VOV4.K’ho - Bơto bơta niam chaì ai kơnòm bơsram bơh broă ai ală kơnòm bơsram in bơsram dròng cing, jòi nàng gĭt is, jòi mờ yal bè bơta chài rơgơi tàm ală dơ̆ chào cờ bồ poh. Do là broă mờ hìu bơsram cấp 2 Y Ngông Niê Kdăm tàm kơnhoàl Cư̆ Mgar, càr Dak lak gam lơh nàng bơtơl nùs nhơm kờñ gơboh mờ bơta chài rơgơi ai ală kơnòm bơsram in.

 Tàm tŭ lĭk nhơl ha là ală ngai lồi poh, ƀlàng hìu bơsram cấp 2 Y Ngông Niê Kdăm tàm thị trấn Ea Pôk, kơnhoàl Cư̆ Mgar, càr Dak Lak den mpong săp dròng cing gle. Mờr 2 nam do, săp dròng cing gle neh gơs săp ntas ờs mờng ngan gơwèt mờ ală kơnòm bơsram dê.

                                Ală cau tàm mpồl dròng cing sùm bơsram tàp nàng kah ală jơnau cing

Oh H Doen Ni Adrơng, bơsram ơdŭ 7a1, là cau tàm mpồl dròng cing yal, kơnờm mờ broă bơsram dròng cing mờ tŭ lĭk nhơl neh gơs niam bơnĕ rơlao, oh geh uă bơta pa nàng jòi gĭt mờ cri bơyai mờ ală bơyô. Bơh tŭ hơ̆, oh sơlơ geh pơnyờ să ngan bè bơhiàn ờs mờng kòn cau oh dê mờ kơ̆p kờ` gơs cau pơgru nàng pơn jăt tai bơto bè bơta chài rơgơi kòn cau Rơđê. "Oh kờñ tus bal tàm broă dròng cing, tài do là dùl bơta chài rơgơi bơh kòn cau Rơđê dê, den tàng oh kờñ prăp gàr mờ tơnguh. Tàm broă tus bal mờ ală bơyô tàm hìu bơsram, tàm ơdŭ den oh chờ hờp ngan, gơboh ngan. Bơh nam ơdŭ 6 tus tŭ do, oh neh gĭt dròng 2 jơnau cing, kung dròng neh chài sơl. Oh kơ̆p kờñ dờng hìng nao gơtùi gơs dùl nă cau pơgru nàng bơto ală kơnòm in gĭt dròng cing".

Crơng gơs bơh nam bơsram lài, mpồl dròng cing hìu bơsram cấp 2 Y Ngông Niên Kdăm geh 12 nă kơnòm bơsram geh bal cau klao mờ cau ùr gơwèt mpồl ơdŭ 6, 7. Do là ală kơnòm kờñ gơboh mờ geh nùs nhơm chài tàm broă dròng cing. Lơh ngan bơdìh mờ tŭ bơsram, ală kơnòm do geh cau chài bơto ờ uă jơnau dròng cing bè hòi mìu, jà ñô, chờ gờm kòi pa… tơnơ̆ mờ 3 nhai tơriang tơriồng tàm broă bơsram, ală kơnòm do ndrờm neh gĭt ală jơnau dròng cing.

Hìu ờs mờng-Thư viện geh lơh jăt hìu jòng kòn cau Rơđê, ai tiah sền sră kờnom bơsram in niam bơnĕ ngan bờdih mờ tŭ bơsram sră tàm ơdŭ

Oh Võ Thanh Ngân, bơsram ơdŭ 7a1 yal, tus bal mờ mpồl dròng cing ờ mìng lơh jăt mờ nùs nhơm gơboh kờñ bơta niam chài rơgơi mờ gam pơgồp bal nàng ală kơnòm geh bơta mờng niam tàm broă bơsram sră: "Oh là cau yoan, mơya gŏ ală bơta niam chài rơgơi kòn cau Rơđê dê niam bơnĕ ngan den tàng oh neh tus bal bơsram. Tàm tŭ bơsram, oh gŏ chờ ngan tŭ geh bơsram mờ ală bơyô là cau kòn cau Rơđê. Boloh geh bơsram bơh nam ơdŭ 6 tus tŭ do, tàm ngai dơ̆ poh pah poh là bol oh tam jà bal tus hờ hìu truyền thống nàng bơsram dròng cing,  gam ală bơyô ndai den geh uă cau tus tàm do nàng sền sră".

