồl bơtiàn tàm ù tiah càr dê. Mơya, broă lam lơh Jơnau lơh nền sồ 78 bơh Cíñ phủ dê tus tŭ do neh tơngŏ bàr pe bơta ờ niam, bè: khà càn priă ờ uă, bàr pe broă lơh ờ gam di pal mờ bơta geh ngan; priă càn ai lòt lơh broă hờ lơgar ndai gam ết; priă cồng bàr pe broă lơh gam uă... Tàm dơ̆ lơh broă, ală jơnau đơs, jơnau dan bơh càr dê gùt dar broă tơnguh khà priă càn ai kơnòm bơsram- cau bơsram dờng in gơguh tus 100 tơlak đong dùl hìu bơnhă; khà càn priă lơh sa, kă bro gơguh tus 200 tơlak đong gơwèt mờ hìu bơnhă rƀah;  tơn jŏ tơngai càn priă gơwèt mờ cau jơh tơngai jàm bơh 5 tus 10 nam; mơkung pờ ơnàng cau càn priă là cau lòt lơh broă hờ lơgar ndai. Mpồl lòt sền neh iăt kơno jơnau đơs bơh càr Dăk Lăk dê, mờ pà gĭt rơ̆p gờñ kơlôi sơnơng nàng geh ală broă lơh di pal mờ mpồl năc bal bơh càr dê. Mơkung gơtùi kơlôi sơnơng broă lơh, broă dong kờl is ngui ai càr Dăk Lăk in, bè broă ngui priă jền bơh tiah do dê nàng ai càn priă dong kờl.