4 nam lài do, hìu bơnhă bi K’ Tâm, ơm tàm thôn 1, xã Liêng Srônh, kơnhoàl Dam Rong, càr Lâm Đồng gơwèt hìu bơnhă rƀah. 3 sào ù lơh kơphê, kòi, tơngời jat broă lơh tam phan yau, den rài kis lơh sa hìu bơnhă sùm gơ ơm tàm bơta jơgloh, suơ̆i siar. Tềng đap rài kis kal ke bơh hìu bơnhă dê, mò K’ Nga, Củ tịc Ủy ƀan Mặt trận Dà lơgar Việt Nam xã Liêng Srônh neh tus tơn tàm hìu nàng jòi gĭt, hòi jà bi tam gơl bă ù tam phan ờ niam ai cồng nha tơnhào ờ uă tus tam tờm zơu ròng tu, dong bi K’Tâm càn priă bơcri, yal ală tiah pin dờn nàng blơi lài sơntìl tờm zơu, kòn tu mờ bơsram broă ròng tu. Tơnơ̆ tŭ tam gơl tus broă lơh sa pa, lơh sa bơh hìu bơnhă bi K’Tâm dê hời rơ hời geh tam gơl. Bi K’Tâm pà gĭt, priă lơh geh bơh tam zơu ròng tu dong bi lơh niam wơl hìu đam, oh kòn ndrờm geh lòt bơsram sră. Bi K’Tâm, đơs: “Lài do den hìu bơnhă añ tam kơphê, kơnờm geh bơta mblàng yal bơh bi K’ Nga dê hìu bơnhă añ neh tam gơl tus tam tờm zơu ròng tu cèng wơl cồng nha lơh sa uă rlau mờ tam kơphê. Mờ priă càn bơh Ủy ƀan Mặt trận Dà lơgar Việt Nam xã dê dong kờl bè blơi phan ròng tu, neh dong hìu bơnhă añ geh tai priă lơh geh sùm, rcang geh priă jền ngui sa pah ngai”.

Ờ mìng bi K’ Tâm lơm mờ uă  hìu bơnhă làng bol kòn cau K’Ho tàm xã Liêng Srônh, kơnhoàl Dam Rong dê neh brồ guh lik klàs rƀah kơnờm tam gơl bơhiàn lơh broă sa, khin cha tam gơl rơndăp tăp sèng phan tam jat gùng dà broă lơh bơh Đảng mờ Dà lơgar dê. Nàng lơh geh bơta hơ̆, uă ngan kwang bàng, đảng viên tàm xã, tàm hơ̆ mò K’ Nga là dùl nă cau pơn rơ ngan, neh tơngŏ loh ngan gơnoar broă là krơh niam lam lài lơh jăt mờ jơh nùs mblàng yal jơnau, hòi jà làng bol lơh jat bal...

Bơh 12 nam lơh broă, bulah ơm tàm gơnoar broă là Kwang bàng sền gàr Adat boh lam, Củ tịc Mpồl cau ùr xã, tŭ do gam là Củ tịc Ủy ƀan Mặt trận Dà lơgar Việt Nam xã dê, mò K’ Nga ndrờm lơh jăt niam gơnoar broă bơh đảng viên dê. Mò sùm rềp mờ làng bol, ơm bal mờ làng bol, ơm rềp mờ ƀòn lơgar, iăt, kơno, gĭt nùs nhơm, bơta kơ̆p kờñ bơh làng bol dê nàng di tŭ cribơyai mờ kấp ủy, gơnoar atbồ ală tiah in bơsong di tŭ. Kơnờm bơh hơ̆, ală srơh bơh xã dê lam lơh, bè: tam gơl rơndăp tăp sèng phan tam, dong bal mờ gơ̆p bơtàu tơnguh lơh sa, sơm bat tê bal bơt bơtàu ƀòn lơgar pa, pà is ù lơh gùng lòt, bơt bơtàu rài kis pa tàm tiah làng bol ơm kis... ndrờm geh làng bol jơh nùs ngan lơh jăt. Ală bơhiàn yau bơr ngơl gơla, bơhiàn kơ̆t bau, bau bơh dềt, dơ̆ tơ̆p ƀồc hoàc huơr uă kung hời rơ hời geh gơmù mờ sang tĕ. Jat mò K’ Nga, là cau kòn ƀòn lơgar mờ là kwang bàng đảng viên dê den pal geh kơnòl bơt bơtàu ƀòn lơgar bơh he dê gơguh jak mờ bơtàu tơnguh. Mò K’ Nga, đơs:“Gơwèt mờ broă mờ tơn jơh ală bơhiàn bơr ngơl gơla bè dơ̆ tơ̆p ƀồc, lùp bau tàm xã dê den añ bal mờ Đảng ủy, Ủy ƀan Ñân zân xã neh lơh jat niam broă bè mblàng yal, hòi jà làng bol tơn jơh bơhiàn bơr ngơl gơla tàm  broă lơh sa, rài kis. Pơn yơu bè tàm dơ̆ tơ̆p ƀồc den ờ lời jŏ ir 48 jiơ lơh jat gùng dà bal bơh Đảng ủy, Huyện ủy kơnhoàl dê. Broă lùp bau den kung tơn jơh ƀà ală bơhiàn kơ̆t bau uă. Gơwèt mờ broă prap gàr bơta kwơ niam chài kung geh lơh pràn, ngan là bè broă prap gàr bơta kwơ niam chài dròng cing kung bè gùng tam ya xoang, gùng đơs pơnđick bơh jơi bơtiàn kis tàm tiah do dê den kung geh bơtàu tơnguh sơl”.