Bal mờ broă geh sùm tơl cau tàm mpồl dròng cing, hìu bơsram cấp 2 Y Ngông Niê Kdăm gam sùm bơyai lơh ală dơ̆ pơrlòng gơrềng tus mờ broă prăp gàr bơta chài rơgơi  ờs mờng. Bè tàm dơ̆ tơnkah ngai cau pơgru Việt Nam (20/11) nam lài, hìu bơsram neh bơyai lơh dơ̆ pơrlòng lơh geh ală phan chài rơgơi kòn cau Rơđê dê ai ală cau pơgru mờ kơnòm bơsram in. Bơh tŭ hơ̆, dờp geh 54 bơta phan, phan geh lơh ờs mờng kòn cau Rơđê dê bè: soh phan kòn cau, sơ̆, sơna kam, kơl wờk, plai nhồng, klèng ting bơtrơh phan…

Lŏ Nguyễn Thị Thuý Ngọc, cau pơgru drơng broă đội tàm hìu bơsram yal, bơh cồng nha dơ̆ pơrlòng, hìu bơsram geh broă tam gơl broă chào cờ bồ poh, pơgồp bal nàng kơnòm bơsram jòi gĭt wă mờ mblàng bè phan geh pơnrơ ngan mờ ală kơnòm geh jòi. Mờ broă tam gơl do, ờ mìng cau pơgru mờ kơnòm bơsram kung dờp bal niam ngan. Ală kơnòm bơsram tus bal, pin dờn yal bè phan geh lơh, phan mờ ală kơnòm neh jòi geh jơh bàr dà đơs kòn cau Rơđê mờ dà yoan.  Bal mờ hơ̆, ală broă lơh bơh hìu bơram geh ală kơnòm bơsram tus bal gal rơlao, tơl rơlao. (B)

Lài ngan là bè đơs crih tamya ha là ală broă lơh bal, bơyai lơh ngai pơrjum ờs mờng là jơh ală kơnòm bơsram ndrờm soh phan kòn cau Rơđê, lĭk tàm ƀlàng hìu bơsram tamya xoang bal den ală kơnòm chờ ngan. Tŭ do, hìu bơsram neh geh tai hìu hờ đang, mpồl dròng cing bơh ală kơnòm bơsram kung chờ hờp ngan sơl, sơlơ ngai, bol oh sơlơ pin dờn mờ tŭ lơi kung lùp pơgru bè broă geh pơrlòng lơi lah ờ nàng bol oh tus bal.

Nam bơsram do, hìu bơsram cấp 2 Y Ngông Niê Kdăm geh 11 ơdŭ bơsram mờ 322 nă kơnòm bơsram, tàm hơ̆ geh 95% là kơnòm bơsram kòn cau Rơđê. Tàm ƀlàng hìu bơsram geh lơh dùl hìu truyền thống-Thư viện jăt broă lơh bè hìu jòng bè ờs kòn cau Rơđê dê, geh lơh gơs tàm nhai 8 nam lài. Tàm hơ̆, geh ràng tơlĭk rùp bơh hìu bơsram tàm ală rài, ală phan bè bơta chài rơgơi ờs mờng kòn cau Rơđê dê bal mờ ală pang sră geh uă bơta. Do là tiah gơboh kờñ ngan bơh uă kơnòm bơsram, là tiah ală kơnòm bơsram gơtùi sền ală pang sră mờ să tờm kờñ gơboh ngan ha là bơsram dròng cing mờ jòi sền bè bơta niam chài rơgơi kòn cau Rơđê dê.

Pơgru Hoàng Long Điện, kuang atbồ hìu bơsram pà gĭt, bal mờ broă bơto bơtê jơnau ngăc ngar, hìu bơsram geh pơn jăt gtai lơh jăt uă broă lơh di pal nàng bơto bơta ngăc ngar, bơtơl nùs nhơm gơboh kờñ bal mờ broă sền kuơ, prăp gàr bơta niam chài rơgơi gơwèt mờ kơnòm bơsram dê. "Tus do, hìu bơsram geh tơlĭk rơndăp broă pơn jăt gtai geh ală broă lơh do, tàm hơ̆ uă ngan là broă bơto bơta ngăc ngar pơgồp bal mờ bơta niam chài rơgơi ờs mờng bơh làng bol kòn cau kis  bơh yau tàm do, bè geh sùm mpồl dròng cing mờ tơnguh bơtàu tai ală broă lơh ndai tai bè tus bal pơrlòng, jòi nàng gĭt, mblàng bè ală phan chài rơgơi kòn cau Rơđê dê mờ lơh geh uă ală broă lơh. Pal pơn jăt bơtai lơh sùm, geh ală kơnòm bơsram neh jơh bơsram den geh ală kơnòm bơsram pa mŭt mờ ală kơnòm bơsram pa mŭt geh pơn jăt tai geh bơsram mờ bơsram tàp tàm hìu bơsram do".

Bơto bơtê bơta ngăc ngar tàm rài kis pơgồp bal mờ broă jòi sền, prăp gàr bơta niam chài là ală broă lơh niam bơh hìu bơsram cấp 2 Y Ngông Niê Kdăm dê. Ală broă lơh do ờ mìng ai geh tiah nàng kơnòm bơsram nhơl, chờ, lơh broă tơnơ̆ mờ ală tŭ bơsram kal ke, mờ gam pơgồp bal tàm broă ròng, bơtơl nùs nhơm gơboh kờñ bơta chài rơgơi ờs mờng gơwèt mờ ală rơnàng kơnòm bơsram dê./.

Cau cih H’ Xíu-Cau mblàng Ndong Brawl