VOV4.K’ho - Tây Nguyên neh mŭt tàm kàl mìu. Mơya tàm kơnhoàl Ea Kar-do là kơnhoàl hờ đah măt tơngai lĭk càr Dăk Lăk dê trồ prang gam lơh gĭt nđờ rơbô lồ phan tam gơtìp aniai, ală bơta phan tam ờ jŏ tơngai bè tơngời, kòi neh chơ̆t jơh, lơh aniai uă ngan tus mờ rài kis làng bol.

Tơnao dơng dà Ea Bư (xã Cư̆ Huê, kơnhoàl Ea Kar) geh bơta dờng prăp dà 500 rơbô khối, tơl dà nàng tuh mờr 100 lồ phan tam in, tàm hơ̆ geh 46 lồ sre lơh kòi bàr kàl. Pơgăp mờ do nggùl nhai, dà tàm tơnao dà Ea Bư neh soăt. Kờñ geh dà tàm sre geh kòi, 2 poh do Đah bơtơ̆t rơbòng dà Ea Kar neh ai măi ƀồm tus nàng ƀồm dà sơndră mờ trồ prang kòi in. Mơya khà dà ƀồm bơh tàm tơnao kung mìng tơl làm ai 20 lồ sre kòi rềp tềng hơ̆ in.

Gĭt nđờ rơbô lồ kòi tàm kơnhoàl Ea Kar, càr Dăk Lăk gơtìp prang soăt dà, di gơlan gơmù cồng nha tơnhào, geh tŭ ờ geh tơnhào

Tơnao dà Ea Bư neh soăt ngan, dà gam kung mìng tơl nàng anih ƀồm dà ing lơh broă bơh 1 tus 2 ngai tai. Ală bă sre kòi neh sih 2 nhai nggùl, kòi gam tàm tơngai hờn gơs niam mơya ờ geh dà den tàng pơrhê jơh. Ồng Võ Đức Danh, geh rơlao 2 lồ ù tam phan jŏ tơngai mờ lơh sre tềng gah tơnao dà Ea Bư. Tŭ do neh jơh dà tuh den tàng phan tam roh jơh, tŭ do mìng kơnờm mờ trồ geh mìu. “Di gơlan di lah trồ prang bè do den broă tơnhào mìng geh di pơgăp 50%. Gam di lah gam trồ prang tai den roh uă rơlao. Jơh ală phan tam tơn, ờ gŏ di mìng kơphe, mờ sầu riêng kung bè hơ̆, ƀơ kung bè hơ̆. Mờ tŭ do đơs bal ngan là ƀồm dà kung neh ờ hoan gơtìp rơlao. Gam di lah tàm poh do trồ geh mìu den geh dong kờl di pơgăp 50%, di lah tus poh tơnơ̆ ờ mìu den roh gời 100% tơn”.

         Làng bol bal mờ gah lơh bơtơ̆t rơbòng dà gam ngui măi ồm dà ing nàng ƀồm dà gam gơlời kòi in

Ồng Phạm Duy Hùng, Chủ tịch UBND xã Cư̆ Huê pà gĭt, bơh bồ kàl mìu, gơnoar atbồ xã neh gĭt lài bơta kal ke bè ờ tơl dà tuh phan tam in, den tàng neh lam sồr làng bol ngui dà tuh tềm pềr. Tŭ do, dà drơng tàm rài kis gam gơl. “Tàm xã den bă sre lơh kòi geh di pơgăp 200 lồ. Gam tai ală bơta phan tam ndai den bă ù sih tam geh di pơgăp 2 rơbô 200 lồ. Tŭ do den ală tơnao dơng dà ndrờm neh soăt dà, den tàng gùng dà broă tam pà dà kung kal ke. Mìng là lam sồr làng bol là ngui dà neh geh lài tàm tơnao bơh ală hìu mờ lơh niam tàm broă tuh dà bè lơi di pal nàng phan tam in geh hòn gơs niam. Ngan là neh gơtìp aniai tus mờ cồng nha tơnhào, bă ù mìng là kòi sre tơrgùm tàm Tứ Xuân, Tư Nghĩa mờ ƀòn Ea Cung mờ ƀòn M’A, ƀòn M’ Riu gơtìp aniai uă ngan bè bă ù lơh sre”.

Tŭ do geh 22 nơm tơnao dơng dà tàm kơnhoàl Ea Kar geh khà dà mìng gam bơh 10 tus 50% khà geh ai. Tàm hơ̆ pal kờp tus mờ tơnao dơng dà Ea Rớt. Broă lơh bơtơ̆t dơng dà Ea Rớt geh bơta pràn tuh dà tus 450 lồ sre tàm ală xã Cư̆ Elang, Ea Dê mờ 130 lồ bă sre ơm kis dùl bă tiah bơtơ̆t rơbòng dà Krông Buk Hạ mờ ai dà ngui sa 1 rơbô 200 hìu làng bol kis tàm tiah do in. Tŭ do, dà tàm tơnao dà Ea Rớt mìng gam 15% khà mờ khà geh lơh. Tàm bơh 10 tus 15 ngai tai, khà dà tàm tơnao do gơmù soăt.

Tềng đăp mờ bơta gơtìp ni sơna bơh trồ tiah do, ngai 06 nhai 8 lài do, UBND kơnhoàl Ea Kar neh tơlĭk jơnau sồr bè broă tơnguh broă rơcang sơndră mờ trồ prang tàm kàl mìu nam 2021. Tàm hơ̆, đơng lam phòng nông nghiệp, UBND ală xã, ală broă lơh bơtơ̆t rơbòng dà, bơyai lơh toah wàs wơl kloh niam, ƀồm khà dà gam tai nàng ai dà tuh phan tam in. Ồng Lê Đình Chiến, Phó Chủ tịch UBND kơnhoàl Ea Kar pà gĭt: “Kòi sre là rơlao 1 rơbô lồ, ờ hềt đơs tus ală bơta phan tam ndai. Bè phan tam pah nam den tŭ do tàm kơnhoàl Ea Kar là chơ̆t jơh, ờ hềt đơs tus phan tam jŏ nam, gơtìp aniai tus mờ cồng nha, khà geh. Bè ală bơta pràn nàng sơndră mờ trồ prang den lài jơh ală mpồl lơh sa kă bro, ală mpồl lơh broă pal ngui bơta pràn is. Mờ kơnhoàl geh ndrờm bal nàng sền wơl. Lài ngan là dan dong kờl bơh càr, dơ̆ bàr là kơnhoàl geh gàr niam rài kis broă lơh sa, ờ lời làng bol gơtìp jơgloh. Tŭ do, broă dong kờl trồ prang den phòng nông nghiệp gam sền wơl mờ jào ală xã, thị trấn in sền wơl, tam cah jăt mờ khà hòc huơr 100%, hơ̆ sồng hoàc huơr bơh tơl bơta nàng bơh tŭ hơ̆, kơnhoàl geh gùng dà broă dong kờl ai ală hìu làng bol in”.

Cau cih Lê Xuân Lãm-Cau mblàng Ndong Brawl