Liêng Srônh là xã geh rlau 70% làng bol ơm kis là jơi bơtiàn dùl ết nă cau, tàm hơ̆ uă ngan là kòn cau K’Ho. Jat mò Nguyễn Thị Thu Hiền, Phó Ƀí thư Đảng ủy xã Liêng Srônh, kơnhoàl Dam Rong, bulah rài kis lơh sa bơh làng bol dê neh geh bơta gơguh jak, bơtàu tơnguh uă ngan pơndrờm mờ lài do mơya kung gam kong mờ uă bơta kal ke, bơta lòng kờñ pal pơn jat tai pơnđơl pràn lơh ngan nàng brồ guh. Den tàng, broă ngui niam gơnoar broă bơh đảng viên, ngan là ală đảng viên là kòn cau jơi bơtiàn dùl ết nă cau tàm broă bơtàu tơnguh lơh sa- mpồl bơtiàn là kwơ màng ngan. Đảng viên mò K’ Nga neh lơh niam ngan gơnoar broă bơh he dê mờ gơ gơs krơh niam pơn rơ ngan nàng uă đảng viên ndai tàm xã in bơsram mờ lơh jat bal. Mò Nguyễn Thị Thu Hiền, đơs:“Bơh rlau 10 nam tă pơgồp dà kơl hề ai xã in gơwèt mờ mò K’ Nga là cau geh bơngă pin dờn ngan tàm tiah làng bol jơi bơtiàn dùl ết nă cau. Tàm broă lơh mblàng yal, hòi jà làng bol lơh jat niam gùng dà broă lơh bơh Đảng, Adat boh lam Dà lơgar dê. Tàm hơ̆ pơn rơ ngan rlau jơh là mblàng yal ai làng bol in tàm broă mpồl bơtiàn lơh bal nàng bơt bơtàu ƀòn lơgar pa, bơtàu tơnguh lơh sa, dong làng bol lik klàs rƀah kơ̆ kơl jăp. Ngan là mò K’ Nga neh dong kờl uă làng bol jơi bơtiàn dùl ết nă cau tàm xã dê brồ guh lik klàs rƀah kơ̆ kơl jăp”.

Mờ ală tă pơgồp bơh să tờm he dê tàm broă lơh lơh broă, mò K’ Nga, Củ tịc Ủy ƀan Mặt trận Dà lơgar Việt Nam xã Liêng Srônh neh dờp geh uă ngan ƀằng khen, sră jờng rơ bơh xã, kơnhoàl mờ càr Lâm Đồng dê. Do là ală bơta cih dờp, pơn jờng di tŭ nàng mò K’ Nga in pơn jat tai tă pơgồp dà kơl hề, lơh jat niam geh cồng nha gơnoar broă bơh kwang bàng, đảng viên dê tàm tiah làng bol jơi bơtiàn dùl ết nă cau.