VOV4.K’ho - Drim òr (20/6), tàm hìu lơh broă Gah sền gàr dà lơgar, Đại tướng Ngô Xuân Lịch, kuang atbồ gah sền gàr dà lơgar neh đơng lam dơ\ wă mùl màl Thượng tướng Chansamon Channhalat, kuang atbồ gah sền gàr dà lơgar Lào còp mùl màl lơgar he bơh ngai 19 tus 22/6. Tơnơ\ mờ dơ\ wă, Đại tướng Ngô Xuân Lịch neh cri bơyai mờ mpồl kuang bàng ala măt ling klàng dờng màng lơgar Lào. Tàm dơ\ cri bơyai, 2 gah neh tam gơl ờ uă broă geh sền gròi bal. Mùl màl bè broă lơh bal bơh 2 lơgar dê, 2 gah đơs niam broă lơh bal bơh gah sền gàr dà lơgar dê mờ pơn jăt tai tơnguh bơtàu, geh cồng nha mùl màl jăt tơngu me tàm kơrnoăt sồr mờ rơndăp broă lơh bal, geh pơnrơ ngan là gah tam gơl mpồl kuang bàng, broă Đảng, broă gùng dră bal, bơto bơtê mờ bơsram, tam gơl broă mờng chài, gàr niam bơta lơngăp lơngai ờ do ờ dă tàm tiah nhàr dà lơgar, ai tơl bơta niam làng bol 2 lơgar in kă bro mờ tơnguh bơtàu lơh sa. Tàm tơngai tus, 2 gah ring bal pơn jăt tai lơh tơl, lơh geh cồng nha ală tơngu me tàm kơrnoăt sồr kung bè rơndăp broă lơh bal.

Cau cih mờ yal tơng^t Ndong Brawl