VOV4.K’ho – Drim òr ( 10/7), tàm [òn dờng Buôn Ma Thuột, Gah Khoa học mờ Công nghệ dà lơgar pơgồp bal mờ Anih duh broă làng bol càr Dak Lak bơyai lơh pơrjum jak chài “ Kơrnuat, bơta dong kờl mpồl lơh sa kă bro mut ngui khoa học mờ công nghệ tàm broă lơh sa suơn sre tàm Tây Nguyên”, nàng sền mờ đơs bè bơta geh ngan mờ ai tơlik ală broă lơh bè kơrnuat, broă lơh, bơta dong kờl mpồl lơh sa kă bro mut ngui khoa học công nghệ tàm broă lơh sa suơn sre tàm Tây Nguyên. Tus bal pơrjum, ală cau jak chài bal mờ uă mpồl lơh sa kă bro đơs tờm: Ală gơguh jak bè khoa học mờ công nghệ geh mut ngui tàm ală broă lơh sa, kă bro neh pơgồp bơnah uă ngan tàm bơta bơtàu tơnguh bơh gah lơh sa suơn sre ală càr tàm tiah do dê. Mơya, bơta pràn tam gơl pa công nghệ bơh ală mpồl lơh sa kă bro tàm tiah do gam ờ hềt uă, lơh cồng nha tơnhàu, bơta niam mờ bơta pràn tàm pơrlòng bơh phan lơh gơs bơh suơn sre dê ờ hềt uă.