VOV4.K’ho - Mờ sơnđan “Geh gàr niam ờ do ờ da\ ai tus dùl ASEAN, ai kòn bơnus la cau tờm ngan”, Dơ\ cri bơyai mpồl cau jak sền gàr ngap lơngai ờ do ờ da\ tàm châu Á-Thái Bình Dương tàm nam 2015 bơh Đah lơh broa\ mờ lơgar cau di gah sền gàr dà lơgar Việt Nam mờ Gah atbồ ling tam lơh kuơ màng Thái Bình Dương lơgar Mỹ geh lơh bal bơyai lơh tàm drim òr (25/05), tàm [òn dờng Đà Nẵng.

Thiếu tướng Đỗ Thanh Bình atbồ ling klàng Đặc công Gah sền gàr dà lơgar Việt Nam mờ chuẩn đô đốc Colin Krain atbồ ling klàng tam lơh kuơ màng ling klàng Thái Bình Dương lơgar Mỹ geh đơng lam bơyai lơh bal. Do la dơ\ cri bơyai geh lơgar Mỹ geh lơh bal bơyai lơh pah nam. Rlau 80 na\ cau ala mat ala  bơh 10 lơgar tàm ASEAN, mpồl dong broa\ ASEAN, Australia, New Zealand, Nhờk, Mông Cổ tus bal cri bơyai.

Tàm dơ\ cri bơyai, ala mat ling klàng làng bol Việt Nam geh tam pà kơnòl tus mờ ala\ bơta sền gàr ngap lơngai tàm kơnhoàl mờ dunia geh sền gròi bal, pơ gồp bal sền gàr ngap lơngai ờ do ờ da\, bơtàu tơnguh bal tàm kơnhoàl mờ dunia. Tàm dơ\ lơh broa\ cri bơyai, ala\ cau kuang bơh ờ ua\ lơgar geh cri bơyai bè bơta dong kờl kòn bơnus, dong kờl gơbàn aniai mờ ờ do ờ da\ tàm dà lềng.