Tàm tiah lơh Hìu bơsram ơm sa bic tơn kâp 1 mờ kâp 2 sàh Mô Rai, càr Quảng Ngãi (lài do gơ wèt kơnhoàl Sa Thầy, càr Kon Tum), git nđờ rhiang nă cau chài măi mok, cau lơh phan gam lơh broă sùm tàm ală ngai ơm rlô chờ 30/4 mờ 01/5. Ală bơnah broă bơh bơnàng, jrong tus lơh kơlik geh lơh dơ̆ lĕ bal. Bulah trồ tiah tàm tiah nhàr lơgar gơlik geh nisơna, trồ tơngai mờ trồ mìu gơ tàm bơrlŭ, mơya tŭ jơ lơh broă kung gam gàr sùm. Geh uă cau lơh broă tàm ƀòn lơgar lòt lơh broă, ờ mìng geh tai priă jền mờ gam pơgồp bơta pràn lơh hìu bơsram oh kòn he in.

Ồng Nguyễn Văn Hồng (66 sơnam) ơm tàm ƀòn Sộp, sàh Mô Rai, càr Quảng Ngãi neh đềt mềr mờ broă lơh do mờr 2 nhai. Broă lơh pah ngai ồng dê là crăp, rơndap ơn lòs nàng tuh bê tông. Gơ wèt mờ ồng, broă lơh do ờ mìng là broă nàng lơh geh priă jền mờ gam là bơta kơp kơnờm tam gơl ai kòn dềt tàm tiah nhàr lơgar in tai: “Cau lơh broă bè bol hi kung pơn đơl lòt lơh broă nàng lơh mhar tơngai hơ pơrgon lam lơh rơndap broă. Añ lơh ndo neh mờr 2 nhai, sơn đờm bơh 6 jơ 30 phik drim tus 5 jơ mho. Añ lơh broă jơng tê lơm gơ dê, lơh pah ngai. Làng bol tiah nhàr lơgar kơp kờñ ngan hìu bơsram do gờñ lơh gơs nàng kòn sau in geh anih bơsram sră niam rlau”.

Bal mờ mpồl lam lơh rơndap broă, mpồl pơlam jat sền geh 8 nă cau kung gàr sùm lơh broă jơh gùt ală ngai rlô chờ, sền swì tơl bơnah broă bơh broă pa bơt bơtàu tus lơh sir.

Rơndap broă lơh Hìu bơsram ơm sa bic tơn kâp 1 mờ kâp 2 sàh Mô Rai, geh kờp jơh priă bơcri lơh rlau 225 tơmàn đong, tơngai lam lơh là 215 ngai. Tus tŭ do, khà broă lơh geh neh mờr 28%, gam lơyài pơndrờm mờ broă rơndap lơh. Tơnơ̆ tŭ lơh gơs bơnàng, ală mpồl gam lơh mhar broă lam lơh bơt bơtàu bơnah hơ đang.

Jat broă rơndap lơh, tus ngai 30/7 rơp lơh gơs ală bơnah broă tờm, tơnơ̆ hơ̆ lơh gơs tàm lồi nhai 8. Bulah bè hơ̆, bơnàng ù ờ kơ̆ pal lơh niam mờ măi mok neh lơh gơ rềng tus tơngai lam lơh broă lơh. Tơnơ̆ ală ngai ơm rlô chờ, cau tờm lơh rơndap broă kờp dŭ bơ tơl tai mờr 90 nă cau lơh broă, tơnguh khà cau lơh broă gơguh tus mờr 300 nă.

Bràs pal pơndiang bơh ngài, giă gơguh uă rlau 2 dơ̆; lŭ, lŭ rơnđeh, gak kung dồ ròt gơguh giă lơm, lơh gơ rềng tus priă tă lơh mờ tơngai hơ pơrgon lam lơh. Ồng Nguyễn Ngọc Bách, đơng lam rơndap broă lơh Hìu bơsram ơm sa bic tơn kâp 1 – kâp 2 sàh Mô Rai pà git, giă phan ngui bơt bơtàu gơguh jơnhua kung lơh gơlik uă bơta kal ke sơl: “Tŭ do, jơh ală bơnah hìu tàm broă lơh ndrờm neh tuh bơnàng, geh ală bơnah hìu neh lơh tus cờn dơ̆ 3. Đah cau tờm lơh rơndap broă gam tơnguh cau lơh broă nàng lơh mhar tơngai hơ pơrgon. Tàm ală ngai ơm rlô chờ, jơh ală cau lơh broă tàm do kung gam lơh broă bè ờs. Tàm dơ̆ ơm rlô chờ, cau lơh broă tàm anih lơh broă geh tơnguh tai priă jờng. Cau tờm lơh rơndap broă lơh ngan lơh sir di mờ tŭ tơngai neh hơ pơrgon”.

Pa do, đơng lam Anih duh broă Làng bol càr Quảng Ngãi neh lòt sền tŭ tơngai hơ pơrgon lam lơh ală rơndap broă lơh lơh hìu bơsram ơm sa bic tơn tàm 4 sàh tiah nhàr lơgar Rờ Kơi, Mô Rai, Sa Loong mờ Dục Nông. Ală hìu bơsram geh sơn đờm lam lơh bơh nhai 11 nam 2025, kờp dŭ lơh gơs mờ ai ngui tàm bồ nam bơsram 2026 – 2027.

Mò Y Ngọc – Phó Củ tịc Duh broă sùm Anih duh broă Làng bol càr Quảng Ngãi đơs sùm, ală mpồl kờñ pal pơgồp bal nền nòn, chồl mhar tơngai hơ pơrgon, gàr bơta niam, mờ kung rơcang lài tă bơsong kal ke bè priă bơcri mờ phan ngui bơt bơtàu: “Pơn drờm mờ ală bă tiah lam lơh ndai, Hìu bơsram ơm sa bic tơn kâp 1 mờ kâp 2 tàm sàh Mô Rau geh uă kal ke rlau tài ù tiah, bơta phan tàm ù. Cau tờm bơcri priă mờ cau tờm lơh rơndap broă pal hơ pơrgon ai broă lơh sơn đờm ngui tàm nam bơsram 2026 – 2027. Añ sồr cau tờm lơh rơndap broă ai tai cau lơh broă, chồl mhar tơngai hơ pơrgon nàng lam lơh ndrờm bal ală bơnah broă bơh broă lơh dê”.

Càr Quảng Ngãi gam lam lơh 9 hìu bơsram ơm sa bic tơn bàr kâp tàm ală sàh tiah nhàr lơgar, tam pà gơs 2 tŭ tơngai, tơl hìu bơsram drơng bơh 700 tus 1 rbô 600 nă kơnòm bơsram in, geh bơcri priă lơh ndrờm bal. Ờ mìng tơnguh bơta niam bơsram sră, ală hìu bơsram do gam pơgồp bơnah gàr kơ̆ rài kis, gàr wơl làng bol ơm kis, gàr niam lơngăp lơngai dà lơgar kơ̆ kơl jap tàm tiah nhàr lơgar.

Tàm tiah brê bơnơm nhàr lơgar, broă lam lơh rơndap broă jơh gùt ală ngai ơm rlô chờ ờ mìng là jơnau hơ pơrgon mờ gam pơyua bơta kơp kơnờm bè ală ơdŭ bơsram pa, rơnàng tơnơ̆ pa ai kơnòm bơsram tiah nhàr lơgar kal ke in.