Ală ngai do, ală broă lơh kis git jơnau git adat geh bơyai lơh làm gùt ală tiah tàm càr Dăk Lăk. Tàm 12 anih ai, dờp mẫu sinh phẩm ADN bơh cau pròc mhàm tờm cau chơt màng dê bơh Kwang àng càr Dăk Lăk lam lơh, broă lơh ai mẫu geh lam lơh jal mhar, jak chài. Đại tá Võ Hùng Tường - Lam bồ Cơldŭ Cảnh sát atbồ sră pơ àr gơnoar atbồ bè rơndap tap sèng mpồl bơtiàn, Kwang àng càr Dăk Lăk pà git, bơdìh mờ 12 anih dờp kơ̆ dùl bă tiah, mpồl gam rơndap ai 12 jơnum lơh broă tus tàm hìu ală cau pròc mhàm tờm cau chơt màng dờng sơnam, să jan ờ sô, ờ gơtùi lòt rê nàng dong ai mẫu: “Bol hi lam lơh sùm tàm 4 ngai, bơh ngai 23/7 tus ngai 26/7. Is ồn ngai sơn rờp lam lơh, mờ bơta lơh ngan lam lơh bơh ală mpồl dê, bol hi neh dờp geh 928 mẫu, tàm hơ̆ geh 15 nă cau geh ai mẫu tàm hìu cau pròc mhàm tờm. Khà bơh chờm là 2 rbô 886 nă cau mờ gam rlau 2 ngai tai, khà gam wơl bol hi rơp tơrgùm lơh gơs ai mẫu nàng gàr lơh geh 100% broă rơndap lơh”.

Bal mờ broă lơh ai mẫu sinh phẩm ADN geh lơh jal mhar, broă lơh hìu dong kòn tờm ală cau ling gơtìp sơnơm khih dioxin lơh aniai kung geh lam lơh jơh nùs ngan sơl tàm nhai 7 do. Dơ̆ do, càr Dăk Lăk lam lơh pa 22 nơm hìu mờ lơh niam wơl 20 nơm hìu jàu ală hìu bơnhă in. Broă lơh pa, lơh niam wơl kờp dŭ lơh gơs tàm ngai do, 27/7. Tàm sơnah ƀòn Ea Kao, ƀòn lơgar dờp lơh pa 2 nơm hìu mờ dong kờl lơh niam wơl 1 nơm hìu. Thiếu tướng Đỗ Anh Dũng, Chính trị viên Phó Mpồl đơng lam Ling klàng sơnah ƀòn Ea Kao pà git, mờ bơta lơh bal jơh nùs bơh jơh gùt anih lơh broă chính trị dê, broă neh lơh sir: “Bơh bơta là anih tus bal tơn lơh pa, lơh niam wơl hìu ai kòn tờm cau lơh broă tàm rài tam lơh gơtìp sơnơm khih dioxin lơh aniai in, Mpồl đơng lam ling klàng sơnah ƀòn neh bơt bơtàu broă rơndap lơh tă pơgồp jơnau đơs Anih duh broă Làng bol sơnah ƀòn in lam lơh. Bol hi sùm pơgồp bal mờ hìu bơnhă, cau lơh hìu ală hìu bơnhă in”.

Tơnkah 79 nam Ngai cau ling sồt să - cau chơt màng nam do, Anih duh broă Làng bol càr Dăk Lăk neh ai 21 tơmàn 500 tơlak đong bơh kes priă, tơng gơs 15 jơnum lơh broă lòt lùp còp, pơn dờm pơnđiang mờ jàu phan tus 36 rbô hìu bơnhă dờp bơta dong kờl bơh mpồl bơtiàn. Bơdìh hơ̆ tai, càr Dăk Lăk kung lam lơh broă jàu phan bơh Chủ tịch lơgar dê tus 27 rbô 200 nă cau dờp bơta dong kờl bơh mpồl bơtiàn tàm gùt càr, mờ kờp jơh priă tă lơh 8 tơmàn 230 tơlak đong. Ồng Phan Đại Thắng - Phó Kwang lam bồ Sờh broă dơlam is càr Dăk Lăk pà git, jơh ală bơnah phan pà neh geh jun tus Anih duh broă Làng bol 102 sàh, sơnah ƀòn nàng jàu tus tê ală hìu bơnhă dờp bơta dong kờl bơh mpồl bơtiàn. Bơdìh hơ̆ tai, Sờh kung pơgồp bal mờ ală mpồl lơh broă geh gơ rềng lam lơh dơ̆ lĕ bal uă broă lơh kis git jơnau git adat di ngai 27/7: “Ală kâp ủy, gơnoar atbồ tàm càr Dăk Lăk bơyai lơh chu ñàng kah kơlôi ală cau khin cha jak chài chơt màng tàm ală ƀlàng tơp ƀồc; lơh niam wơl ală broă lơh Dà lơgar tờm kah dà kơl hề tàm jơh gùt càr. Bè broă lơh dờng 500 ngai mang, nàng rờ tơrgùm, đal git mat ală cau chơt màng, Sờh Broă dơlam is pơgồp bal nền nòn mờ Gah đơng lam Ling klàng càr mờ ală ƀòn lơgar lam lơh git nền, rờ tơrgùm kung bè lòt jòi ƀồc ntìng cau chơt màng”.