VOV4.K’ho- Tàm càr Gialai pa geh lơh cribơyai bè broă lơh atbồ broă lơh rơndeh lơ òr geh rơmòk drơng lơh broă sa sươn sre mờ lơh broă brê bơnơm tàm ù tiah ală càr Tây Nguyên.

Jat tơrgùm kờp, Tây Nguyên tu\ do geh pơgăp 145 rbô nơm rơndeh lơ òr geh rơmòk, uă ngan là tàm ală càr: Daklak, Gialai mờ Daknông. Bulah ală nam do, Chính phủ, ală bộ, gah sơnah lơh broă dà lơgar mờ ală càr tàm tiah do neh lơh uă broă lơh krà` cê jơh nùs ngan kờn tơrmù rềs àr gùng lòt gơrềng tus rơndeh rơndồ do, mơya, tàm tơngai rềp ndo, khà dơ\ rềs àr gùng lòt ngòt rơngơ\t ngan gơrềng tus rơndeh lơ òr geh rơmòk kung gam gơlik geh sơl lơh uă cau chơ\t.

Mờ bơta is rơmis ù tiah [òn lơgar geh uă kơh bơnơm kal ke, broă ngui rơndeh lơ òr geh rơmòk drơng tàm broă lơh sa tàm Tây Nguyên uă ngan mờ tu\ do kung gam ờ hềt geh sơl rơndeh rơndồ lơi gơtùi ala gơ in dipal.

Tàm dơ\ cribơyai, ală kuang bàng đơs là: Bộ Giao thông mờ Vận tải mờ ală gah lơh broă geh gơnoar kờn pal gờn geh ală kơrnoat pal jat cih loh làng tàm broă atbồ, lơh sră cih mat mờ tơl khà rơndeh rơndồ; Mơkung lơh geh gùng dà broă lơh dipal dong làng bol (uă ngan là làng bol kòn cau) geh bơto bơtê, pơrlòng ai sră măy rơndeh do.

Cau cih mờ yal tơngi\t- Lơ Mu K’Yến