Jat jơnau yal, lơh jat broă lơh “500 ngai mang” lòt jòi, tơrgùm wơl mờ sền gĭt muh mat ƀồc ntìng cau ling chơ̆t màng gam ờ tơl jơnau yal, tus tŭ do gùt lơgar neh tơrgùm geh 1 rơbô 80 ƀồc ntìng cau ling chơ̆t màng. Ƀộ Kwang àng neh kờp sền, sền gĭt, sền sơ wì wơl jơnau yal bơh gĭt nđờ rơhiang rơbô ƀồc ntìng cau ling chơ̆t màng ờ hềt gĭt geh jơnau yal; bơyai lơh ai mẫu ADN tàm uă tiah mờ sền gĭt muh mat ai 23 nă cau in. Chính phủ neh ai lơh jat Broă rơndăp lơh bơyai lơh ală broă lơh tơngkah kir sơnrai 80 nam Ngai Cau ling sồt să- Cau ling chơ̆t màng; lơh Ală jơnau neh lơh nền mờ kờp jơh priă tă lơh pơgăp 13 rơbô tơmàn đong nàng lơh broă lơh kis gĭt jơnau gĭt adat, sền gròi cau geh màng mờ dà lơgar in.

Đơs pơndŭt pơrjum, mò Phạm Thị Thanh Trà- Phó Thủ tướng đơs sùm, tơngkah kir sơnrai 80 nam Ngai Cau ling sồt să- cau ling chơ̆t màng là broă lơh chính trị, kah yau, nùs nhơm niam kòn bơnus kwơ màng kấp dà lơgar; là dơ̆ nàng jơh gùt Đảng, gùt làng bol, gùt ling klàng kah ưn ngài, jờng rơ ală bơta phi să, tă pơgồp dà kơl hề dờng màng bơh cau geh màng mờ dà lơpgar. Phó Thủ tướng sồr bơyai lơh ală broă lơh tơngkah kir sơnrai pal gàr niam bơta yŭ rơyùm, ngan ngồn, geh kwơ, nùs nhơm niam kòn bơnus, geh bơta lơh gơrề uă; pơgồp bal mờ sền gròi niam rlau tai rài kis phan bơna, nùs nhơm ai hìu bơnhă cau ling chơ̆t màng, cau ling sồt să, cau ling kòp tê jê să mờ cau geh màng mờ dà lơgar in.